بدأت رحلتي مع الجيب من يوم 27 أكتوبر
نوع العربية: جيب شيروكي موديل 2000 مانيوال 4 سلندر 2500cc
بعد الكشف عليها في مركز خدمة في صقر قريش اسمه "جيبولي" بتاع 3 شركاء كانوا بيشتغلوا في توكيل جيب...أخدت القرار بشرائها .. و كان تقريرهم عنها أن أساسياتها ممتازة (من شاسيه و آلات جر و فتيس و عفشة)
يوم الشراء و بعد اجراءات نقل الملكية... طلعت على بنزينة شل اللي في طريق الاسماعيلية عشان أغسل العربية (غسيل كامل صالون و شاسيه و غسيل خارجي) و بعدين و انا مروح العربية قعدت تقطع مني... سايستها لحد ما وصلت البيت و ركنتها...
تاني يوم 28 أكتوبر روحت مركز الخدمة السابق ذكره (و هما بصراحة أكتر من ممتازين) بعد الكشف على طرمبة البنزين و الاسبراتير طلع العيب في البوجيهات... و أسلاك البوجيهات
و تم تغييرها بسعر 15 جنيه للبوجيه ماركة champion الأصلي و 15 جنيه للسلك (استيراد) بإجمالي 120 جنيه قطع غيار و 80 جنيه مصنعية (اجمالي 200 جنيه)
تاني يوم رحت لعمل أعمال الصيانة الدورية...
غيرت زيت موبيل 10,000 كيلو بسعر 235 جنيه
فلتر زيت ب50 جنيه
طفم تيل فرامل أمامي أصلي ب 180 جنيه
فك فلتر الهواء و تنظيفه
فك الطنابير الخلفية و تنظيفها
شد سير الكاتينة
مراجعة زيت الكوارين (الأمامية و الخلفية)
مصنعية 85 جنيه
(اجمالي 550 جنيه)
الحق يقال... العربية فاقت أوي أوي بعد العمليات ديه و حسيت أنها بيتمر فيها التعب و الشغل...
الجمعة 31 أكتوبر...
تم تغيير الزجاج الأمابي (لأنه كان فيه شوية شروخ) بزجاج جديد جريش (زي الأصلي اللي نازل فيها)
من محل السباعي عند ميدان الجامع بسعر 340 جنيه شامل التركيب
السبت 1 نوفمبر رحت مركز الخدمة تاني علشان ألغي كلاتشات الكرونة الخلفية و تم عمل ذلك مع تغيير زيت الكورونة و تنظيف كل أجزائها الداخلية بالبنزين (اجمالي 240 جنيه)
العملية اللي جاية بإذن الله هتكون تنزيل الفيتيس الأمامي و الخلفي (الغرز) و تنظيفهم و تغيير الأويل سيلات و كذلك قواعد الفيتيس بتاعتهم كلها (و طقم الدبرياج اذا لزم)
لحد دلوقتي صرفت عالعربية 1330 جنيه صيانات عادية و متوقع يوصلوا ل 3-4 الاف عشان تبقا بحالة Perfect
نيجي بأة للجزء الأهم.... التقييم للعربية من حيث الآداء ...
أولا لو كنت راكب أي عربية تانية عادية (سيدان أو هاتش باك) هتحس أكنك قاعد فوق سقف عربيتك القديمة... و معاك دركسيونك و فتيسك و كل اللي نفسك فيه فوق...
في العربية العادية أنت خايف حد يخبطك أو يحك فيك أو يخدش عربيتك... في الشيروكي أنت (و بدون مبالغة) خايف لحسن اللي قدامك يفرمل تجيب شنطته في كبوته...
احساس غير عادي بالقوة...صوت الموتور و الات الجر مسموع الى حد كبير داخل الكابينة و مزعج الى حد كبير...(بالنسبة ليا ممتع جدا و بطفي الكاسيت عشان أسمع الأصوات دي كلها)
العربية عكس ما تخيلت ثباتها معقول (ناس كتير قالوا أن ثبات الموديل ده يعتبر أحسن ثبات في الشيروكي 1999-2000)
النقلات نفسها مش طويل أوي بس الموتور على سرعة 120 - 130 بيكون جايب 3 rpm بالعافية (مش مكمل 3)
مطبات الدائري و قضبان المترو و الحاجات الصغيرة ديه مابتشكلش أي مشكلة... خدها على سرعة و مش هتحس أوي ...
لو دخلت بيها مدق أو طريق مكسر بتحس بكل حاجة دست عليها و كل حفرة نزلت فيها...
استهلاك البنزين: مونت من امارات مصر Full Tank (قبل طريق مصر اسكندرية الصحراوي) و طلعت بالعربية لحد الريست... و دخلت جوا لحد الوادي بعدين خرجت و رجعت تاني القاهرة و دخلت امارات مصر تاني و مونت Full Tank
على العداد أنا عامل 185 كيلومتر بالظبط
عدد اللترات اللي نقص 18.62 لتر بالظبط
يعني بالتقريب اللتر عمل 10 كم عالطوالي (في اعتقادي لأنها 4 سلندر مانيوال 2500cc)
دا تقييمي للعربية لحد دلوقتي و أي حد عاوز يسأل في أي حاجة أنا تحت أمركم...
...سأوافيكم بالأخبار قريبا...
كان معكم M!NA
:)
