تخبط وحيرة ..... تخصصي ولا الحاجة اللي نفسي فيها !!!؟؟؟

أنا خريج كلية زراعة قسم إنتاج دواجن 2013 وطبعا دخلت الجيش ولسة مخلص

المشكلة دلوقت ف التخبط اللي انا فيه

في مجال أنا حابب أدخل فيه وهو التسويق العقاري والمجال ده أنا شايف نفسي فيه وشايف انه برضه موضوع مربح خصوصا لو بعد كدة استقليت بشغل لنفسي

لحد هنا جميل أوي بس تأتي الرياح بما لا تشتهي السفن
أنا عايش بره القاهرة وبعيد عنها ساعة ونص مثلا فلو حبيت أشتغل ف حاجة زي كدة هضطر أؤجر شقة طبعا شير مع اي حد غير برضه الأكل والشرب اللي هيكون على حسابي !!

يعني مرتبي هيطير ع السكن والإقامة !!


مجالي لو هشتغل فيه هشتغل ف مزرعة والإقامة والأكل والشرب عليهم بس المشكلة انها هتبقى متطرفة وبعيدة عن السكن وتقييد بقى وشغل زي الجيش كدة !!!

أنا مش عارف أشتغل ف إي وتعبت من التفكير ياريت لو حد عنده أي أفكار أو مساعدة يفيدني بيها
وشكرا مقدما

انت لسه صغير. متضيعش عمرك في الشغل فقط. انا شايف افكارك محصورة ازاي تشتغل و تجيب فلوس. دا طبعا شئ كويس بس لازم تفكر بالتوازي انك تطور نفسك في مجالك بطريقة غير تقليدية.
لو عايز رأيي. مجال دراستك ممتاز, ولو قدرت انك تطور نفسك بدراسات مستقلة ممكن تحقق ذاتك بشكل كبير جدا سواء على المستوى العلمي او العملي. بحوث الغذاء و الثروة الحيوانية خارج مصر متطورة جدا. و كل يوم فيها جديد بشكل مبهر. اشتغل في الاتجاه دا و قوي نفسك في لغة اجنبية تانية (انجليزي - الماني - فرنساوي) وحاول تنسى ازاي تكسب فلوس دلوقتي. لو طورت نفسك بشكل صحيح الفلوس هتجيلك من غير ما تفكر ازاي تجيبها ان شاء الله. ربنا يوفقك

التسويق العقاري بعافيه شويه اليومين دول نظرا للظروف الاقتصاديه السيئه

و بعدين انت عارف الناس بتبص للسمسار انه حرامي و نصاب

خليك في مجال دراستك افضل

روح للى تحبه هتتميز فيه

طب إي رأيكم لو في مجال تاني غير الإستثمار العقاري أشتغل فيه

ولو في فرصة سفر كويسة ياريت حد يقولي عليها ؟!؟

موضوع السفر ده عايز دراسه متأنيه كام سنه علي ما تاخد قرار + ان جيوبك تكون تقيله + اللغه + عارف ناوي تعمل ايه بالظبط هناك و ده ضمن بند الدراسه المتأنيه

جيوبي تقيلة !!
أمال أنا هسافر لي أصلا يعني !

واللغة أنا لغتي كويسة جدا بس أعتقد أصلا مفيش فرص سفر لدول أجنبية يعني

الفرص موجوده بس الفكره في

انت رايح تعمل ايه ؟ هتدور علي شغل في مجالك ؟ و لا هتفتح مشروع ؟ و لا ناوي تكمل دراسه ؟

لازم هدفك يكون محدد بالظبط عشان علي اساسه بتحدد انت المفروض تروح دوله ايه و هتحتاج فلوس قد ايه

تحياتي

المجال اللى انت درسته كويس جدا لو قدرت تشتغل فيه فترة و تاخد خبرة و بعدين تفتح مزرعة بس بأسس علمية مش زى الباقيين بيعملوا