هل السمارت هي الحل ؟ مش هانقول التوكتوك !

كل يوم الصبح و انا رايح شغلي
و و انا راجع طبعا
كمية كبيرة جدا من العربيات ....
عدد مهول ....
و الكلام على العربيات الملاكي ...
و كل عربية , و انا منهم , راكب فيها واحد بس ....
عربية طول بعرض , شاسيه C , او بلغة اخرى عربية compact , موتور 1600 سي سي , تشيل 5 بني ادمين , و شنطة ورا 400 ولا 500 لتر
و في الآخر راكبها واحد !!!
طب في العموم , اغلبنا في 90% من مشوار الشغل ده , مش بيحتاج غير عربية تشيل نفر واحد , او اتنين مثلا بالكتير , و شنطة مش كبيرة
حاجة فعلا شبه العربية السمارت
http://img2.netcarshow.com/Smart-for...llpaper_18.jpg
و موتور 800 او 700 سي سي مثلا , و تكون مكيفة , و يا سلام لو اتوماتيك ...

و شكرا على كده ... موارد كبيرة جدا مهدورة , و الواحد عمال يحرق في بنزين , و عمالين كلنا مع بعض نزحم في الشوارع بعربيات احجام كبيرة و بتوع التكاتك عمالين يعدوا من وسطنا زي الصواريخ
و لازم لما تركن تلاقي ركنة تقضي عربيتك طبعا

فكرت انا ليه مش باعمل كده , لقيت الاجابة ... ان العربيات في مصر , و يمكن في العالم , حساباتها مختلفة
يعني لو فكرة اجيب عربية صغيرة مكيفة , اقل عربية صيني بالوصف ده اظن ب60 او 70 الف جنيه ....
مش هاقدر
و برده حجمها اكبر من اللي انا عايزه

لو املك السيولة و الامكانيات كنت عملت مشروع استيراد عربيات نفس حجم السمارت دي من الصين , اكيد موجودة :))) , و سوقت لها كويس و كانت هاتتباع
و في خلال سنتين تلاتة يا اما اكون حليت جزء من ازمة المرور و البنزين في مصر , يا اما تكون الحكومة قفلت لي المشروع بزقة من حد من حيتان توكيلات العربيات

بالعكس المشكله مش هتتحل لان رب الأسره هيقول انا حتى لو بروح الشغل لوحدى كل يوم لو حصل فى يوم واسرتى معايا كسفر او كمشوار او كفسحه يبقى هحتاج عربيه كبيره فساعتها محدش هيفكر يبقى عنده عربيه كبيره للاسره يركنها للمشاوير الاسريه فقط ويجيب عربيه ضغيره لمشوار الشغل لان حتى لو المواطن معاه فلوس مش هيبقى قلبه على حل ازمة المرور. الحل الاوفر من ده هوه عمل الكار بولينج يعنى انت فى الشغل معاك تلاته من اصحابك معاهم عربيات وساكنين فى طريقك للشغل يبقى كل يوم واحد يوصل التلاته وكده يبقى كل واحد فيكم هيسوق يوم واحد كل اربع ايام.
لو موضوع السمارت قولنا الزوج يشترى عربيه والزوجه تشترى عربيه يبقى كده العربيتين هيكونوا بنفس حجم العربيه الكبيره. السمارت تنفع لشاب فى جامعه

طب ما كان في مصر فعلا عربية صيني زي سمارت كان اسمها نوبل تقريبا

الحل الوحيد واللي ساير في كل الدول المحترمه
ان يبقي فيه مواصلات عامه أدميه ومنضبطه وامنه ومريحه ساعتها هتلاقي معظم اللي معاهم عربيات هايخليها لمشاوير تانيه او سفر
اي واحد لو بقي عنده المقدره انه يشتري عربيه هايجيب لأن العربيه مبقاتش رفاهيه

وده سوء تخطيط من الحكومه
وطبعا مليارات بتهدر علي الفاضي

اقتباس:

---

المشاركة الأصلية كتبت بواسطة amr011111

بالعكس المشكله مش هتتحل لان رب الأسره هيقول انا حتى لو بروح الشغل لوحدى كل يوم لو حصل فى يوم واسرتى معايا كسفر او كمشوار او كفسحه يبقى هحتاج عربيه كبيره فساعتها محدش هيفكر يبقى عنده عربيه كبيره للاسره يركنها للمشاوير الاسريه فقط ويجيب عربيه ضغيره لمشوار الشغل لان حتى لو المواطن معاه فلوس مش هيبقى قلبه على حل ازمة المرور. الحل الاوفر من ده هوه عمل الكار بولينج يعنى انت فى الشغل معاك تلاته من اصحابك معاهم عربيات وساكنين فى طريقك للشغل يبقى كل يوم واحد يوصل التلاته وكده يبقى كل واحد فيكم هيسوق يوم واحد كل اربع ايام.
لو موضوع السمارت قولنا الزوج يشترى عربيه والزوجه تشترى عربيه يبقى كده العربيتين هيكونوا بنفس حجم العربيه الكبيره. السمارت تنفع لشاب فى جامعه

---

انا فاهم النقطة دي كويس , و لأن (محدش هيفكر يبقى عنده عربيه كبيره للاسره يركنها للمشاوير الاسريه فقط ويجيب عربيه ضغيره لمشوار الشغل) , فاحنا في الارمة دي
و الميزة الوحيدة مش حل ازمة المرور اللي مفروض بالتبعية هاتنعكس علينا كلنا , لكن الميزة كمان ان الواحد هايعرف يركن احسن شوية و هايوفر على نفسه بنزين العربية ال1600 و ممكن قطع غيارها و صياناتها كمان

الcar pooling فعلا حل ممتاز , بس انا بابقى شايفه معمول بنسبة 10% بالظبط
احنا برده مش منتظمين , فلان هايروح بدري شوية , و فلان عايز يتأخر شوية , و فلان عايز يعدي على ماعرفش ايه و هو مروح

اقتباس:

---

المشاركة الأصلية كتبت بواسطة mahmoud869

طب ما كان في مصر فعلا عربية صيني زي سمارت كان اسمها نوبل تقريبا

---

و طبعا فشلت , لأن الثقافة دي مش عندنا

اقتباس:

---

المشاركة الأصلية كتبت بواسطة besso

الحل الوحيد واللي ساير في كل الدول المحترمه
ان يبقي فيه مواصلات عامه أدميه ومنضبطه وامنه ومريحه ساعتها هتلاقي معظم اللي معاهم عربيات هايخليها لمشاوير تانيه او سفر
اي واحد لو بقي عنده المقدره انه يشتري عربيه هايجيب لأن العربيه مبقاتش رفاهيه

وده سوء تخطيط من الحكومه
وطبعا مليارات بتهدر علي الفاضي

---

صح , لا جديد طبعا :)
اللي بافكر فيه فعلا فكرة عربية اضافية صغيرة , بس لازم تكون رخيصة

انا بقي راكن العربية
ومش بتحرك غير بالفيسبا :)

انا بقيت بعمل شغلي في البيت عشان اتخنقت من الزحمه

و مشوار ساعتين يوميا عشان اروح المحل و ساعتين عوده

يعني 4 ساعات ضايعين من اليوم في ال commuting علي الفاضي

لا نافع تركب عربيتك الخاصه (حرق دم و اعصاب)

و لا نافع تركب تاكسيات مثلا (سرقه علني و سواقين مبرشمين)

مش هتكلم عن الميكروباصات الفخمه و المترو الفاضي

عربيه 800 cc و التكييف و فتيس auto دونت ميكس

اقتباس:

---

المشاركة الأصلية كتبت بواسطة hema_lancer

انا بقي راكن العربية
ومش بتحرك غير بالفيسبا :)

---

ما دي كانت اول فكرة , الفيزبا و السكوتر , بس الناس اللي بتركب طرق سريعة و بتمشي مسافات ما ينفعش معاها

اقتباس:

---

المشاركة الأصلية كتبت بواسطة باسم يوسف

انا بقيت بعمل شغلي في البيت عشان اتخنقت من الزحمه
و مشوار ساعتين يوميا عشان اروح المحل و ساعتين عوده
يعني 4 ساعات ضايعين من اليوم في ال commuting علي الفاضي
لا نافع تركب عربيتك الخاصه (حرق دم و اعصاب)
و لا نافع تركب تاكسيات مثلا (سرقه علني و سواقين مبرشمين)
مش هتكلم عن الميكروباصات الفخمه و المترو الفاضي

---

باختصار الوضع حقير

اقتباس:

---

المشاركة الأصلية كتبت بواسطة باسم يوسف

عربيه 800 cc و التكييف و فتيس auto دونت ميكس

---

معاك , بس ممكن مثلا بدل 800 يبقى 1000 , ممكن تبقى مانيوال ماشي
اي حاجة يعني :d :d

ايه المشكلة لما يطلع قرار - زي اي دولة محترمة - بمنع ترخيص المركبات اللي موديلها عدّي عليه 20 سنة مثلاً؟

اقتباس:

---

المشاركة الأصلية كتبت بواسطة anaslbda

ايه المشكلة لما يطلع قرار - زي اي دولة محترمة - بمنع ترخيص المركبات اللي موديلها عدّي عليه 20 سنة مثلاً؟

---

يعني كل العربيات اللي موديل 94 و نازل هاتتسحب عالآرياف , انا مش شايف ده حل

اقتباس:

---

المشاركة الأصلية كتبت بواسطة anaslbda

ايه المشكلة لما يطلع قرار - زي اي دولة محترمة - بمنع ترخيص المركبات اللي موديلها عدّي عليه 20 سنة مثلاً؟

---

صعب جدا

في عربيات موديلات تسعينات فبريكه و خصوصا الbmw و المرسيدس

منع ترخيص المركبات الثمانيات و نعمل احلال اقولك ماشي

ساعتها لو صحابها اعترضوا هنقول ان عربيتهم هلكانه و بتلوث البيئه و بتعمل زحمه علي الفاضي

الاقناع او فرض نوع معين من المركبات وسط مستهلكين متنوعي الظروف و الاذواق .. مهمة صعبة جدا .. حتى دور الحكومة بالتدخل لصالح نوع معين من المصنعين .. لا يستقيم مع آليات السوق من عرض و طلب .. ارى .. و ده رأيي الشخصى .. ان حل مشكلة المرور في العاصمة المصرية .. و المرشحة باستمرار بالتفاقم مستقبلا .. هو تشريع مجنون ! .. يمنع سير الملاكي بالشوارع .. ايوه الملاكي ! .. بالاضافة للمواصلات العامة العشوائية من ميكروباس و تكتك و اشباهه ! .. مع التوسع كما و كيفا .. بالتوازي بمواصلات الاتوبيس و مترو الانفاق و التاكسي .. بمستوى سياحي .. آدمي .. و بتكنولوجيات موجودة حاليا .. مش من الخيال .. من استدعاء مركبات التاكسي او السيارات المؤجرة بالمحمول و تتبع وصول السائق بأنظمة الملاحة عن طريق الموبايلات .. و الفلوس هتكون موجودة .. فائض دعم الوقود الحكومي للسيارات التي تم ابعادها !

اقتباس:

---

المشاركة الأصلية كتبت بواسطة Forever.Leo

الاقناع او فرض نوع معين من المركبات وسط مستهلكين متنوعي الظروف و الاذواق .. مهمة صعبة جدا .. حتى دور الحكومة بالتدخل لصالح نوع معين من المصنعين .. لا يستقيم مع آليات السوق من عرض و طلب .. ارى .. و ده رأيي الشخصى .. ان حل مشكلة المرور في العاصمة المصرية .. و المرشحة باستمرار بالتفاقم مستقبلا .. هو تشريع مجنون ! .. يمنع سير الملاكي بالشوارع .. ايوه الملاكي ! .. بالاضافة للمواصلات العامة العشوائية من ميكروباس و تكتك و اشباهه ! .. مع التوسع كما و كيفا .. بالتوازي بمواصلات الاتوبيس و مترو الانفاق و التاكسي .. بمستوى سياحي .. آدمي .. و بتكنولوجيات موجودة حاليا .. مش من الخيال .. من استدعاء مركبات التاكسي او السيارات المؤجرة بالمحمول و تتبع وصول السائق بأنظمة الملاحة عن طريق الموبايلات .. و الفلوس هتكون موجودة .. فائض دعم الوقود الحكومي للسيارات التي تم ابعادها !

---

مفيش حاجة اسمها تمنع الملاكي!! في حاجة اسمها تحسّن مستوى المواصلات العامة لدرجة تسمح لأصحاب الملاكي بالإستغناء عنها..

مثلا في نيويورك اللي بيشتري عربية بيتريقوا عليه! الـ subway موجود وبيوصّل لكل حتّه تشتري عربية ليه؟ عمرك ما هاتحتاجها.

انا لو عارف ان في مواصلة نضيفة هتوصّلني لشغلي كل يوم من غير ارهاق او قلق, انا اول واحد مستعد استغنى عن عربيتي.

اقتباس:

---

المشاركة الأصلية كتبت بواسطة anaslbda

مفيش حاجة اسمها تمنع الملاكي!! في حاجة اسمها تحسّن مستوى المواصلات العامة لدرجة تسمح لأصحاب الملاكي بالإستغناء عنها..

مثلا في نيويورك اللي بيشتري عربية بيتريقوا عليه! الـ subway موجود وبيوصّل لكل حتّه تشتري عربية ليه؟ عمرك ما هاتحتاجها.

انا لو عارف ان في مواصلة نضيفة هتوصّلني لشغلي كل يوم من غير ارهاق او قلق, انا اول واحد مستعد استغنى عن عربيتي.

---

ده مجرد اقتراح .. و لا املك منصب تنفذي ! .. بس منع الملاكي لو ماكانش هيبقى بتشريع بكره .. هيبقى امر واقع بعده .. مشكلة القاهرة قبل مستوى المواصلات العامة هو التكدس .. اللي مش هيتحل الا بخلق فراغات في الشوارع .. و دي لازم تبقى على حساب حد ! .. و لو كنت حضرتك بتتكلم على نيويورك .. و على استعدادك الشخصى الطوعي بركوب المواصلات العامة .. فطبيعة الحال و ثقافة معظم الناس و خصوصا مع اغراء التقسيط و تملك العربيات و الطفرات التكنولوجية المشوقة في صناعة السيارات هيبقى من الصعب جدا ايقاف ضخ سيارات جديدة كل سنة في الشوارع .. مشكلة المرور في القاهرة تعدت مرحلة العلاج الاختياري .. و لا بد من تدخل جراحي عاجل !

استاذ ليو معاه حق علي فكره

مبيعات العربيات متناسبه عكسيا مع الظروف الاقتصاديه و المروريه للبلد

يعني الناس بتكح تراب و برضه بتشتري عربيات و تقسط و تستلف

البلد مفيهاش طرق ادميه تمشي عليها و برضه لسه الناس بتشتري

الخوف من الصدام اللي هيحصل بين مبيعات العربيات و ظروف البلد

العربيات بعد كده يا اما هتطير يا اما هتمشي علي الحيط :d

1-التوسع الافقي للسكان مع توفير اسعار رخيصه للشقق و طرق و خدمات للتشجيع علي النقل (مش تقولي المتر ب3000 علي المحار في 6 اكتوبر)
2-فرض ضريبه مضاعفه علي السيارات 20 سنه فيما اكثر (حقك تركب مرسيدس قدبم و بي ام قديم)
3-الاهتمام يالشد و الضبط المروري علي الميكروباص و ترخيصه في الاماكن العشوائيه (لا يوجد ادميه في البتاع اللي اسمه ميكروباص ده طول ماقيش حد بيحاسبه)
4-وضع شرطي مرور عند النقاط المروريه الحرجه لتيسيير المرور( فيصل العشرين و العريش نت الهرم مثلا)

الافكار كتيير بس فين الحكومه اللي عايزه تريح الناس
عندنا في الشغل مثل حلو اوي (ريح العمال يقرفوك , اقرف العمال تستريح)

صلو علي رسول الله صلي الله علية وسلم
تبلغ مساحة جمهورية مصر العربية حوالي 1.002.000 كيلومتر مربع والمساحة المأهولة تبلغ 78990كم2 بنسبة 7.8 % من المساحة الكلية
حد فاهم حاجة
ومع ذلك
الناس لسة بتجيب عربيات موديل السنة اللهم بارك
والناس اللي معاها موديل قديم متمسك بية كأنة ترااااااااث فرعوني
والمساحة اللي عايشين عليها كما هي
كما قال الاخ سالفا لازم تدخل جراحي
من حق اي مواطن امتلاك سيارة
ومن حقة ايضا امتلاك منزل
وحق الدولة علينا انشاء طرق تليق بالمواطنين
شوف بقا الدولة بتحبنا قد اية

يا جماعة الحكومة مسئولة و مقصرة , ماشي تمام و كل حاجة , و الحل في المواقف اللي زي دي يا نهاجر و بكده يبقى ما كانش حد غلب , يا نقوم بانتفاضة و يضربـو.......... هاتخلونا نخش في السياسة ليه ؟؟؟ :)

المهم , في اطار اننا نتعامل مع الوضع , بعيد عن ال..... حكومة
نعمل ايه ؟؟؟

انا شوفت عربيه بس مش عارف ماركتها قبل كده فى عباس العقاد
كانت راكب واحد فقط يعنى اصغر من اللى بتتكلم عليه

فكرتنى بعربيه عبد السلام النابلسى

بس احنا نطول حاجة اتنين راكب بس حتى :))))))

اواخر التسعينات كان فيه عربية اسمها برودوا كانشيل , كانت 800 سي سي و اظن اتوماتيك و مكيفة , بس ما نجحتش اوي برده

اقتباس:

---

المشاركة الأصلية كتبت بواسطة تامر.محمد

بس احنا نطول حاجة اتنين راكب بس حتى :))))))

اواخر التسعينات كان فيه عربية اسمها برودوا كانشيل , كانت 800 سي سي و اظن اتوماتيك و مكيفة , بس ما نجحتش اوي برده

---

ماهى الفكره ان اى عربيه اتنين راكب او حتى راكب واحد عمرها ماحتنجح فى مصر
لان مافيش حد حيشتريها علشان استخدامها ينفع فقط فى مشوار الذهاب و العوده من الشغل لكن مش حينفع تخرج بيها مع المدام و الاولاد او تسافر بيها لإن مافيهاش شنطه اصلا
حتقولى خلاص يشترى عربيه تانيه للاستخدامات الاخرى - حقولك مش كتير فى مصر اللى عنده الامكانيه انه يشترى عربيتين ده غير هم الركنه فين و هم مشوار المرور
و اطبعا اقوى سبب لفشل العربيات دى فى مصر هو المنظر - احنا شعب استعراضى بطبعه (بدليل نجاح اى مطعم غالى) و بيحب يتمنظر بالبرستيج بتاعه حتى لو مش لاقى ياكل
بص على الشارع حتلاقى فيه نسبه كبيره من عربيات موديل السنه دى رغم ان 90% من العربيات دى جايه بالتقسيط اصلا و اصحابها بيدفعو نص مرتبهم في القسط بس هى المنظره و خلاص
فتفتكر الشخص ده يرضى يركب عربيه راكب واحد او اتنين - لا لانه حيخاف من الناس اللى حيقعدو يتريقو عليه
لو كان عدم المنظره ده مش موجود كنت حتلاقى الناس كلها اشترو تكاتك و تقريبا بتوفر معظم المواصفات اللى بتقول عليها

اقتباس:

---

المشاركة الأصلية كتبت بواسطة khaled_sabry

ماهى الفكره ان اى عربيه اتنين راكب او حتى راكب واحد عمرها ماحتنجح فى مصر
لان مافيش حد حيشتريها علشان استخدامها ينفع فقط فى مشوار الذهاب و العوده من الشغل لكن مش حينفع تخرج بيها مع المدام و الاولاد او تسافر بيها لإن مافيهاش شنطه اصلا
حتقولى خلاص يشترى عربيه تانيه للاستخدامات الاخرى - حقولك مش كتير فى مصر اللى عنده الامكانيه انه يشترى عربيتين ده غير هم الركنه فين و هم مشوار المرور
و اطبعا اقوى سبب لفشل العربيات دى فى مصر هو المنظر - احنا شعب استعراضى بطبعه (بدليل نجاح اى مطعم غالى) و بيحب يتمنظر بالبرستيج بتاعه حتى لو مش لاقى ياكل
بص على الشارع حتلاقى فيه نسبه كبيره من عربيات موديل السنه دى رغم ان 90% من العربيات دى جايه بالتقسيط اصلا و اصحابها بيدفعو نص مرتبهم في القسط بس هى المنظره و خلاص
فتفتكر الشخص ده يرضى يركب عربيه راكب واحد او اتنين - لا لانه حيخاف من الناس اللى حيقعدو يتريقو عليه
لو كان عدم المنظره ده مش موجود كنت حتلاقى الناس كلها اشترو تكاتك و تقريبا بتوفر معظم المواصفات اللى بتقول عليها

---

انا معاك بس مش عشان اول سبب , ناس كتير عندها القدرة انها تجيب عربية صغيرة رخيصة جنب العربية الكبيرة
بس هي زي ما بتقول في الاسباب اللي بعد كده

يمشي كده طيب ؟؟؟

https://scontent-b-fra.xx.fbcdn.net/...67&oe=55390330

اقتباس:

---

المشاركة الأصلية كتبت بواسطة تامر.محمد

يمشي كده طيب ؟؟؟

https://scontent-b-fra.xx.fbcdn.net/...67&oe=55390330

---

طيب بذمتك انتا ترضى تركبها :biggrin2:
دى عربيه جولف يا عم

ارضى صدقني , كفاية عليها اوي مشوار الشغل :)

موضوعك ممتاز وفي الجول يا تامر
ومسني انا شخصيا ومعاناتي خاصه اني من اللي بيعملو كيلومتر كتير
بالبي ام عملت 70 الف في سنه ونص
طبعا النتيجه ركبتي باظت من الدبرياج لاني ركيب مانيوال
ركنتها وبقيت بتحرك بالسريون بتاعت زوجتي
الف سي سي و 3 سلندر
بصراحه بقيت بركن البي ام بالشهر والاتنين مبتتحركش
السريون بتنجز معايا وبارو كهربا وواسعه
العربيه دي كان لازم تنتشر وتبيع اكتر من كدة
احنا محتاجين حاجة زي الماروتي بس يخلوها ادميه شويه واوسع شويه لانها بتاعت ناس رفيعه :-)

اقتباس:

---

المشاركة الأصلية كتبت بواسطة karim_monir

موضوعك ممتاز وفي الجول يا تامر
ومسني انا شخصيا ومعاناتي خاصه اني من اللي بيعملو كيلومتر كتير
بالبي ام عملت 70 الف في سنه ونص
طبعا النتيجه ركبتي باظت من الدبرياج لاني ركيب مانيوال
ركنتها وبقيت بتحرك بالسريون بتاعت زوجتي
الف سي سي و 3 سلندر
بصراحه بقيت بركن البي ام بالشهر والاتنين مبتتحركش
السريون بتنجز معايا وبارو كهربا وواسعه
العربيه دي كان لازم تنتشر وتبيع اكتر من كدة
احنا محتاجين حاجة زي الماروتي بس يخلوها ادميه شويه واوسع شويه لانها بتاعت ناس رفيعه :-)

---

منور الموضوع يا كريم بك :)
انا برضه خبطت 70 الف كيلو بالميجان بس في 3 سنين :)

السؤال المحوري هنا , و بصفتك جربت اللي باقول عليه ,
اخبار ميزانيتك ايه مع استهلاك البنزين بتاع العربية ال1000 سي سي ؟ خصوصا انها تكييف و باور ؟

انت كمجرب قلت لنا انها بتنجز معاك , اظن قصدك ما يخص حجمها , في المشي و الركنة
و تكييف و باور و واسعة يعني مريحاك

الصراحة السيريون ماشية مع وجهة نظري كإمكانيات , لكن بتختلف انها غالية حبتين على الحسبة اللي باقول عليها , يعني زي ما بتقول , عايزين ماروتي بس ادمية شوية :)

بغض النظر عن مشكلات الحكومة.


انا عن نفسي و ناس كتير من اسكندرية بالفعل ركنين عربياتنا و بنتحرك بالاسكوتر و طبعا مش قادر اقولك على توفير الوقت و البنزين و الركنة.

انا من البيت لحد الشغل عندي 10 كم تقريبا بالعربية في ساعة و اكتر بالاسكوتر ربع ساعة بالكتير.

اقتباس:

---

المشاركة الأصلية كتبت بواسطة mohssenrashed

بغض النظر عن مشكلات الحكومة.


انا عن نفسي و ناس كتير من اسكندرية بالفعل ركنين عربياتنا و بنتحرك بالاسكوتر و طبعا مش قادر اقولك على توفير الوقت و البنزين و الركنة.

انا من البيت لحد الشغل عندي 10 كم تقريبا بالعربية في ساعة و اكتر بالاسكوتر ربع ساعة بالكتير.

---

السكوتر بالنسبة لي كان الفكرة الاولى الصراحة
و كنت ناوي شخصيا فعلا
بس بالنسبة للناس اللي بيمشوا عالدائري و المحور و لمسافات طويلة مش نافع خالص

اقتباس:

---

المشاركة الأصلية كتبت بواسطة تامر.محمد

السكوتر بالنسبة لي كان الفكرة الاولى الصراحة
و كنت ناوي شخصيا فعلا
بس بالنسبة للناس اللي بيمشوا عالدائري و المحور و لمسافات طويلة مش نافع خالص

---

كلامك مظبوط ماهو لو الناس اللي مشورها صغيرة في نص البلد راحت بالأسكوتر الدنيا هتبقا فاضية ع الدائري و المحور و بالتالي الموضوع بالعربية هيبقا سهل.

المشكلة هي ثقافة شعب اللي راكب اسوتر فقير و مش لاقي و الناس بتدعيلي اجيب عربية :)

اللي راكب عربية صغيرة عشان الزحمة و البنزين يقولك فقير و لازم تجيب عربية كبيرة و تتمنظر بيها.

اقتباس:

---

المشاركة الأصلية كتبت بواسطة تامر.محمد

منور الموضوع يا كريم بك :)
انا برضه خبطت 70 الف كيلو بالميجان بس في 3 سنين :)

السؤال المحوري هنا , و بصفتك جربت اللي باقول عليه ,
اخبار ميزانيتك ايه مع استهلاك البنزين بتاع العربية ال1000 سي سي ؟ خصوصا انها تكييف و باور ؟

انت كمجرب قلت لنا انها بتنجز معاك , اظن قصدك ما يخص حجمها , في المشي و الركنة
و تكييف و باور و واسعة يعني مريحاك

الصراحة السيريون ماشية مع وجهة نظري كإمكانيات , لكن بتختلف انها غالية حبتين على الحسبة اللي باقول عليها , يعني زي ما بتقول , عايزين ماروتي بس ادمية شوية :)

---

ده نورك يا باشا

استهلاك ايه
30 ليتر بيعملو 500 كم :-)
ال 60 ليتر في البي ام مبيعملوش ال 500 كم :-)
تكييف معقول لانها الف سي سي 3 سلندر
كل اللي انا ايزه في عربيه
واسعه
باور كهرباء وانا مقدرتش النعمه دي الا بعد حادثه كتفي تلفه بصباعك فعليا ومناوره سريعه جدا
قاعدة عجلات ممتازة
عرضتلها الكاوتش فزاد الثبات وكنت بخاف اجري بيها بقيت امشي بيها 140 و 150
جوه البلد وحش فعلا بناور وبدخل في اي حته اسرع من اي عربيه فعلا
موتور ممتاز وزاويه رؤيه ممتازة للطريق
العربيه ركب فيها 9 افراد :-)
6 بالغين و3 اطفال :-) ومشيت من جوه العبور لحد حدائق القبه :-)
حقيقي القيمه مقابل السعر ممتاز لان اول منافس ليها بيكانتو واي تن ودول لا يرقو لنصها في المناوره والمكانات والنعومه والوسع وكل ده رغم انه 3 سلندر
كفايه انها بنخليني مطلعش البي ام بالشهر ونص وشهرين
الزيت فيها بقاله 14 الف وكنت ناوي اقعده ل 20 عشان مفيش حمل فعلي عالموتور لكن جالي زيت هديه ومطلوب تقرير فاهانزل الوولفر وامري لله مع انه ممتاز معاها لسه :-)