انخفاض أسعار السيارات الأوروبية "وهم"
أكد إلهامى عزت مدير قطاع "مينى" بالمجموعة البافارية للسيارت، أن خفض الجمارك المصرية على السيارات الأوروبية بنسبة 10% بداية العام المقبل 2015 هو قرار سارى وصحيح، ولكن لابد من إيضاح مدى انعكاس هذا على سعر شراء السيارة الفعلى للمستهلك. وأضاف مدير قطاع "مينى"، فى تصريحات خاصة "اليوم السابع"، أن المستهلك المصرى حدث له نوع من البلبة، معتقدا أن السيارة التى تباع بقيمة 300 ألف جنيه ستنخفض بنسبه 10% لتكون بـ 270 ألف وهذا "وهم كبير"، موضحا بمثال السيارة التى تباع بسعر 300 ألف جنيه (ثمنها من المصنع حوالى 19 ألف يورو)، بينما يتم دفع جمرك لها حوالى 57 ألف جنيه + ضريبة مبيعات + رسم تنمية + رسوم وتخزين وشحن + 10 - 15% مكسب الوكيل . وأوضح إلهامى عزت مدير قطاع "مينى"، أن كل البنود السابقة ثابتة، ما عدا الجمرك وبعد التخفيض المقبل يصبح سعر السيارة 52.5 ألف جنيه، وهى التكلفة الكلية مع خفض حوالى 4500 جنيه فقط، وليس 10% من كل السعر، مضيفا أنه إذا قمنا بتطبيق ذلك على سيارة بـ150 ألفا سيكون التوفير حوالى 2600 جنيه. وأكد أن الموضوع الأهم أن الشركة الأم تقوم بإضافة نسبة سنوية قد تتعدى هذا المبلغ لموديل السنة 2015 سواء لتغيير الشكل أو "الفيس لفت"، بما يعنى أن احتمالات زيادة أسعار السيارات أكثر من انخفاضها . وأضاف إلهامى عزت مدير قطاع "مينى" أن الوكلاء لديهم مشكلة أكبر وهى تذبذب أسعار العملات الأجنبية، وأن أنسب وقت للشراء هو الوقت الحالى، نظرا لوجود عروض من شركات السيارات وخصومات للصيانة وغيرها، لأن أسعار السيارات فى زيادة، وتساءل عزت "أن الجمارك قد انخفضت على السيارات الأوروبية 3 مرات بداية من عام 2010 بنسبة 10% كل مرة حسب الاتفاقيات الدولية، ولم نجد أى سيارة قد انخفض سعرها فى الأربعة أعوام الماضية
من الآخر الظاهر كده مفيش تخفيض و أن الموضوع عشم ابليس فى الجنة لكنى لسه انصح السادة العملاء بالأنتظار حتى يناير 2015 لما الأمور تتضح , أيضا لفت نظرى أن السيارة اللى ثمنها 19 الف يورو يعنى حوالى 170 الف جنية تقف على المستهلك ب 300 الف جنية.... فيه ظلم اكثر من كده....
"
إحنا الشعب سبب اللي إحنا فيه
كل الكلام ده مش بيأثر فيا نهائي بسبب (( سلوك المستهلك )) لو المستهلك المصري المتعلم في الجامعات بأنواعها والمثقف والواعي والراشد والعاقل والمحب لبلاده وكل الشعارات الغير واقعيه إمتنع عن الشراء ولو لشهر أو شهرين أو 6 شهور كأنه مستني شحن طلبيه الوكيل من بره إيه اللي هيحصل للتوكيل ؟؟ فكروا معايا :-
1 - مرتبات الموظفين والعمال
2 - إيجار الفروع
3 - مصاريف الفروع ( كهرباء وخلافه )
4 - مصاريف التخزين
5 - مصاريف شحن السيارت
6 - قروض التوكيل من البنوك
7 - إهلاك العربيات الجديدة لعدم تحريكها وإستخدامها وربما تلفها لركنها لفترات طويلة .
8 - الجمارك
9 - الضرائب
10 - تحقيق نسبة مبيعات الملتزم بتحقيقها مع الشركة الأم
وإلى ما لا نهاية كل ده هيقف لعدم وجود سيولة نقدية ساعتها الوكلاء هيفلسوا عشان القروض والإلتزامات اللي عليهم يقوموا وقتها يطالبوا الحكومة للتدخل لوقف النزيف ( تخفيض الجمارك ، إلغاء المصاريف الوهمية ، تحديد نسبه الربح لكل سيارة لوقف جشع الوكلاء ، إحترام المواطن المصري وتعظيم مكانته لإنه بني آدم مش مجرد ............ بيجري ورا شهواته ساعتها يتعملوا ألف إعتبار ويعرفوا إنه الأغلبيه تقدر تهزم الأقليه . إنما من غضب الله علينا إننا بنرضخ في كل حاجه لدرجة إننا بناخد قرض حرام من البنوك وبندفع تأمين إجباري عشان العربية بالقسط ( نفخ على أصوله ) ده غير مصاريف الترخيص الوهمية لأكتر من 1600 سي سي وفي الآخر بتتخبط ويطلع عين اللي ............... عشان تعرف تاخد حقك من التأمين وبكل بساطه يقولك هلاك كلي وعيش عيشه الكفار لغايه مايطلعلك الشيك ويطلع بإسم البنك والبنك ياخده تمن العربية ويبقى كمان عليك اقساط من غير عربية ( في حالة إنك على قيد الحياة ) اما عكس ذلك الله يرحمك ويكون في عون الورثة ويصبرهم على ما بليتهم بيه .
أنا آسف إني طولت عليكم جدا بس خلاصه الكلام ولا تتعاونوا على الإثم والعدوان لإننا ماشيين غلط وهنفضل في كده على طول مش هتنتهي وفكروا كويس إمتى حالنا وحال البلد إنصلح ؟؟ كل سنه زيادتين وتلاته في الاسعار وهنفضل في كده على طول إلا من رحم ربي وفاق من الغيبوبة . ربنا يصلح حالنا وحال المسلمين آآآآآآآآآآآآآآآآآمين