هو التأريط على جوان وش السلندر بعد تركيبه بأسبوعين ..مهم ..؟؟..

**Abo_Mazen** · 20-12-2014 04:29 PM

العربية سوزوكي التو 2008 ..لسه مغير جوان وش سلندر من أسبوعين ..وده طبعا بعد صراع طويل مع المرض اللعين ده (اللي هو زيت على المياه يعمل طحينه في الريداتير ..كبس في المياه ..إستمر لمدة سنة ونص تقريبا وده كان بسبب ميكانيكي إفتكاسي مخترع )..ودي قصة طويلة ممكن أبقى أحكيها بعدين ..المهم الميكانيكي اللي قفل العربيه بعد ما خلص قالي إبقى تعالى كمان إسبوعين كده عشان أحرق على الوش ..بتشديد حرف الحاء في أحرق..فأنا بصراحه طنشت ومروحتش وقلت ده أكيد بيفتح شغل وعايز يلهف مصنعية زياده بعد الشغل وخصوصا إن في ناس قالولي موضوع التحريق ده كان زمان في العربيات القديمة..المهم إني بعد أسبوع أو عشر أيام لاحظت إن المياه بتروح القربه وما بترجعش الريداتير ..والموضوع ده بيحصل بعد مشوار طويل وعفي ويكون على سرعة عاليه ..ونسبة المياه اللي بتروح القربه مش كتير ..لكنها بطبيعة الحال لما ما بترجعش الريداتير بتخلي المروحه تشتغل مدة أطول شوية عن المعتاد ..ومكانش في حرارة زيادة ولله الحمد..فأنا بصراحه قمت رايح للميكانيكي بعد أسبوعين زي ما قالي وحكيتله على المشكله ..فقالي أومال أنا ليه قلتلك إبقى تعالى عشان أحرقلك على الوش ..المهم فك غطا التاكيهات وحرق فعلا على مسامير الوش ..ولقيت إن المسامير جابت معاه رباط ..ولله الحمد العربية ما شاء الله زي الفل والمشكلة إتحلت

السؤال بقى ..هو موضوع التحريق على الوش ده مش كان بيتعمل زمان في العربيات القديمه ..أو في العربيات اللي حطه جوانات دوبل ..يعني موضوع التحريق ده مهم ولا إفتكاسه وبقت قديمه..وليه الوش ريح عندي بعد عشر أيام وجاب رباط تاني في الميكانيكي..الموضوع ده سألت فيه كتير ومش لاقي إجابه لغاية دلوقتي

**Mecha** · 20-12-2014 08:11 PM

اباشاااا , والنبي قولي هو حرقو ازاي؟؟؟ , بماسوره ولا ايه
عشان دي هرتلة ف افتكاس
برجاء الايداح

**Mecha** · 20-12-2014 08:13 PM

اباشاااا , والنبي قولي هو حرقو ازاي؟؟؟ , بماسوره ولا ايه
عشان دي هرتلة ف افتكاس
برجاء الايداح

**Abo_Mazen** · 20-12-2014 09:11 PM

أولا طلع عامود الكامه كله بره ..وبعدين جه بالمفتاح على كل مسمار وحط ماسورة وقعد يأرط ..في مسامير جابت معاه رباط وفي مسامير مجابتش ..الله ..بس لما هي إفتكاسه ..أومال الكبس اللي في دورة التبريد ده ظهر ليه ..ولما حرق على مسامير الوش ضبطت إزاي ..يعني اللي هو عمله ده ملوش علاقه بحل المشكلة ولا إيه مش فاهم

**Mecha** · 20-12-2014 09:23 PM

آباشا الكبس اللي في دورة التبريد مكنش مفروض يظهر اساسا ولا الفلم دا
هد الالتو بيتربط علي ٤ مراحل 65-70 N.m ,تمام عشان اربط محتاج مفتاح عزم واربط واحل لحد ما اريح الهد واطبع الجوان واوصل المسامير لاجهاد الخضوع ,حسب الناس اللي عاملة المكنة لكن المفتكس معندوش مفتاح عزم وعدته علي قدها مبيستعملش حتي لقم
والمهم بعد الرباط والتقفيل املا مية حنفية مش خضرا عشان التسريب ودي بلاقيه افي تعليمات الجوان الجديد.وتتغير للميه للخضرة معالسرفس القادم

**Abo_Mazen** · 20-12-2014 10:05 PM

بس أنا بالنسبة لي المهم إن المشكلة إتحلت ولله الحمد

**D . a .\ AYMAN** · 22-12-2014 09:37 PM

التأريط مهم جدا بعد فترة من عمل الموتور حتى لو الفني استخدم مفتاح العزم وربط بالعزم الصحيح في أول مرة ... لأن في جميع الأحوال مع الحرارة والبرودة واختلاف معايير الوش الجديد (بعد الخرط) مع الجوان الجديد مع البلوك القديم بيفرق بعض الفروقات البسيطة ... ولو تم استخدام عدة عادية بدون مفاتيح العزم الصحيحة بيكون الموضوع ده مهم أكثر لأنه طبعا ما ربطش أصلا بالعزم الصح في أول مرة

الضغط الزيادة اللى حصل في الردياتير ... سببه إن الوش ريح شوية مع الاستعمال وبقى يطلع ضغط خفيف من غرف الاحتراق على دورة المياه وتسبب في المشكلة دي ... ولما ربط عليه تاني راحت المشكلة طبعا

طبعا لو الموتور جديد لسة متقفل في المصنع بتاعه بيتعمل بمقاييس تانية غير بتاعة الصنايعية اللى عندنا وبرغم ذلك بعد تليين الموتور داخل المصنع بيتم عمل فحص كامل ليه قبل خروجه من المصنع برضه

وعلى فكرة التأريط على مسامير الوش داخل جوة المصنعية اللى انت أصلا دافعها للميكانيكي :)

**Abo_Mazen** · 24-12-2014 02:07 PM

المشاركة الأصلية كتبت بواسطة d . A .\ ayman

التأريط مهم جدا بعد فترة من عمل الموتور حتى لو الفني استخدم مفتاح العزم وربط بالعزم الصحيح في أول مرة ... لأن في جميع الأحوال مع الحرارة والبرودة واختلاف معايير الوش الجديد (بعد الخرط) مع الجوان الجديد مع البلوك القديم بيفرق بعض الفروقات البسيطة ... ولو تم استخدام عدة عادية بدون مفاتيح العزم الصحيحة بيكون الموضوع ده مهم أكثر لأنه طبعا ما ربطش أصلا بالعزم الصح في أول مرة

الضغط الزيادة اللى حصل في الردياتير ... سببه إن الوش ريح شوية مع الاستعمال وبقى يطلع ضغط خفيف من غرف الاحتراق على دورة المياه وتسبب في المشكلة دي ... ولما ربط عليه تاني راحت المشكلة طبعا

طبعا لو الموتور جديد لسة متقفل في المصنع بتاعه بيتعمل بمقاييس تانية غير بتاعة الصنايعية اللى عندنا وبرغم ذلك بعد تليين الموتور داخل المصنع بيتم عمل فحص كامل ليه قبل خروجه من المصنع برضه

وعلى فكرة التأريط على مسامير الوش داخل جوة المصنعية اللى انت أصلا دافعها للميكانيكي :)

هو بصراحه خد تلاتين جنيه على الشغلانه بتاعت التأريط على الوش ..ده غير ميتين جنيه مصنعيه في الأول

**D . a .\ AYMAN** · 24-12-2014 05:24 PM

المشاركة الأصلية كتبت بواسطة m_m_sh_a

هو بصراحه خد تلاتين جنيه على الشغلانه بتاعت التأريط على الوش ..ده غير ميتين جنيه مصنعيه في الأول

هو المفروض ما ياخدش حاجة لأن ده باقي شغله .. بس هاتعمل ايه لقى افترا بعيد عنك

ده انا كنت باروح للميكانيكي لمدة ست شهور على حس وش السلندر كل شوية علشان يضبطلي الموتور والراجل ما كانش بيتأخر