استشارة مفيش محضر و العربية اتخبطت

**AHMADALY1999** · 20-12-2014 09:38 PM

زوجتى واحد خبطها فى الباب الامامى يمين و نزل و اتطمن عليها و سابته يمشى
لا خدت نمرة عربيته و لا طبعا عملت محضر و لا حتى كلمتنى غير لما روحت
المهم انا شفت الباب شكله و الله اعلم يا حيتغير يا شغل مكلكع
انا بقى مش قادر اعمل محضر فشنك ......... ضميرى مأنبنى
تفتكروا لو روحتلهم شركة التأمين و حكتلهم بصراحة و لو طلبوا محضر حقولهم مفيش بس ممكن اعمل واحد على اساس انها اتخبطت تحت البيت
هل اساسا حيقبلوا الاصلاح و العربية باسمى و مراتى اللى خبطاها ؟
هل لو قلتلهم الحقيقة حيتعاونوا و لا ما حيصدقوا و يقلبونى ؟ ( دا مش حيأثر فى قرارى )
لانى ناوى لو وافقوا على موضوع المحضر حيبقى ضميرى مرتاح انهم عارفين الحقيقة
و لو مفيش فايدة حغير الباب على حسابى

**OldVic** · 20-12-2014 10:23 PM

حسب شروط الوثيقة، أليانز مثلاً مش محتاجة محضر للأضرار حتي ١٠ آلاف، راجع وثيقتك. مش محضر فشنك ولا حاجة، قول انك نزلت و لقيتها مخبوطة أو العربية اللي خبطتها بدون لوحات. شركات التأمين مش بتعمل حاجة بالمحاضر دي للأسف.

**OldVic** · 20-12-2014 10:25 PM

حاجة كمان، مش مهم مين كان سايق العربية المؤمن عليها طالما السواق عنده رخصة سارية، و برضه راجع شروط وثيقتك.

**AHMADALY1999** · 20-12-2014 10:26 PM

تسلم يا باشا
الله يطمك
انا مأمن مع بيت التأمين المصرى السعودى

**OldVic** · 20-12-2014 10:53 PM

لا شكر على واجب. بس إشمعنى الشركة دي؟ مش رخيصة و نسبة التحمل فيها عالية، واحد صاحبي كان مأمن فيها و سمعت أرقام عجيبة. ياريت تبقى تطمنا عملت إيه.

**AHMADALY1999** · 20-12-2014 11:08 PM

انا شاكر جدا اهتمام حضرتك
انا مكنتش عايز أأمن اساسا بس البنك شرط عليا و المعرض هو اللى رشحلى دا
كانت 3.2 % تقريبا و قالى دول افضل الرخيص
و ان شاء الله اطمن حضرتك

**ali ashraf** · 21-12-2014 11:10 AM

المشاركة الأصلية كتبت بواسطة oldvic

لا شكر على واجب. بس إشمعنى الشركة دي؟ مش رخيصة و نسبة التحمل فيها عالية، واحد صاحبي كان مأمن فيها و سمعت أرقام عجيبة. ياريت تبقى تطمنا عملت إيه.

السلام عليكم ياريت حضرتك ترشح شركة تأمين , أنا لسه شارى سيارة لزوجتى و عاوز أأمن عليها و لاحطت حضرتك زكرت أكثر من مرة الوثيقة حسب البنود المكتوبة فيها هى البنود دى متغيرة و لا حسب الاتفاق؟ انا آسف لكن معلوماتى عن التأمين محدودة جدا مع خالص تحياتى

**AHMADALY1999** · 21-12-2014 10:08 PM

الحمد لله عملت محضر بما يرضى الله ............. الحقيقة مجردة
و روحت التأمين و تمام الحمد لله
و وديتها مركز صيانة حيغيروا الباب ان شاء الله
بس انا اللى حدفع الأول و بعد كدا اعمل معاينة تانى و اديهم الفواتير يدونى شيك باسم البنك و بعدين يبقى ينزل فى حسابى الحمد لله