الموضوع: الزيوت التخليقية ... هل هي تخليقية فعلا؟؟

[gdwl]ملحوظة هامة..
الموضوع ده معمول للمستوى الأعلى نسبيا.. يعني لازم في الأول تبقى فاهم شوية معلومات أولية علشان تقدر تستوعب الكلام اللي مكتوب هنا ده.
لو حضرتك لسه جديد في موضوع الزيوت.. انصحك تدخل على الموضوع ده الأول
http://www.nilemotors.net/Nile/341680-a.html


خلينا نبدأ...[/gdwl]


سؤال غريب .. يمكن ما خطرش في بال أغلب اللي بيشتروا الزيوت...


الحقيقة.. إن مش كل الزيوت التخليقية اللي بتتباع في السوق نقدر نقول عليها إنها تخليقية بالكامل

بل يكاد يكون العكس.. معظم الزيوت اللي موجودة في السوق نقدر نقول عليها إنها "مصنعة بطريقة تخليقية"... ولكنها ليست تخليقية في الأساس.


إيه الكلام ده؟؟ انت كده لخبطلنا الكلمتين اللي عارفينهم

في الحقيقة .. هو فعلا كلام يلخبط شوية.. بس لما نفهم الكلام ده هنعرف ليه بيقولوا على ماركات زيوت معينة إنها ممتازة ومتفوقة






بس خلينا نفهم الأول يعني إيه زيت محركات السيارات؟؟؟


زيوت السيارات اللي بنستخدمها في عربياتنا في الوقت الحالي هي عبارة عن خليط من : زيت أساس + إضافات


زيت الأساس بيشكل حوالي 90-95% من الزيت اللي بنشتريه فعلا... واللي لو اعتمدنا عليه لوحده مش هنعرف ناخد الأداء المتعارف عليه في الزيوت في وقتنا الحاضر..




والإضافات هي اللي بتعمل أغلب الفرق في الحقيقة.. ودي فيه منها أنواع كتير على حسب الهدف منها... زي:

تحسين مؤشر اللزوجة ...اللي بتحول الزيت من أحادي اللزوجة إلى متعدد درجات اللزوجة
تحسين الثبات الحراري.. علشان ما يتحللش مع ارتفاع درجات الحرارة
تحسين خواص التنظيف.. علشان يفضل الموتور بحالته بدون رواسب
تحسين التشتيت الحراري.. علشان تساعد في سحب الحرارة الزايدة من أجزاء الاحتكاك
خفض الضوضاء.. اللي جاية نتيجة تحرك الأجزاء الميكانيكية جوه الموتور

وإضافات تانية تختلف على حسب الغرض من الاستخدام.




طيب.. أمال إيه حكاية زيت الأساس؟؟


زيت الأساس هو الوسط اللي بتدوب فيه كل الإضافات دي.. وده فيه منه نوعين أساسيين:


معدني و تخليقي


الزيت المعدني
هو زيت مصدره البترول المستخرج من باطن الأرض .. وسموه معدني لإنه جاي بطريقة "التعدين" أو الحفر والتنقيب لاستخراج مادة معينة.





الزيت التخليقي
هو زيت منتج في المعمل (تحت ظروف معينة) نتيجة تحول مادة أخرى لها خصائص مختلفة إلى الزيت الجديد..
(زي فكرة السمن النباتي.. هو زيت نباتي بس مهدرج وتحول إلى سمن)


مش بالضرورة يكون مصدره الزيت المعدني.. فيه منه كذا نوع:

1- نوع تخليقي 100% من زيوت غير معدنية.. ودي في منها كذا نوع.. هنحاول نذكر أكترهم انتشاراً.
2- نوع مصنع بطريقة تخليقية من زيوت معدنية.. وده أغلب الزيوت التخليقية الموجودة في السوق.
3- نوع شبه تخليقي عبارة عن خليط من زيوت معدنية وزيوت غير معدنية .. بحيث إن الزيوت المعدنية ماتزيدش عن 30%.



مع التطور الحاصل في صناعة الزيوت، بدأت شركات الزيوت تعمل دعاية لزيوتها.. وكل شركة عملت لنفسها استاندارد لوحدها.. وده سبب لخبطة جامدة في السوق.


المعهد الأمريكي للبترول (API) حط تصنيف لزيوت الأساس علشان يبقى فيه معايير واضحة لجودة الزيوت.





تصنيف الـAPI لزيوت الأساس قسم زيوت الأساس إلى 5 مجموعات:

مجموعة 1 Group I
زيت معدني مستخرج من البترول بطريقة "تكرير المذيبات" أو Solvent Refining .. ودي أقدم وأبسط طرق تكرير البترول.

الزيت الناتج بالطريقة دي عادة بيبقى فيه نسبة شوائب "ملونة" عالية بالإضافة إلى كمية من الشمع.

الـAPI حددت مواصفات المجموعة دي كما يلي:
نسبة التشبع < 90% ... نسبة الكبريت > 0.03% ... مؤشر اللزوجة من 80 إلى 120

[cc=انقر هنا لمشاهدة التعريفات]التشبع: هو مدى تشبع السلسلة الكربونية لمركب الزيت بالهيدروجين.
مؤشر اللزوجة: هو رقم محسوب بيـبيّن العلاقة بين لزوجة الزيت وثباتها أو تغيرها مع تغير درجة الحرارة، وكلما زاد الرقم كانت لزوجة الزيت أكثر ثباتاً.
[/cc]


الزيوت دي اللي السوق المصري بيسميها "زيوت 3000 كم"... ومنها على سبيل المثال: زيت شيل هيليكس HX3 (المتعارف عليه باسم شيل الأحمر)






مجموعة 2 Group II
زيت معدني مستخرج من البترول ويكرر ويعالج نسبياً بطريقة كسر السلسلة الهيدروجينية (Hydro-cracking).

زيوت المجموعة دي أداءها أحسن من أداء زيوت مجموعة 1... وعندها مقاومة أكبر للأكسدة لإن نسبة التشبع فيها عالية... ده غير إنها أنقى من ناحية اللون.

وبتشكل معظم زيوت الأساس للزيوت المعدنية المتاحة في السوق مع إنها أغلى من زيوت المجموعة 1.. بس كثرة الطلب عليها ساعدت في خفض التكلفة بحيث إنها حاليا بقت تقريبا بنفس سعر زيوت المجموعة 1.

مواصفاتها كالتالي:
نسبة التشبع > 90% ... نسبة الكبريت < 0.03% ... مؤشر اللزوجة من 80 إلى 120

[cc=انقر هنا لمشاهدة التعريفات]التشبع: هو مدى تشبع السلسلة الكربونية لمركب الزيت بالهيدروجين.
مؤشر اللزوجة: هو رقم محسوب بيـبيّن العلاقة بين لزوجة الزيت وثباتها أو تغيرها مع تغير درجة الحرارة، وكلما زاد الرقم كانت لزوجة الزيت أكثر ثباتاً.
[/cc]


الزيوت دي اللي السوق المصري بيسميها "زيوت 5000 كم"... ومنها على سبيل المثال: زيت شيل هيليكس HX5 (المتعارف عليه باسم شيل الأصفر)





مجموعة 3 Group III
زيت معدني مستخرج من البترول، ومعالج بالكامل بطريقة كسر السلسلة الهيدروجينية (Hydro-cracking).. بحيث إن جزيئاته كلها بقت ليها نفس الشكل والتركيب.. وده ساعد إنها تدينا أعلى كفاءة تزييت مقارنة بباقي الزيوت المعدنية.

أغلب زيوت المجموعة دي درجات اللزوجة بتاعتها تعتبر خفيفة.. لإن جزيئاتها بقت أصغر نتيجة عملية الـHydro-Cracking.. وبالتالي هتلاقي لزوجات الزيوت دي كلها تبدأ بـ 0W أو 5W

ولإن طريقة التصنيع دي غيرت فعليا من خصائص الزيت.. والتالي فكتير من شركات الزيوت بتعتبره زيت تخليقي..


زيوت المجموعة دي عندها مقاومة أكبر للتأكسد من زيوت مجموعة 2... ولونها أنقى منها كمان.

مواصفاتها كالتالي:
نسبة التشبع > 90% ... نسبة الكبريت < 0.03% ... مؤشر اللزوجة > 120

[cc=انقر هنا لمشاهدة التعريفات]التشبع: هو مدى تشبع السلسلة الكربونية لمركب الزيت بالهيدروجين.
مؤشر اللزوجة: هو رقم محسوب بيـبيّن العلاقة بين لزوجة الزيت وثباتها أو تغيرها مع تغير درجة الحرارة، وكلما زاد الرقم كانت لزوجة الزيت أكثر ثباتاً.
[/cc]

الزيوت دي اللي بيسموها زيوت 10000 كيلومتر...

مثال للزيت ده: زيت شيل هيلكس ألترا






مجموعة 4 Group IV
زيوت مخلقة من الـ"بولي ألفا أولفين" polyalphaolefin وبيسموها اختصارا بـ(PAO)



البولي ألفا أولفينات هي في الأساس نوع من البلاستيك.. وكلنا بنستخدمه في حياتنا العادية في صورة "المشمع" أو "أفلام التغليف" مثلا.


وزيوت المجموعة الرابعة أداءها هايل.. وعمرها طويل جدا بالمقارنة مع الزيوت العادية.. بس من أحد أهم خصائصها إن الإضافات مش بتدوب فيها... ولو عايزين نزود ليها إضافات يبقى لازم نذوبها في مادة مذيبة (زي أحد مركبات الإستر) وبعدين نضيف المادة دي على الزيت الأصلي.

الزيوت دي هي أول زيوت تخليقية ظهرت في سنة 1972 من إنتاج شركة آمسويل الأمريكية، وتبعتها موبيل 1 في سنة 1974، وبعد كدا الموضوع توسع وبقى فيه كذا شركة تانية بتنتج بعض زيوتها من المجموعة دي.

ميزة زيوت الـPAO إننا نقدر نصنع منها زيوت بأي لزوجة عايزينها... يعني نقدر ناخد زيت تخليقي أساسه PAO بلزوجة ثقيلة جدا زي 20W-60 أو خفيفة جدا زي 0W-20


الصورة دي بتبين الفرق في النقاء بين زيوت المجموعات الأربعة الأولى




أبرز الشركات اللي بتعمل زيوت من المجموعة دي هي آمسويل AMSOIL، موبيل 1 Mobil، رويال بربل Royal Purple ، ودي كلها شركات أمريكية




فيه شركات تانية زي ما قلنا بتعمل بعض أنواع زيوتها من المجموعة دي






مجموعة 5 Group V

أي زيت أساس تاني غير المذكورين في مجموعة 1 ، 2 ، 3 ، 4.

وبيدخل تحتها أنواع كتير من الزيوت التخليقية واستخدامتها في كل تطبيقات الآلات الميكانيكية.. حتى في غير الاستخدامات في المواتير.. يعني لو حصل واشتريت زيت فتيس تخليقي يبقى أكيد من المجموعة الخامسة.

الحقيقة إن التنوع الكبير في أنواع الزيوت دي بيخلي مستوى أداء الزيوت دي يختلف جدا حسب المادة المصنوع منها الزيت، بس كل يوم بينزل منها جديد والتطور شغال فيها بوتيرة عالية.

أشهر أنواع زيوت المجموعة الخامسة المستخدمة في مواتير السيارات هي زيوت الـ"إستر" Ester، والإستر دي مواد كيماوية معروفة في علم الكيمياء، وكلنا بنتعامل مع مركبات منها زي الملابس المصنوعة من "البوليستر" مثلا.

والميزة الأساسية لزيوت الإسترات هي قابليتها لذوبان الإضافات فيها.. علشان كده.. غالبا بنلاقي زيوت الـPAO مضاف إليها زيوت الإستر لتقبل الإضافات.



والشركات اللي بتعمل زيوت من المجموعة الخامسة كتير، ونذكر منها مثلا: موتول، وفكس، وجلف






الشكل ده بيلخص الفروق بين المجموعات






طيب... كده عرفنا تصنيفات زيوت الأساس..

إيه بقى حكاية الزيوت التخليقية اللي مش تخليقية؟؟؟


زي ما شفنا في مجموعة 3... شركات الزيوت بتعتبر زيوت المجموعة 3 تخليقية على أساس إن الزيت معاد تكوينه.. وبالتالي بقى تخليقي

حاليا .. زيوت المجموعة 3 بقت بتشكل الغالبية العظمى من الزيوت التخليقية في السوق.. لإنها:

* بتدي كفاءة في الأداء قريبة من زيوت المجموعة 4 والمجموعة 5
* ده غير إنها أرخص... وده الأهم طبعا.

شركات الزيوت مش بتقول للناس إن الزيوت التخليقية اللي بتنتجها معمولة من زيوت أساس المجموعة 3.. وبتسمي أي زيت من دول "تخليقي" Synthetic

طبعا .. موضوع التسمية ده عامل لخبطة كبيرة للناس كلها على مستوى العالم.

ألمانيا هي البلد الوحيدة في العالم اللي ما بتعتبرش الزيت ده تخليقي.. أو بمعنى أصح .. ممنوع قانوناً يتكتب عليه "تخليقي Synthetic"... إنما بيسمحوا إنه يتكتب على العبوة حاجة شبه "مصنوع بتقنية تخليقية" Synthetic Technology .. أو مخلق بكسر السلسلة الهيدروجينية Hydro-cracked Synthesis




إنما في بقية دول العالم بيكتبوا عليه تخليقي .. وأحيانا بيكتبوا "تخليقي بالكامل"


طيب... هل فيه أضرار من استخدام الزيوت التخليقية بتاعت المجموعة 3 ؟؟؟


من وجهة نظري.. أنا شايف المسألة غش تجاري أكتر..

يعني تشتري حاجة "كويسة" وانت فاكر إنك بتجيب حاجة "ممتازة" ..

أو على الأقل.. تدفع فلوس كتير في حاجة المفروض يكون سعرها أقل من كده.



ومن ناحية السلبيات..
فلا تتعدى إن الزيت مدة خدمته مش أكتر من 10 آلاف كيلومتر

ومن ناحية الإيجابيات..
فالتغيير من الزيت المعدني إلى زيت التكنولوجيا التخليقية ما لوش آثار سلبية على الجوانات الخاصة بالموتور.. على عكس الزيوت التخليقية الحقيقية في مجموعة 4 ومجموعة 5.


لمعلومات أكتر عن مشاكل التغيير من الزيوت المعدنية إلى الزيوت التخليقية.. أنصحك بالدخول على المشاركة الرابعة من الموضوع ده:
http://www.nilemotors.net/Nile/341680-a.html



...