هام بخصوص مشكله فى طرمبه البنزين وعرض للحل

**Hesham.H** · 23-12-2014 01:19 AM

الزملاء الأعزاء ... كل عام وأنتم بخير

من فتره طويله وانا بلاحظ إن مع وجود حوالى ١٥ لتر فى التانك بلاقى العربيه بتقطع معايا كأنها بتخلص بنزين ... والتقطيعه تزيد كل أما البنزين يقل ... لدرجه انها بتبطل مع وجود ١٠ لتر داخل التانك
شكيت فى العوامه وقلت هى اللى قراءتها غلط .. وانا طبيعى مش بسيب العربيه تخلص بنزين الا فى ظروف قصوى كعدم وجود بنزين مثلا

المهم كنت بفك وش الطرمبه امبارح عشان بغير عوامه البنزين وكان فيها حوالى صفيحه ... قعدت أفكر إيه اللى يخليها تعمل الحركه دى
ودى صوره من على النت لمنطقه طرمبه البنزين والخراطيم بتاعتها

لاحظت إن خرطوم الراجع اللى عليه السهم مش راكب فى الماسوره الحديد بتاعته اللى فى وش الطرمبه اللى بيبقى فى التانك من فوق
وبيبقى راكب تحت فى الحافظه البلاستيك بتاعه طرمبه البنزين عشان يرمى البنزين الراجع فوق مصفاه الطرمبه مباشره

معنى كده ان البنزين الراجع عندى مش بينزل فى المكان ده ... وبينزل خارج فبره الطرمبه .. بالتالى اول ما يقل منسوب البنزين .. الطرمبه بتسحب من تحتها فى الحافظه البلاستيك اللى هى ديقه اصلا ... والراجع بينزل فى مكان تانى بعيد نسبيا عنها وعلى ما يلف ويرجع لها تانى بياخد وقت اللى هو ساعه التقطيع اللى كان بيحصل معايا

تعمدت بعد ما ركبت الخرطوم ده انى اسيب العربيه من غيو ما احط بنزين لغايه الحمد لله ما وصلت لغايه ٥ لتر من غير اى تقطيع

نصيحه لاى حد هايركب الخرطوم ده لانه تقريبا ملغى فى عربيات كتير

ابعد الخرطوم عن عوامه البنزين لانه ساعات بتخبط فيه وتدى قراءه غير دقيقه

تحياتى وكل عام وانتم بخير