الموضوع: بخصوص نقل ملكية و تجديد رخصة سيارة ملاكي جيزة (وانا من دمياط!!!)

العربية كانت مرور بين السرايات و المفروض انقلها العجوزة

- تروح المرور اللي انت تبعه دلوقتي تجيب شهادة براءة ذمة و لة عليك مخالفات تتظلم او تدفعها على طول
- لو الرخصة سارية يبقى انت كدا مش عايز حاجة من المرور دا - لو منتهية هتجيب شهادة بيانات
- تروح مرور العجوزة و تركن على قد ماتقدر قريب لان انت هتجيب ورق من الخزينة و هتدخل تفحص على طول
- تروح الخزينة تطلب من ورق فحص و طفاية ب 15 جنية
- ترجع تاخد العربية و تدخل تفحص (لو مش معاك طفاية اشتري قبل ماتدخل ) - العسكري هيشوف اللي على البوابة هيشوف ورق الفحص و الرخصة.
- هتروح الاول تاخد تأشيرة الظابط على الورق و بعدين في راجل عجوز دمة خفيف كدا هياخد رقم الشاسية و الموتور على الورق اللي معاك وواحد تاني هيشوف الطفاية و هيكتب عليها كلام غريب مش عارف معناه ايه و بعدين هتدي الورق كلة لمهندس قاعد على تربيزة صغيرة هيقلك طلع العربية برة و تعال خد الورق - هترجع هتلاقي الورق خلص هتمضيه من الظابط و يبقى انت خلصت الفحص وهو ساري لمدة 3 سنين
- هتشتري دوسية كرتون ب 1 جنية من كشك تصوير الورق اللي جنب مكان الفحص وهتصور بطاقتك و الرخصة و عقد الملكية صورتين
- عربيتك 1500 سي سي يعني نفس فئة عربيتي و انا رخصت سنتين- انا دفعت اول سنة ب 235 و تاني سنة ب 225 و بصراحة مش عارف التالتة بكام بس قول هتبقى زي التانية مثلا
- على حسب انت هتجدد كام سنة روح مكتب البريد اللي جنب مكان الفحص هات نموذج كمبيوتر بعدد سنين الترخيص و النموذج الواحد ب 8 جنية
- هتروح شركة التأمين و برضة هتدفع على حسب عدد سنين التأمين - انا امنت مع الاهلية السنة ب 80 جنية و هايخد صورة الرخصة (في شركة مصر بس مش عارف كانت بكام)
- كدا الدوسية الكرتون فيه (براءة الذمة - استمارتين فحص و فحص الطفاية - نماذج كمبيوتر - استمارة التأمين الإجباري - عقد الملكية - الرخصة - صورة بطاقتك ) و هتروح شباك 18 بتاع تجديد الرخص و نقل الملكية
- هيكتبلك ورقة فيها المبلغ الإجمالي المستحق و هيقولك تجيب دمغلت تجديد من الخزينة و الدمغة ب 5 جنية للسنة الواحدة
- هتدفع و هترجع لشباك 18 تديلوا الوصل و هيديلك ورق الفحص ترزح مخزن النمر تجيب نمرة - هتروح مخزن النمر الراجل هيكتبلك النمرة الجديدة على الورق - هتاخده و ترجع شباك 18 و تشوف بقا لو حاجة ناقصة كدا ولا كدا - لو تمام هتقعد تنتظر 30 دقيقة تقريبا لحد مايجهزوا الرخصة
- في النص ساعة دي روح فك نمرتك القديمة و خليها في ايدك
- هينده عليك و يديلك الرخصة ورق قبل التغليف و هيقولك صورها صورتين و هات صورة البطاقة - قبل ماتصورها راجع بيانات رقم الشاسية و الموتور و عدد سنين الترخيص لاني اكتشف فيها غلطات و رجعتها تلات مرات
- هترجعلوا بالصور هيديلك ورقتين تستلم بيها النمر الجديدة و تسلم بيها النمر القديمة و دا من مخزن اللوح - هتستلم و تسلم و ترجع تديلوا الورقتين بعد ما موظف اللوح ختم عليهم
- هتستنا ربع ساعة و تستلم الرخصة
- هتروح تركب النمر

*** المفروض توقع على عقد البيع قدام الموظف و لو موقع قبل كدا و فات على تاريخ التوقيع شهر المفروض يدفعك ضريبة الشهر العقاري تاني بس طبعا العشرين جنية اللذيذة هتحل المشكلة
*** انا رخصت يوم 4-11 و سمعت من يوم 5-11 ان اللوح الجديدة هتتطبق و المفروض تدفع 100 جنية زيادة فرق اللوح
*** وحدة المرور هناك بدائية الى حد ما مش زي مرور النزهة او مدينة نصر بس ممكن تخلص ان شاء الله في تلات ساعات

اسف على الأطالة و الرغي