وظيفة في إدارة مبيعات شركة عقارية كبرى ...... رأيكم ؟؟

**Mahmoud Naguib** · 24-12-2014 02:50 AM

أنا جتلي وظيفة فى إدارة مبيعات شركة عقارية كبيرة ومشهورة

مدير الفرع كلمني عن شغلي وقالي باختصار إني هبقى موجود ف الإدارة واللي شغالين ماركيتنج بيجيبولي ناس بحاول أكلمهم عن مميزات الشركة والمزايا اللي بتقدمها والأسعار وكدة
ولو العميل اشترى بقيمة مليون جنبيه باخد 10000 جنيه يعني 1% ولو اشترى بأقل من كدة بيفضل ف حسابي لحد ما بكمل المليون وباخد نسبتي

النسبة دي بتاخد راحتك فيها عادي ممكن تعملها ف شهر أو 2 أو 5 وممكن تعملها مرتين ف شهر !!

المشكلة ان مفيش راتب ثابت يعني هو بيبقى معتمد على النسبة فقط !!

قدامي فرصة أجرب ولو معجبنيش الحوار عادي ممكن أمشي ومدير الفرع كمان قالي حتى لو قعدت فترة وحبيت تمشي أنا هديك نسبة اللي بعته حتى لو موصلش المليون !!

طيب لحد هنا كويسناس كتير هتقولي جرب بس في منشكلة ؟
أنا هضطر أسكن جنب الشركة علشان بيني وبينها سفر وأكل وشرب يعني ف الشهر مصاريف مش أقل من 1000 جنيه !!

أنا بفكر أجرب شهر أو أقل حتى وأجرب حظي ولو الموضوع مشي معايا أكمل ولو ممشيش خلاص أمشي عادي بس مش عارف آخد قرار نهائي

أنا لجئتلكم علشان بعتبركم أسرتي التانية واللي بثق جدا في كلامهم ياريت تفيدوني أعمل إي ؟؟

ياريت الللي يقرأ الموضوع يشارك مش يكتفي بالقراءة علشان يكون في مجال للمناقشة

**أبو آسر** · 24-12-2014 03:21 AM

طبعا التجربة أفضل حل علشان تقدر تاخد القرار الصحيح
بس موضوع نسبة بدون أي مرتب ده موضوع مريب لأن معنى كده ان مفيش وظيفة بالمعنى المعروف يعني تحت رحمتهم ورحمة السوق نفسه لو السوق نايم ومفيش مبيعات ممكن تقعد شغال شهر كامل وتبذل كل ما في وسعك وفي الآخر بدون أي مقابل ! ده انت اللي هتصرف كمان من جيبك
وكذلك مسألة انك تبيع بمليون جنيه دي مش عملية سهلة وممكن تقعد شهور على ما تحصل المبلغ ده وبالتالي هتلاقي ممكن تلاقي الدخل ياريته يحصل حتى ألفين أو تلاتة شهريا وهيتصرفوا برده مصاريف انتقال وسكن وأكل وشرب وما شابه خاصة انك وضحت انك هتضطر تسكن قريب من الشركة يعني هتأجر شقة على حسابك واسمك شغال في شركة عقارات كبيرة وهما بيلهفوا الملايين وآسف بيرمولك ملاليم !
عموما جرب شهر وشوف النظام لو مستريح توكل على الله بس حاول تثبت نفسك بعقد عمل وبأي مرتب حتى لو قليل
وربنا يوفقك

**Mahmoud Naguib** · 24-12-2014 03:51 AM

هو باين قالي في أول شهرين نسبة بس وبعد كدة مش فاكر قالي ليا قبض ولآ لآ !!

لو كان ليا قبض بس بعد شهرين م الشغل هيبقى كويس ولآ إي ؟؟

**ehabouf** · 24-12-2014 06:17 AM

لو تايم شير او بيع وحدات في اي منتجعات اخلع
لو مباني سكنية او حتى وحدات تجارية اتوكل على الله وجرب شهر مش حاتخسر حاجة

**حسام الغرباوي** · 24-12-2014 07:57 AM

اي مبيعات لازم يكون في راتب حتى لو قليل ( اللي هي تغطية مصاريفك علي الاقل )

**canner** · 24-12-2014 08:26 AM

فى الشركات المحترمة بيدوا دخل ثابت عبارة هن مبلغ و نسبة من المبيعات حوالى 2% بتاخدهم مرة واحدة كل سنة و غالبا كل شركة بتبقى عارفه بتبيع بكام كل سنة فالراجل فى المقابلة ح تلاقية بيقولك المرتب تقريبا كله على بعضه كام كل شهر
على العموم لو انت مش شغال شغلانة تانية توكل على الله بس خللى بالك و انت بتمضى على اى حاجة هناك