خلال الشهر الماضي وبعد حضوري لايفنت يخص احد منتجات السيارات تلقيت عرض لتجربه احد السيارات والتي حققت مبيعات عاليه خلال الفتره الماضيه
ولكن ظهرت بها العديد المشاكل الفنيه القاتله
مما دعا كثير من اعضاء المنتدي للكتابه عن سوء تلك السياره وانتقاد توكيلها (احد اباطره الاقتصاد المصري)
العرض يتمثل في ترك السياره معي فتره وكتابه تقرير عن ادائها
الي هنا والعرض تمام
لكن اللي مش تمام نزول حمله اعلانيه ضخمه برقم محترم والعاملين بمجال الاعلام والاعلان يعرفوا اننا في اخر السنه ومفيش ميزانيه تغطي الحملات الكبيره
واللي مش تمام اكتر ان يكلمني احد مديرين التسويق بالتوكيل ويقولي نايل موتورز كبير ومحتواه ضخم واللي بيدور علي السياره دي علي الانترنت ورفيوهات المالكين لها بيطلع كلام سيئ جدا عنها في مواضيع علي المنتدي فلو مش هاينفع نشيل الكلام ده
يبقي نخفف حده الكلام ونعدل بعض المواضيع ومش هاتكون مبسوط يا مستر كريم نضرب الاقتصاد المصري ونشوه سمعه رجال اقتصاد وبلا بلا بلا ...
طبعا ردي كان قاسي جدا عليه وعرفته ان ارواح الناس ونقطه دم واحده اغلى الف مره من كلامه الخايب ده
وان اموال الناس ومصالحها اهم عندي بكتير
وان نايل موتورز كانت اولى اهتمامته من اول ما بدء من ثمان سنوات انه يرفع مستوى الوعي بثقافه السيارات
ويحارب ثقافه المحتوي المدفوع للسيارات اللي كان سائد في ٢٠٠٦ و ٢٠٠٧ وخلى كتير من المصريين يدفعو فلوس في توابيت متحركه ابتداء من السياره ( ماريو ) مرورا بال (هافي لوبو) وال (نوبل) وال (كومودو) وغيرها من اكوام الخرده المتحركه في شوارع مصر
ودلوقتي بعد سبع سنوات مفيش تواجد فعلي للسيارات دي في الشارع المصري ولو موجوده فهي اشبه ب زومبي او اسطوره الموتى الاحياء
لم ينتهي الموضوع هنا وخلال احد الحفلات الكبيره لقتني قاعد مع الرجل الثالث بالتوكيل ممن لهم كلمه مسموعه بسوق السيارات المصري
واتكلم عن نفس الموضوع وطلب مني ننفذ بقي مع وعد بحمله اكبر في 2015
مع الاحراج وعدته بالتفكير
وخلال ذلك الوقت تلقيت عرض برفع المبلغ للحمله لرقم محترم من الوكاله الاعلانيه الخاصه بالتوكيل رغم ان ده لا يجوز قانونا لاني ماضي عقد مع وكيل اعلاني حصري محترم جدا (برومو ميديا) مع تلميح بمبلغ خاص ليا !!!!
كل ده خلاني اصمم علي الرفض بعد اعاده التفكير بحاجات تانيه منها ارواح الناس وحسابات ( الاخره ) ومصداقيه اسمي واسم نايل موتورز
وكان الجواب بالرفض النهائي
كلمه اخيره ليك يا مدير المبيعات
اتقو الله
ملحوظه :
رجاء عدم تخمين اسم الماركه والتوكيل لعدم الدخول تحت بند التشهير دون ادله
وعذرا للاطاله والكتابه بالعاميه فالمقال اشبه بفضفضه دفعني اليها رؤيه العديد من الحوادث البشعه لتلك السياره خلال ايام قليله
خالص تحياتي



تعديل للبوست :
سيتم حذف اي تعليق يحتوي علي اسم اي توكيل او اسم ماركه او اسم موديل
لان ذلك يدخل تحت بند التشهير دون ادله ويعرضنا للمسائله القانونيه
نايل موتورز تحترم وتلتزم بالقانون المصري للنشر

https://www.facebook.com/karim.monir...53489148184129