باختصار
أنا كنت من محبى شركة توشيبا العربى ( لما كنت عبيط )
تقريبا كل الاجهزة عندى توشيبا العربى ثلاجة - مروحة - تليفزيون - شفاط - فاية .. الخ
الى أن اكتشفت انى اكلت اكبر مقلب فى حياتى
الشركة اصبحت فاشلة إلى اقصى درجة
بقالى اربع ايام الثلاجة بايظة
عملت بلاغ من اول يوم
قالى بكرة فنى الصيانة هيكون عند حضرتك من 10 الى 5
اليوم الاول
المدام متواجدة فى البيت وأنا على التليفون طول النهار
الساعة 3 اتصال بخدمة العملاء إن محدش جه
قالى - بصوت هادىء ومؤدب جدا - الساعة مجتش 5
حتى الساعة الخامسة
لا اتصال ولا حس ولا خير اتصال ولا حس ولا خير
اتصل بخدمة العملاء 19319
متأسفين بكرة أن شاء الله من الساعة 10 الى 5
اليوم الثانى
نفس اليوم الاول
محدش جه
اتصال قبل خمسة يقولولى - هو برضه تقريبا خدمة العملاء رجالة بس وده عيب تانى بس الواحد مش فاضي له دلوقتى - لسه ما جتش خمسة حضرتك إن شاء الله هيكون عندك الفنى
اتصال ثانى بعد الساعة خمسة يقولى بكرة الفنى هيكون عندك من 10 الى 5
طلبت عمل شكوى عملوها عادى
اليوم الثالث
نفس اليوم الاول بالظبط
مربطوين فى البيت لدرجة المدام عاوزة تعمل تحليل صايم الصبح نزلت جرى ورجعت عشان الصيانة وكانت بتفكر ما تنزلش قولتلها انزلى دول عالم نايمين فى مية البطيخ ومحدش هيجى اساسا
فعلا محدش جه ولا اتصل
اتصال قبل خمسة والرد محفوظ طعبا " هيكون الفنى عندك قبل الساعة خمسة "
الاتصال الثانى بعد الساعة خمسة الرد " بكرة إن شاء لله سعادة الفنى هيشرفك ويعلى من قدرك بزيارته الميمونة من 10 الى 5 "
طيب لو سمحت أنا عاوز اكلم مسؤل تنفيذى
يحولولى على اخ محترم قولته قولى اسم حضرتك عشان لما اتصل اطلب تحويلى ليك وتلتزم قدامى بالكلام الى هتقوله قالى اسمى فلان الفلانى من الشكاوى
المفاجاءة الى ابهرتنى أنه يبشرنى إن بكرة إن شاء الله هيكون الفنى عندى من الساعة 10 إلى الساعة 5 ( أه والله العظيم نفس الرد زمبقولك كده )
قلتله الف شكر وقفلت السكة بعد ما طمنى بنفس الرد إن بكره بكرة إن شاء الله محدش هيجى
الكلام ده من ساعتين
حد عنده حل من صنايعى محترم لأنه أكيد مهما الصنايعية على درجة من السوء مستحيل توصل للدرجة ديه
قرار بعد كده مش هشترى من الشركة ديه حاجة ولو - لا مؤاخذه - شربات مش اجهزة
ملحوظة هامة : مفيش لبن بخيره خالى الدسم
ا
المفضلات