الحركة دي انقذتني النهاردة و حبيت اشاركها معاكو
الحركة دي انقذتني النهاردة و حبيت اشاركها معاكو
و انا خارج من مطار القاهرة متوجه للمريوطة و قبل دخلة التجمع الخامس بحوالي 4 دقايق لاحظت سخونية جامدة جدا في العربية و مش راضية تنزل حتى و المروحة شغالة على طول .. انا مصبرتش عليها و نزلت فتحت الكبوت لقيت غطاء اربة المية شبه مفتوح و المية تقريبا معظمها اتبخر ..
*** أوعى تفتح او تشيل غطا الاربة و العربية سخنة .. الاربة جواها مية متبخرة تحت ضغط عالي و درجة حرارة فوق الـ 100 درجة مئوية ( Steam) هينفجر في وشك و هيسببلك حروق جامدة جدا ***
قفلت الغطاء كويس بعد ما العربية هديت شوية و كملت في طريقي على امل اني الاقي مكان اجيب منه مية و بدعي ربنا الطريق ميوقفش عشان العربية متسخنش زيادة .. لكن العربية سخنت تاني و هنا بقى الحركة اللي عايز اقولهالكو لما العربية تسخن
هي معلومة كنت قريتها مرة في منتدى نايل موتورز و يمكن ميكونش حد عارفها , لما العربية تسخن منك شغل التكييف على السخن و افتح البوابات .. صحيح هتبقى قاعد في فرن بس هتحس بالفرق في سخونية العربية ..
ممكن الحركة البسيطة دي تنقذلك العربية من السخونية الزايدة لحد ما توصل لمكان تقدر تشوف فيه مشكلة عربيتك ايه
تصبحوا على خير ^_^