شكراً جزيلاً
عرض للطباعة
انا معايا العربيه ...2015 سنترا هايلاين ..العربيه ادائها الحمد لله فوق الممتاز,,تقفيلها عالي جدا جدا..موتور فايق وفيتيس كانه مش موجود متماشي مع اداء العربيه..عفشه نعمه جدا وثبات ممتاز رغم ارتفاع العربيه..اتساع داخلي مرضي جدا عائلي جدا..وتكييف "ابو بكر" حدث ولا حرج..والله لو عملوه بمنافله بس يديني الاداء ده مع حجم العربيه حبوس ايدي وش وضهر..فتحات التكييف الخلفيه مزوده قيمه العربيه ..كماليات العربيه مرضيه جدا ومجهزه بسماعه ومايك البلوتوث والديفيدي حيتوفر الشهر اللي جاي ان شاء الله وفيه البلوتوث.اي سؤال تاني تحت امركم
عندي بعض إلإستفسارات يا دكتور إسلام لو سمحت:
1- أخبار عزل العربيه إيه ؟ هل فعلا صوت الماتور عالي و بتسمعه داخل الكابينه علي السرعات العاليه ؟
2- كإستخدام داخل المدينه - الفتيس ال cvt أخباره إيه ؟
3- أسعار قطع غيارها و هل التوكيل بيوفرها ؟
انا كنت بفكر في الشارك لكن إخترت أروح للسينترا علشان: وسع الصالون و الشنطه و نضافة التقفيل و اتمني عزل الصوت يكون كويس بس مش عارف ده متحقق و لا لأ. , , لا الفرق بينها و بين الشارك مش كبير ؟
شكرا جزيلا مقدما
العزل نقطه مهمه في اي عربيه.الموتور ده ناعم جدا لكن اللي لاحظته انهم مهتمين بالعزل قوي قوي خاصه ان كان معايا كروز ٢٠١٤ وده معناه ان العسنترا عزلها جبار وافتح وشوف بنفسك الشنطه والموتور.البلاستيك الرخيص مش موجود في سنترا والبلاستيك المحترم مش كتير.صوت الموتور غير مسموع داخل الكابينه والفيتيس لو بتستخدمه عادي مش حتحس بنقلاته لكن لما بتدوس زرار ال sport العربيه بتبقى حاجه تانيه عشان تشد بيها براحتك.الكاسيت فيه فتحه aux وعندي ست سماعات صوت ممتاز ممتاز وحركب الديفيدي ان شاء الله في صيانه ال ١٠٠٠ معرفش حيبقى الصوت ايه وفيها سماعه البلوتوث والمايك جاهزين.وسالت عن قطع الغيار متوفره واسعارها زي التيدا لان المفروض السنترا حتتقفل في مصر بعد كده حيبان متهيالي في اوتوماك.انا زيك كنت رايح للشاركلكن الشنطه فرقت كتير وفتحات التكييف الخلفيه اساسيه في اي عربيه صالونها واسع.اما عن نضافه التقفيل اقعد في العربيتين وفي لمح البصر حتدرك الفرق (الهائل ). العربيه وصفها يختصر في عربيه ياباني موتور وتقفيل عالي وعائليه بامتياز وناعمه وطريه وعفشتها جميله وبس.
- شكرا د.إسلام علي الرد الوافي - انا برضه كنت رايح للكروز و كون عزل السينترا يرضي حضرتك بعد إمتلاكك للكروز فده شئ كويس - السينترا كان ينقصها تنزل بالشكل الداخلي اللي بتنزل بيه في الخليج لأن كان هيديها قيمه و شكل داخلي جميل و ما عدا ذلك فهي عربيه محترمه و يكفي إن عيبها فقر التابلوه الداخلي فقط - حضرتك ما فكرتش في السيات توليدو لأنها في نفس الفئه السعريه ؟
دعواتك لأني هاروح أعمل تيتس درايف إن شاء الله - و ناوي علي ألأبيض اللؤلؤي - أي نصائح بخصوص إلإستلام ؟
ربنا يوفقك للاصلح .انا معايا النبيتي الهايلاين استلمتها من المصريه وشيكت على النور والزجاج وكله.العربيه حتلاقي على الزجاج شعار pdi يعني تستلم ساعتها وانتا مطمن ان شاء الله وانا تحت امرك بخصوص اي استفسار مستقبلي
شكرا د.إسلام - دعواتك.
انا روحت عاينة العربيه النهارده و لقيت عندهم قائمه بالأكسسوارات دي بتركب مع العربيه
جهاز إنذار 1100
وحدة رفع زجاج 1100
فرش داخلي 2200
غطاء خارجي للسياره 440
اضاءه زينون للنور العالي 1100
اضاءه زينون للنور المنخفض 1100
اضاءة زينون للشبوره 1100
جهاز dvd + GPS + بلوتوث + كاميرا خلفيه 6600 و عليه تخفيض و بيركب ب 5000 - سألتهم عن نوعه ما عرفوش
جهاز تحكم 2500
شاحن متعدد ببطاريه (للموبايل + لابتوب) 990
شاشات خلفيه 7 بوصه 2200
وحدة فصل للمحرك 550
و فيه تركيب باكتات برضه لكن مش فاكر سعرها
المغري بالنسبه ليه: جهاز إلإنذار و ال dvd - و كله مغري و بينقل العربيه لفئة ال top line
حضرتك لو عاوز الجهاز ده هتلاقيه بيتباع عند بتوع الكماليات وارخص من ده بكتير جدا في حدود 1800 لغاية 3500
وانا اشتريت واحد من بره من سنة بعد الجمارك والحوارات دي كلفني 4150 بس ما شاء الله عليه ممتاز جداً وكان المفروض في اوبشن زيادة كمان انه في واي فاي وبيشغل نت بس البائع بعتلي الجهاز اللي معايا بالغلط ومفهوش الواي فاي