العفشه ناعمه وطريه وقويه مش ناشفه
عرض للطباعة
العفشه ناعمه وطريه وقويه مش ناشفه
أخبار اللی اشتروا سنترا بعد التجربه ايه لانی كنت بدور علی فانتازيا 2010 هاي لاين ولم أجد سياره حالتها كويسه فقررت أجيب زيرو ولفت انتباهی اوی سنترا بس خايف ارجع أندم لانی بهتم اوی بالثبات ومعدلات الأمان ولذلك انا محتار
انا قرأت الموضوع يعني تنصحونی اتوكل علی الله واجيب سنترا
توكل على الله احسن عربيه في فئتها فيها الميزتين اللي مجتمعين لعربيه عائليه : شنطه واسعه و كراسي خلفيه براح هائل
تقرير رائع
دكتور لو سمحت متقلش ان قطع غيار العربية متوفرة انا عايزك تقولى مركز واحد فى مصر فى حاجة للسنترا والنبى بلاش كلام بدون علم انا لحد دلوقتى مافيش اشاية ليها فى التوكيل و طبعا انت عارف الموضوع اللى انا عملتة و انت علقت علية و ياريت لو حضرتك تعرف قطع الغيار فى انه توكيل تقولى ضرورى لو سمحت و عايز اقولك حاجة انا بركب نيسان بقالى سنين عشان متقلش انى بهاجم العربية ماشى
تقرير مختصر ومفيد
جزاك الله كل خير
جزاك الله خيرا، وإن شاء الله تنتشر وتاخد حقها ومكانتها اللي تستحقها في مصر زي باقي العالم.
مفيش حد اتكلم علي بلد الصنع
كنت عايز اعرف منشائها اي بلد
العربيية ممتازة معايا بقالها اكتر من شهرين و عملت تقرير هنا في المنتدي
http://www.nilemotors.net/Nile/471348-2015-3500-a.html
وأخيرا - ولله الحمد والمنّة والنعمة والفضل - انضممت إليكم في قيام نيسان بعد شرائي وترخيصي لسيارة نيسان سنترا منذ يومين بالتحديد.. إيه مفيش مبروك؟!
العربيه مكتوب عليها صنع فى تايلاند
لسه جديده وماانتشرتش وفعلا نازله فى فئه سعريه صعبه
162000 يجيبوا لانسر شارك كامله عربيه يابانى ومعروفه وسعر اعاده بيع ممتاز
يجيبوا اوكتافيا 2012 كامله
يجيبوا كرولا 2015 وتقسط ال 18 الف الباقيين
يجيبوا هوندا سيتى 2015 وتقسط ال 10 الباقيين
مع احترامي لرأي حضرتك، الكلام ده كان لما كانت نازلة ب 170 ألف في الأول، إنما دلوقتي السعر ده ممتاز، وخصوصا إن في فئتين واحدة ب 150 والتانية ب 160ألف فيها كماليات كثيرة وجميلة، وعلى فكرة أخويا معاه شارك 2015 زيرو، اشتراها قبلي بحوالي شهر، والله عربيتي أحسن من عربيته في كل حاجة ما عدا التكييف لأن عربيته خليجي.. وسع الصالون وكبر الشنطة والكماليات والعزل والشكل والفتيس وكل حاجة في السنترا أحسن من الشارك ما عدا التكييف زي ما قولت قبل كده، وعلى فكرة السيتي بتتقفل في تايلاند والكورولا بتتقفل في تركيا، والاثنين غاليين بزيادة، أما المستعمل حتى ولو كان أوكتافيا فملوش لازمة حاليا في ظل الغش والنصب وغلاء الأسعار الغير مبرر ولا منطقي.. والله أعلم.
ولكم في النيسان ليفان والبلوبيرد عبره عظه
يعني انتشارها الضعيف سبب الكلام بتاع ابو يحيي
فعلا البلوبيرد والليفان وقعوا في مصر
الغريبه ان عربيه زي الصني الجديده بالرغم من كل مايقال عن عيوبها
وطنابير وتيل وعربيه خفيفه وصاج ورق وكمان هندي مش ياباني تجميع مصري
عامله مبيعات خرافيه
عكس السنترا اللي مفيش مقارنه بينهم
مبيعاتها ضعيفه
ابو يحي حاول يثبت وجهه نظر منجحتش.العربيه انتشرت انتشار كويس وقرب الستوك يخلص.ومافيش سنترا تايلندي حتيجي بعد كده.من اكتوبر حتتباع المحلي اللي خدت موافقه على الانتاج وحتطلع من قبل اكتوبر للحجز.العربيه الاولى اتجمعت وخدت موافقه من اليابانيين خلاص.مبروك للي اشترى واللي حيشتري لحد ما الاستوك يخلص.السنترا قطع غيارها وانصاص داخله الحرفيين بعد العيد.الحمد لله بعد ٦ شهور استخدام العربيه افضل عربيه في فئتها السعريه والفئه اللي بعدها وتكييفها وعفشتها ونعومتها معديه كل العربيات اللي تتقارن بيها.اي حد هنا يقدر يشرفنا على جروب nissan sentra owners egypt
ربنا يبارك للي اشتراها طبعا مفيش كلام
لاكن انا بوضح تاريخ اسود لتوكيل كل همه مكاسبه وخلاص
مفيش اي ضمانه انك تشوف موديل 2016 او 2017
ده حتي الوكيل مجبش منها قطع غيار عشان مكنش مصدق انه حيعرف يبعها
الناس ذاكرتها سمكه فلازم افكرها عشان اللي ياخد قرار يعرف كل العوامل المرتبطة بيه
عربيه ذي التيدا عمري ما قولت محدش يشتريها علي العكس
عربيه محترمه ومستمره في السوق من فتره
لاكن انا عارف ان اغلبنا العربيه بالنسبه ليه راس مال احتياطي للطوارئ
واعاده البيع عامل مهم في قرار شراء اي عربيه
اقوم ادلس عليه ومقلوش خد بالك ده التوكيل كان ليه سوابق ان جاب شروه جه نصب بيها علي ناس هنا وسبهم .
بصراحه انا مقبلش كده
لا يا ابو يحي عداك العيب بس قوله خد بالك ان السنترا مش عربيه والسلام ده تاريخ قديم قوي...السنترا b17 اعرف تاريخها كعربيه وبعدين اتكلم عن اي حاجه تانيه..وجهه نظر معلش منقوصه ومبنيه على جزء من تاريخ اغفل ال n16 ومسك في عربيات تانيه وياما قلت لحضرتك مينفعش تقارن دي بدي زي ما ينفعش تقارن الكروز بالسونيك والاوبترا القديمه بالجديده.وبعدين انا معايا الموضوع لاخره.الاخ العزيز اللي اتكلم عن عدم توافر قطع الغيار في التوكيل معانا في الجروب وبقينا اصحاب وصلته قطع الغيار الاصليه من التوكيل بعد اسبوعين تلاته باسعار تقل ب ٣٠ او ٤٠ في الميه عن اي اسعار قطع غيار اصليه لاي عربيه في فئتها.اما عن اسعار السنترا التجميع المحلي مش حتقل كتير عن سعرها الحالي ١٦٠ الف للهايلاين بسبب ان كمالياتها حتزيد كتير.وطبعا حضرتك عارف رغم ما يقال عن الصني ال n17 سوقها عامل ازاي
حننتظر ونشوف واتمني انها تكون اضافه للسوق
سعرا وقيمه
الجروب يا جماعة هو
www.facebook.com/groups/nissan.sentra.owners
أنا رأيي ان السنترا أفضل عربية في فئتها السعرية و ان شاء الله تنتشر جامد الفترة اللي جاية
ممكن اعرف ايه اسعار الفئتين والفرق بينهم وهل 2016 هتكون اغلي ولا ارخص
البيزلاين سعرها 143 والهايلاين 160 ...ان وجدوا
مش حتلاقي كل الالوان اللي حضرتك عايزها
الهايلاين موجود فيه حاجات مش في البيز لاين زي : ليدات امامي وخلفي...دخول بدون مفتاح وستارت انجين ..4 سماعات ..جنوط سبور ...عدادات رياضيه ..سبويلر خلفي فيه ستوب "في البيزلاين مافيش سبويلر بس فيه ستوب" ..كاوتش بريدجستون "البيزلاين دانلوب"..اشارات في المرايات --باركينج سنسور
دي الفروقات الجوهريه
الاتنين فيهم 2 ايرباج وabs-ebd-ba
الستوك فعلا قارب على النفاذ وغالبا الدفعه اللي جايه حتكون الانتاج المحلي اللي حيقل شويه في السعر عن دلوقتي لكن حيبقى فيه اوبشنز زياده "بلوتوث - تكييف تاتش -- مرايات ضم "
في كل الاحول لو نزلت دفعه تانيه مستورده حتبقى اغلى طبعا ...المصري غالبا حتبقى اعلى في الاوبشنز وعلى فكره 100% تكييف تاتش وغالبا بلوتوث ومرايات ضم زي ما وضحت لكن مش حتبقى عربيه وحشه اطلاقا وغالبا حتكون افضل عربيه نيسان اتجمعت في مصر والكلام ده من جوه المصنع فممكن تستنى مش حتخسر حاجه كل الامور حتبان كمان شهر ان شاء الله
متابع يا جماعه للاهميه طبعا
متابع و اتمنى تقفل المصري يكون كويس حتى لا يؤثر على سمعة السيارة