السؤال عن مرتبك او محوشة كام ده غير مقبول و خصوصا لو الرجل هو اللي بيسأل . اهل العروسة لو هم اللي سألوا عن مرتب العريس رغم ان مش في كل الحالات الاهل بتسأل الا انه ممكن يكون مقبول لانهم مش هيطمعوا في مرتبه لانه طبيعي هو اللي بيصرف علي البيت لكن ممكن بيطمئنوا علي انه ممكن يفتح بيت او لا. لكن العكس غريب خصوصا انه صالونات. لو افترضنا حسن النية يبقي السؤال(انتي بتحوشي من مرتبك و لا لا؟) كده ممكن عايز يعرف انتي مدبرة و هتعرفي تمسكي ميزانية البيت و لا مسرفة . لكن الله اعلم بنيته.دي مشكلة الصالونات. انتي مش عارفاه اصلا و محتارة هو قصده ايه.بس سؤاله محوشة كام ده يغيظ ايا كانت النية.
مرتبك مهم لكي يكون لك ذمة مالية مستقلة.طبعا الزوج هو المسئول عن الصرف علي البيت و لازم تنظموا انكم تعيشوا بمرتبه فقط . كدة أأمن و أفضل.لكن الواقع ان مرتب الزوجة المصرية كله للبيت و الاولاد.لكن المشكلة ان الزوجة لو بتشتغل في الحكومة ممكن تاخذ اجازة رعاية طفل و تدفع تأمينات و مرتبها ينقطع فبالتالي نرجع لمرتب الزوج فقط. و لو بتشتغل في قطاع خاص مع اول طفل هتوديه حضانة غالية عشان تعوض غيابها عنه ، يعني هتخسر جزء كبير من مرتبها في مقابل انها تحافظ علي شغلها علي الاقل حتي يدخل الطفل المدرسة و احيانا اخري الزوجة تضطر للاستقالة.يعني في جميع الاحوال مرتبها غير مستقر و لا يمكن الاعتماد عليه تماما لكن هو في الاخر بيتصرف في البيت برده.خطيب حضرتك لازم تفهميه ان مالك ليس من حقه الاضطلاع عليه و الموضوع ليس له علاقة بالثقة. دي حتي لسه خطوبة و برده افهمي منه مغزي السؤال و الافضل تاخدي رأي والدك.صلي استخارة و ادعي ربنا يوفقك للصالح.
المفضلات