اخيرا المرور والشعار الجديد (الصياعه ادب )
بسم الله الرحمن الرحيم
السلام عليكم ورحمه الله
اولا العنوان للموضوع غريب شويه لكن مش لاقي تعبير يرد الصاع صاعين لكل محتال وفهلوي ويفخر وسط مجتمعه بأنه صايع .
المشاكل في الفتره الاخيره كانت بتتلخص في حدوث بعض المصائب للبعض او ربما سمع عنها .
فلان اشتري سياره وطلعت مسروقه
فلان اشتري سياره واتسرقت وبالصدفه شفها والعربيه طلعت مترخصه تاني ؟؟؟
فلان اشتري عربيه تحفه بسعر خرافي وطلعت نصين
المرور في الاجراءات الاخيره حل المشاكل دي حل جذري
نبدأ بالسياره المسروقه
حضرتك لو نزلت تشتري سياره مستعمله بتعمل عقد مسجل او توكيل بالبيع للنفس او الغير وطبعا الكلام ده من الشهر العقاري والشهر العقاري بيعملك الاجراءات دي لو شاف شهاده بيانات للسياره في حاله انتهاء الرخصه او الرخصه ساريه مع بطاقه تحقيق الشخصيه للبائع .وبتروح ترخص لو القدر بعتك لنفس المرور الي فيه ملف السياره حتعرف ان العربيه مسروقه وفلوسك تروح عليك .اما لو بترخص في مرور تاني تخيل انها حتعدي المرور بيعملك تصريح لمده سنه لحين ورود الملف والموضع يتعرف بعد سنه او يعدي بردو . الجديد بقي في الحاله دي المرور بيكتب علي السياره المبلغ بسرقتها علي الملف نفسه والجديد ايضا مع مطابقه بصمه الشاسيه للسياره هو اجراء فحص استعلام امني ببساطه المرور اللي بترخص فيه بيبعتك باوراق الترخص للمرور اللي السياره موجود الملف بتعها فيه وبيتعمل استعلام امني عن الابلاغ بالسرقه في جميع انحاء الجمهوريه (خمس دقائق) وبيختم ان السياره غير مبلغ بسرقتها +ختم ضابط المباحث . طبعا دي متعديش باي حال من الاحوال الابفساد اداره المباحث كلها او يكون معاك اختام ضباط كل ضباط مباحث المرور
. طبعا البائع الي باع العربيه بيكون في الغالب مزور الرقم القومي ففلوسك حتروح عليك ومش حيتجاب لكن جاري العمل على الموضوع ده بربط الاحوال المدنيه بالشهر العقاري لعمل الاستعلام الفوري عن صاحب البطاقه
اما في حاله سرقه سيارتك انت
ثق تمام الثقه انها حترجع لو هي داخل مصر للاسباب السابقه او حيتقفش برخصه مضروبه في اي كمين او منفذ . الاجراءات متعبة شوية لكن بتضمن عدم ترخيص السيارة المسروقة باي حال من الاحوال .
ندخل بقي على صفعة الفهلوه
طبعا كلنا نعرف قصة اشتري عربية حوادث من التأمين وانزل اشتري نفس العربية قطع غيار علي شكل ثلاث قطع او اربعة المشهورة (بالسياره النصين) وطبعا قطع رقم الشاسيه والمحرك وتركيبه على السيارة النصين ...تم القضاء على اللعبة دي بشكل نهائي لعبة الغش ان حد يضحك عليك ويبعلك عربية نصين على انها سليمه .لكن لو انت حتركب العربيه دي ومش حتبعها او لو حتبعها وحتعرف المشتري انها نصين مفيش مشاكل . لكن لو حتغش حد مش حتعرف لاشتراط المرور وجود صوره من شركه التأمين للسياره وتفاصيل الحادثه .طبعا بترفق في الملف وبالاضافه الي شويه تعقيد في صوره ازاله الطلاء عن بعض الاجزاء من السياره لبيان انها نفس السياره الي عملت حادثه مش واحده نصين .هي تعدي لكن حتكلفك فلوس كتير عشان تعمل عربيه نصين بلون ووصف السياره الحادثه . واضافه اخيره حتمشي بتصريح وتفضل تجدد . واخيرا تم اغلاق الباب ده بشكل نهائي بالتنسيق مع وزاره التجاره والتموين والمنافذ الجمركيه وتم منع استيراد السيارت المقطعه يعني الربع والنص يقدر يستورد السياره كلها لكن متقطعه رفرف كابوت شنطه من غير قوائم والمحرك المحمول علي القنطره فقط . وكده المرور فعلا يكون حل مشاكل ناس كتير اتنكد عليها وضاعت فلوسها .وربنا يعوضهم .
ارجو اني اكون عرفت اوضح على قدي لو حد عنده اضافه يتفضل منكم نستفيد بردو . وربنا يكرمكم وكل عام وانتم بخير . 31.12.2014