أولاً ألف مبروك وربنا يباركلك فيها ويكفيك شرها بإذن الله.
أنا حاكلمك على موضوع العربية الجديدة عامة مش على الكورولا بالذات وأكيد فيه أعضاء متخصصين فى الكورولا حايشاركوا وحتطلع بشوية معلومات مفيدة بإذن الله.
الموضوع بتاع العربيات الجديدة والمستخدم الجديد علشان نبسطه حنقسمه على مراحل :
مرحلة الإستلام:
- معاينة العربية كويس خارجياً يعنى تبص عليها وتمر حواليها من برة من الاجناب ومن الامام ومن الخلف علشان تتأكد إن مفيهاش أى خدوش أو إنبعاجات أو فرق لون وكمان تبص عليها من بعيد وانت واقف قدامها ووإنت واقف خلفها ومن الأجناب وكمان بزاوية علشان تلمح السوك بتاعتها.
- تفتح الأبواب وتقفلها بالراحة وتفتح برضه الشنطة والكبود وتقفلهم علشان تتأكد إن مافيش أكره معلقة او مفصلة عاوزة ظبط.
- تدخل العربية وتتأكد من سلامة التنجيد بتاع السقف وبتاع الكراسى وتقفيل الموكيت بتاع الأرضيات يكون كويس.
- تشوف العدة والإستبن بتوع العربية وكمان الكوريك.
- تفتح الكبود وتتأكد من مستوى السوائل فى العربية.
- حتركب العربية وتحط المفتاح فى الكونتاكت وتدور حتلاقى أنوار التحذير فى التابلوة المفروض تكون كلها مطفية ومافيش لمبة تحذير منورة غير لمبة الحزام ولمبة فرامل اليد بس.
- حتشغل الكاسيت وتسمع هل فيه صوت شوشرة لما بتعلى الكاسيت ولا لأ وتشغل محطة القران الكريم علشان تبقى أول حاجه إشتغلت فى العربية.
- حاتجرب حركة كرسى السائق أمام وخلف وأى حركات تانية ممكن تكون فى الكرسى ( فيه كراسى ٦ حركات وفيه كراسى ٨ حركات).
- حاتجرب المساحات والأنوار والإشارات ونور الفرامل علشان تتأكد إن مافيش لمبة محروقة وكمان تجرب التكييف.
- حاتربط الحزام وتشوف اللمبة بتاعة الحزام إللى فى التابلوة طفت ولا لأ ( فيه عربيات بيبقى حزام السائق والراكب الأمامى لازم يكونوا مربوطين علشان اللمبة تطفى)
- حاتدوس فرامل وتجيب الفتيس من الوضع P إلى الوضع R وبعدين للوضع N وتستنى شوية وبعدين الوضع D وبعدين ترجع للوضع P تانى وتشوف هل النقل بسلاسة ولا فيه عضه.
- حاتستلم منهم الكتالوجات بتوع العربية وكتيب الصيانة ويكون مكتوب على واحد منهم كود تشغيل الكاسيت علشان ساعات بتحتاجه وكمان حتسألهم على موعد أول صيانة بعم كام كيلومتر وإيه إللى حايتغير فى الصيانة دى.
مرحلة الإستخدام الأولى حتى موعد أول صيانة:
- حاتشترى طقم دواسات وده أول حاجه تعملها إن شاء الله.
- حاتروح تظبط الكاوتش على الضغط المكتوب فى الكتالوج او اللى مكتوب على باب السائق.
- حاتقرا شوية فى الكتالوج علشان تعرف أوبشنات العربية وطريقة إستخدام كل أوبشن وكمان تعليمات الصيانة وانواع الزيوت .
- حاتمشى بالعربية عادى زى أى عربية ولكن متجريش بيها ولاتزود السرعة عن ٩٠ إلى ١٠٠ كم/ساعة او حسب عداد الأر بى إم متزودش عن ٣٠٠٠ لفة/دقيقةلغاية ميعاد أول صيانة وبعد كده تمشى زى ما إنت عاوز.
- التكييف مش لازم قوى لأننا فى الشتا والجو مايعلم بيه إلا ربنا زى مانت شايف :)
- لو العربية فيها عداد حساب استهلاك البنزين هايجيبلك هسهس فى دماغك فى الأول طبعاً حتلاقى معدلات استهلاك خيالية لو وقفت فى إشارة وقت طويل شوية ماتحطش دماغك فيه الا لو انت ماشى على طريق سالك او طريق سفر.
حاتفول وتصفر العداد وتمشى شوية وبعدين تفول تانى وتشوف مشيت كام كيلو على التفويلة دى ويبقى ده معدل استهلاكك المختلط مابين وقوف ومشى .
- موضوع نوع الزيت إنت حاتلتزم بالنوع الموصى بيه من الوكيل علشان الضمان ( فيه توكيلات بترضى إنك تجيب زيت بنفس مواصفة الكتالوج بتاع العربية وهما يغيروه فى موعد الصيانة).
- مواعيد الصيانة حاتبقى مكتوبة فى كتالوج الصيانة.
مرحلة الإستخددام العادى:
- طبعاً موضوع غسيل العربية فى البنزينة والفاكيوم للموكيت عادى بس أوعى تفتح لهم الكبود علشان مايبهدلوش الكهربا اللى جوة كارتات وسويتشات والذى منه . ممكن تمسح بقماشة مبلوله أو يتنفخ بهوا بسيط.
- فى موعد الصيانة حاتلتزم بتغيير اللى مكتوب فى كتيب الصيانة.
- متحاولش تعدل أو تركب اى حاجه خارج التوكيل علشان متكسرش الضمان .
- موضوع مثبت السرعة بتستخدمه على سرعة معينة حتلاقيها فى الكتالوج ولما تشغل الخاصية بيبقى عندك زرار لتزويد السرعة وزرار لتقليلها خسب مانت عاوز بس اللى تخلى بالك منه إنك مجرد ماحتدوس فرامل بيتوقف مثبت السرعة عن العمل وبتشتغل فرامل وبنزين زى مانت عاوز . يستحسن تستخدم المثبت لو إنت على طريق سفر.
- موضوع الركن الاوتوبارك حتلاقيه مشروح ومرسوم فى الكتالوج وفين تقف علشان تركن وتتبع التعليمات ومتمسكش الدركسيون كل إللى عليك تبص بعنيك على التابلوة وبعدين حواليك و تدوس فرامل وبنزين وتنقل (لاسحر ولا شعوذة) :)
حتلاقيه مشروح كويس فى الكتالوج وده لينك فيديو بيشرحلك اللى بيحصل فى الاوتو بارك
https://www.youtube.com/watch?v=ghgoj5d2t7I
وده فيديو تانى علشان الحبايب :)
https://www.youtube.com/watch?v=GfkL3vIH8fY
وربنا يوفقك ويباركلك فيها وتبقى تطمنا
المفضلات