BYD F3 2013 Auto ولا لانسر مكواة أوتوماتيك ؟

السلام عليكم جميعا

عايز رأيكم ويا رب حد يفيدني علشان محتار جدا

أنا كان معايا كريستالة مانيوال وبعتها من كام أسبوع كدة علشان أركب أوتوماتيك

بصراحة اللانسر متزعلش وكنت ناوي أركب مكواة أوتوماتيك أو بومة بس موديل قديم شوية علشان الميزانية.

المشكلة إن السوق لقيت فيه عك كتير وأسعار متضاربة وتفاوت كبير أوي في الأسعار وكمان مفيش حاجة كويسة أوي وكله هيتجاب وهيتصرف عليه.

بالصدفة واحد صاحبي معاه byd f3 أوتوماتيك وعايز يبيعها علشان يجيب ال l3 .

هو بيتكلم في 70 ألف والمكواة ممكن تيجي في نفس الحدود دي بس مش لاقي مكواة نضيفة.

أكمل بحث في المكواة ؟ ولا أتكل على الله في ال byd.

مع العلم إنها رشة رفرف يمين قدام وإكصدام قدام.

يا ريت الإفادة ..

رأيي لو البي واي دي سليمة كحالة وأوراق؛ اتوكل على الله فيها وسيبك من المكواة اللي عدي عليها 12 أو 13 سنة دي! والله أعلم.

شكرا لردك يا أحمد
اللي بفكر فيه بس هو البيع بعد كدة .. اللانسر ماسك سعر ومش بيزعل في البيع
خايف من بيع الصيني بعد كدة

والعربية زي ما بقولك سليمة وهو مظبطها وكمان المفروض إن لو في نصيب هيرخصها تلات سنين

اولا زى اللانسر ماهو ماسك سعر البى واى دى ماسكة سعر وانت عارف العربية اللى تبقى تاكسى فى مصر تبقى اية وانت اكيد شايف كام عربية منها فى مصر والطلب عليها بالحجز

العمر الافتراضى
المكواة مهما كانت نضيفة بقالها 12 سنة ( موديل 2002 -2003 ) يعنى طبيعى هيبقى فيها حاجات عاوزة تتغير وانت وحظك وعلى حسب حالتها - انما البى واى دى هتبقى موديل 2012 مثلا هتبقى لسه بخيرها وبعدين الاوتو محدش اشتكى منه خالص .
وعلى العموم صل استخارة وشوف انت مستريح لايه .
ولو البى واى دى نضيفة فعلا وانت ماخدتهاش ( لو ربنا وفقك لمكواة نضيفة ) ابقى قولى انا اخدها لانى بدور على واحدة اوتو .

لو سليمة يبقي توكل علي الله
ربنا يوفقك للافضل