الموضوع: إحتياطات القيادة أثناء الأمطار الغزيرة

بمناسبة اليومين إللى إحنا فيهم دول مطر وهوا وجو مش عاطفى بالمرة ـ دى شوية تحذيرات وتعليمات للقيادة بأمان أثناء الأمطار وربنا يحفظ الجميع:
١- تأكد قبل قيادة السيارة من أن قربة المساحات مليانة وضع عليها قليل من الصابون السائل.
٢- تأكد قبل القيادة من سلامة المساحات .
٣- تأكد قبل القيادة من سلامة الكاوتش .
٤- لاتستخدم الموبايل أثناء القيادة ويستحسن قفل الراديو أو الكاسيت.
٥- إمسك الدركسيون بإيديك الإتنين.
٦- دائماً إنظر فى المرايات كل فترة لمراقبة الطريق حولك.
٧- ركز على الطريق وقد ببطئ .
٨- إترك مسافة امنة بينك وبين السيارة التى امامك .
٩- راعى إن فى الطرق المبتلة تأثير الفرامل بيكون أضعف من العادى ومسافة التوقف حاتزيد نتيجة البلل بتاع الطريق والكاوتش والتيل بتاع الفرامل.
١٠- قم بإضاءة أنوار السيارة حتى لو اثناء النهار.
١١- قم بتشغيل الهوايات تجاه الزجاج الأمامى حتى لايحدث تكثيف.
١٢- لاتستخدم مثبت السرعة.
١٣- تجنب برك المياه قدر المستطاع واتبع السيارة التى أمامك علشان لو وقع تخلع إنت :)
١٤- تجنب الفرملة المفاجأة إلا عند الضرورة حتى لاتنزلق السيارة.
١٥- لو نزلت فى ميه عميقة امشى ببطئ جداً وتجنب إنك تدوس بنزين زيادة علشان العجل مايلفش عالفاضى والعربية تعوم.
١٦- بعد خروجك من بركة مياه حاول تدوس فرامل بسيط عدة مرات علشان تنشف المية إللى على التيل والطنابير.
١٧- حاول تمشى فى الحارة الوسطى من الطريق .
١٨- لاتمشى وراء سيارة نقل أو أوتوبيس (حاتغرقك طين).
١٩- لما تدخل ملف تفرمل قبل الملف علشان تهدى سرعتك مش تفرمل وإنت فى الملف.
٢٠- لو حسيت إنك فقدت السيطرة على العربية شيل رجلك من على البنزين ووجه مقدمة السيارة فى الجهة اللى انت عاوزها وبعدين دوس بنزين تانى.
٢١- لو نزلت من العربية علشان أى سبب وركبتها تانى حتلاقى رجليك بتتزحلق من على الدواسات بتاعة البنزين والفرامل والدبرياج لو مانيوال - حاول تمسح رجليك فى دواسة العربية.
٢٢- كل فترة إديها رشة ميه من قربة المساحات علشان تغسل الزجاج من الطين إللى عليه.