الموضوع: رجة فى العربية اول الدوارة

المشاركة الأصلية كتبت بواسطة shadymt2005

ربية عندى فيها نتشة او برجلة الصبح فى الدوارة كانت عملتها من شهر ورحت لمحمد رشاد والجهاز كان قارى عيب حرق عند البوجيه رقم واحد غيرت البوجيهات وفلتر الهواء وفلتر بنزين المهم بعدها ساعات تنتش بصيت اول الدوارة وبعدها تمام امبارح فضلت مبرجلة لحد مابطلت حولت ادورها تانى مرتين مفيش فايدة وتالت مرة دارت وتمام من سعتها السبب ايه وشكرا. العربية ام 11 عاملة 32الف كيلو.

يافرحتى !!!!! يعنى إيه عيب حرق عند البوجيه ؟؟؟ الكمبيوتر بيدى عيب فى الشرارة بتاعة بوجيه معين ( بتلاقى جملة ignition coil primary- secondary ) أو حاجه إسمها misfire لإسطوانة معينة
لو اللى عندك الإيرور الأولانى يبقى ممكن يكون السلك بتاع البوجية رقم واحد أو الكويل بتاع البوجية رقم ١ يبقى تبدأ تبدل السلك بتاع البوجية رقم ١ مكان السلك بتاع بوجية تانى ( بس تاخد السلك من الناحيتين كله علشان العربية متلخفنش) وتقرا تانى بالكمبيوتر لو العيب اتنقل للبوجيه التانى يبقى السلك بتاع البوجيه بايظ وغيره - لو العيب فضل برضه فى البوجية رقم واحد يبقى تبدل الكويل بتاع رقم ١ مع اى كويل تانى ( برضه الكويل تفكه بالكامل من الفيشة بتاعته وتوصله فى فيشة التانى علشان الدنيا ماتتلخفنش) لو العطل اتنقل للبوجيه التانى يبقى الكويل بايظ وتغيره.
أما لو الإيرور التانى بتاع الـ misfire فده مواله موال وعاوز قعدة جامدة من بدرى .
المهم تقولى إيه الإيرور إللى ظهر للراجل بالظبط على الكمبيوتر .
معلش الموضوع أصله صعب وأنا باحاول ابسطه علشان الناس تستفاد ومافيش ميكانيكى ماسك كمبيوتر يقعد يشتغل الناس ويعمل نفسه خبير فى ناسا :)
وعاوز أقولك لما يكون بوجيه واحد أو إسطوانة واحدة بس هى إللى فيها مشكلة إبعد عن تغيير الحاجات العامة لأنها حتأثر على الموتور كله مش إسطوانة واحدة بس ( فلتر البنزين وفلتر الهوا)
وبكرة لينا عودة إن شاء الله لما يكون الخبير بتاع ناسا قاللك غيه الإيرور بالظبط :)