مساء الخير على عشاق الرينو
انا طبعا بعد حيرة اكتر من شهر مش عارفه استقر على ايه
بس من خلال الموضوعات والمشاركات الجميله في قسم الرينو، شجعتني جدا ولفتت نظري للفلوانس فيس ليفت.
باختصار عشان مطولش عليكو
انا محتاجة اعرف هل في فرق امكانيات يستاهل ما بين فئه e3 وبين e3s ؟؟
مع العلم اني مش من هواة فتحة السقف. فهل فيه امكانيات اخرى تستاهل فرق السعر؟
وهل e3 فيها حساسات ركن خلفي؟ .. وهل فيها مصابيح في الابواب ومصابيح في الشماسات ؟؟
شكرا مقدما
الفرق هو
1- parking sendor
2- sunroof
ولوجربتى فتحة السقف هتبقى من هواتها على ضمانتى
الفئة ( الهاى لاين) e3sr
رابع فئة فى الأوتوماتيك بسعر 188000
كل ما سبق بالأضافة إلى أنوار زينون مع بخاخات و ضبط أرتفاع تلقائى - فرش جلد كامل - ٦ ايرباجز بدلاً من ٢
أنا من رأيي أنك تتفرجي عليها الأول .
فرق المواصفات مع السعر بجد يستاهل .
الفئة e3 هى الحصان الأسود بتاع الفلوانس....فيها كل حاجة و أحسن كماليات مقابل الفلوس و فيها مصابيح فى الشماسات بتشتغل لما تفتحى غطا المرايات و فيها مصابيح فى الأربع أبواب
الفرق زى ما الزميل العزيز أفاد هو 4 حساسات ركن صوت و شاشة فى تابلوه العربية و الجميل فيهم أن فيه 2 فى الوسط و 2 بيكشفوا الأجناب الخلفية....كويسيين و مهمين جداً فى رأى لأن الفلوانس عالية من الخلف و تقريباً مش بتشوفى اللى وراكى....انا بعتمد عليهم 100% و تقريباً مش ببص خلفى و أنا بركن...بعتمد على الصوت أكتر حاجة و الحمد لله حتى الأن ممتازيين جداً و أنقذونى من عامود حد حطه فى الشارع يحجز بيه مكان و عامله قصير....طبعاً و أنا برجع لقيت الحساسات بتصفر و بتحذر من عائق و أنا فعلاً مش شايف أى شىء لأنه تحت العربية....نزلت بصيت لقيته عامود و بأكد لولا الحساسات كان زمانه بهدلى العربية من الخلف
فتحة السقف مش هتحسى بقيمتها غير بعد ما تستخدميها و تقريباً بعد كده هتبقى عايزاها أساسى فى أى عربية مستقبلية
طبعاً أول شىء كمية النور اللى بتدخله جوه العربية بتخلى ال MOOD جوه العربية رائع و بتدى رحابة ووسع
الشىء التانى هو أن حضرتك أسكندرانية زى...و فى الشتا لو فتحتى أى شباك هيدخل هوا فظيع غير طبعاً طرطشت العربيات من الطينة والتراب....يكفى أنك ترفعيها بميل من الخلف بضغطة زر علشان بس تعمل عملية تغيير للهوا داخل العربية و تمنع تكون شبورة على الزجاج الأمامى و طبعاً بكده بتدخلك هوا خفيف منعش و فى نفس الوقت تقلل التحميل على التكييف
أنا أول مرة أجيب عربية فيها فتحة سقف و بأكدلك أنها ممتعة و ضرورية للغاية
فرق السعر بين الفئتين حوالى 8000 جنيه....مش كتير خالص لو أنتى ركبتى الخاصيتين دول بره فى يوم من الأيام هيكلفوكى أغلى و مش هيبقوا بنفس جودة القطع الأصلية و خاصة فتحة السقف
القرار لحضرتك: لو الميزانية تسمح و حضرتك مش من هواة التغيير السريع للعربيات يبقى أنصح جداً بشراء أعلى كماليات ممكنة لأنها بتخليكى مستمتعة أكتر بالعربية
تحياتى
بداية تحياتي وشكري لاهتمام حضاراتكو.اقتباس:
المشاركة الأصلية كتبت بواسطة Hany Saad
شكرا استاذ mohamedaghali واستاذ w_abaza على الافادة
--------------------
وشكرا ليك استاذ هاني على رد حضرتك القيم والمفيد فعلا
طيب ممكن تفيدني اكتر بخصوص سعر الفئتين كنوع من التأكيد بس مش اكتر.
وفيه كمان استفسار بخصوص الشاشه.
هل الشاشه في e3s بتخنلف عن شاشة e3 فعلا ؟
كلام سليم جداً من وجهة نظرى .. أنا شخصياً فى أول الأمر لما إستقريت على الفلوانس كنت رايح أحجز فئة e3 ولم تكن فتحة السقف تلفت نظرى ولا تهمنى ولم أمتلك سيارة بها فتحة سقف من قبل .اقتباس:
المشاركة الأصلية كتبت بواسطة hany saad
ولكن مسئول المبيعات نصحنى بعدم التسرع فى الحجز وإعادة التفكير والنظر فى حجز الفئة الأعلى وهى e3s من اجل فتحة السقف وحساسات الركن على أساس أن الفرق يستاهل .
بالنسبة لحساسات الركن كنت أدرك أهميتها وكنت ناوى فعلاً أركبها فى حالة عدم وجودها .. أما بالنسبة لفتحة السقف فكان ردى له أننى لست مدخناً حتى تكون الفتحة ذات أهمية لى "وماله فتح الشباك ؟"
المهم .. بعد تفكييير عميق وروية قررت رفع الموازنة خصوصاً بعد نصيحة بعض الأصدقاء ذوى الخبرة السابقة لاسيما بعد أن لفت البعض نظرى إلى خطورة اللعب فى كهرباء السيارة وإحتمال خروج السيارة من الضمان وحدوث مشاكل أنا فى غنى عنها وقد لاقى ذلك فى نفسى هوى حيث أننى من المعارضين تماماً للعب فى الكهرباء أو الصاج أو جسم السيارة بصفة عامة فى أى سيارة سابقة لى ، واقصى تعديل عملته فى سيارة سابقاً هو فرش جلد كامل للصالون والأرضية ولصق ستيكر نايل موتورز على الزجاج الخلفى ههههههه.
الخلاصة .. "وبعد ماجت رجلى فى الخية زى مابيقولوا" وبنفس الطريقة قمت للمرة الثانية برفع الموازنة إلى 186 ألف لحجز فئة e3sr بعد معاينتى لها على الطبيعة فى المعرض ولكن هذه المرة من أجل ما هو أهم :- 6 إيرباج بدلاً من 2 فقط (أمان أعلى) & إضاءة زينون بعدسات (أفضل لمن يفضل مثلى السفر ليلاً) & فرش جلد كامل (كنت ناوى أفصله فى كل الأحوال .. تعودت عليه) .
النتيجة .. زيادة الموازنة 16500 جنيه وشراء الهاى لاين .. ومن وجهة نظرى الشخصية الفرق يساوى ما تم الحصول عليه من مميزات .. مش كل يوم الواحد بيشترى سيارة .
تقييم المميزات الإضافية بعد 7 شهور :-
# فتحة السقف : "إختراااع ياكوتش" .. نعمة وماكنتش حاسس بيها للتهوية بدون تيارات هواء شديدة (فى الوضع المائل) خصوصاً عند السير بسرعات عالية لا يتناسب معها فتح زجاج الشبابيك .. خصوصاً فى غير أوقات الحر الشديد التى لابديل عن إستخدام التكييف فيها .. وياسلام عليها لما تتفتح تماماً وأنا بتمشى على كورنيش إسكندرية أو فى الساحل وقت العصارى .. إحساس رااائع.
# حساسات الركن : إنتهى نهائياً عصر النظر للخلف ولوحة الرقبة والمفاجاءات الغير سارة الناتجة من إرتفاع مستوى الأرصفة وحجارة ومواسير حجز أماكن الإنتظار.
# كشافات الزينون : إللى إخترعها يستحق جائزة نوبل فى التنوير.
# عدد 6 إيرباج : ربنا مايحوج حد لها ولكن وجودها مصدر للشعور بالأمان.
# فرش الجلد : تحفة فنية شكلاً .. منتهى العملية فى الإستخدام والنظافة.
هذه تجربتى الشخصية بكل أمانة
وتقبلوا تحياتى ،،،
لا فوض فوك هشام بيه.....نفس تفكيرى بالظبطاقتباس:
المشاركة الأصلية كتبت بواسطة heeshooheeshoo
ربنا يباركلك فى العربية و يكفيك شرها
تحياتى
تحت أمر حضرتك فى أى وقتاقتباس:
المشاركة الأصلية كتبت بواسطة ReeMoOo
لا يوجد اى اختلاف فى الشاشة بين الفئتين
و ده موضوع فيه تجميعة لمواصفات فئات الفلوانس مع أسعارهم ان شاء الله يفيد حضرتك
http://www.nilemotors.net/Nile/452985-a.html
و حاولى تفاصلى فى السعر شوية لان عادى جداً تنزل الف او اتنين و كمان كان فيه خصم ٥ الاف جنيه لسه خلصان اول السنة
بالتوفيق ان شاء الله
تحياتى
تمام جدا
متشكرة كمان مرة على الاهتمام
وموضوع حضرتك بخصوص مواصفات الفئات موضوع اكثر من رائع وفادني جدا
كل التوفيق ليكو ان شاء الله
و الله لما كنت باشترى ما كانش فى دماغى فتحة السقف دى بس ده كان طلب مراتى هههه , بس لما جربتها لقيتها احساس تانى خالص فى خلال مزاج القياده و لا يمكن هاتعرفى تعمليها بره و بهدله بكل المقاييس .