استفسار بشأن كنترول اللانوس

**Tamer.Salah** · 08-01-2015 03:48 AM

السلام عليكم
عندي استفسار بشأن كنترول اللانوس
اسف على الإطالة أولا لعرض المشكلة كاملة

انا عندي عربية لانوس 2 موديل 2001 فيها RPM شاريها مستعمله اولسين الفتيس كان بيجيب زيت على الفتيس من عند المكنه فا روحت للعفشجي قالي اغسل الموتور بالجاز و العربية من تحت و هاتهالي علشان اعرف اشوف اشتغل فيها و غسلتها و من ساعتها و الدنيا باظت معايا.
الار بي ام عمال يعلى و يوطى بمزاجة و روحت للميكانيكي نضفلي البويجهات باسبراي ابرو بتاع المانفو و كانت طالعه سودا بصراحه رغم اني مغيرها من 3 ايام و نضفلي البوابه و حساس البنزين و مشيت عادي و ظبطت و الار بي ام وقف على واحد و كله تمام و طلعت سافرت بيها في نفس اليوم بعد 20 كيلو قطعت مني و بطلت و ماردتش تسحب فصلت حساس الشكمان و قولت يمكن العيب منه بس نفس الحكاية و روحت بيها لميكانيكي تاني غيرلي البوجيهات تاني و نضف حساس البنزين و قالي قيسها على الكمبيوتر لقينا حساس الشكمان مدي error فصلناه و قيسنا تاني ظبط القياس.
روحت بيها مشوار بطلت مني تاني و رجعت للميكانيكي قالي قيسها تاني على الكمبيوتر لقينا حساس البنزين مدي error قالي انا شاكك ان ده عيب كنترول لان الحساس ماكنشي مدي error هات كنترول مستعمل و نجرب و نقيس على الكمبيوتر المهم عملت كده لقيت عندي الكنترول JV و الراجل جابلي BD و ركبهولي و قالي اطلع جرب على الطريق بصراحه العربية ظبطت و رجعت قيستها على الكمبيوتر لقيتها تمام و حساس البنزين شغال و طلع البوجيهات لقاها بقت نضيفه تاني قالي كده عيب كنترول.

طبعا انا لسه ماركبتش الكنترول

السؤال بقى هل الكلام ده صح ولا لاء ؟
و هل رقم الكنترول ده يمشي مع عربيتي ولا اعمل ايه ؟
و منبن اضمن ان الكنترول يكون شغال كويس و مايبوظشي تاني ؟

شكرا و بعتذر مره أخرى على الاطاله

**aymanshebl** · 08-01-2015 09:44 AM

متابع

**Tamer.Salah** · 08-01-2015 10:23 AM

في انتظار رد الخبراء ضروري

**a7med.7assan** · 12-01-2015 04:21 PM

متابع
لان عندى مشكله تانيه اعتقد انها مرتبطه بالكنترول برده بس لسه مجربتش حلول
لكن اللى اقدر اقولهولك ان كان لينا زميل هنا قال انه غير الكنترول بتاعه من vm لانه كان عامل مشكله مع ال ار بى ام وجاب واحد BD زى اللى حضترك بتقول عليه وشغال معاه زى الساعه :)

بيقولوا ان BD ده بتاع اللاونس وان الكامله ... بس الحقيقه المعلومه دى مشكوك فى صحتها

المهم انى لما كامت استاذ محمد ممدوح استشارى القسم مكنش عنده معلومه كافيه عن موضوع الكنترولات وبديلها لكن خوفنى من حاجه ان ممكن الكنترول يظبت معايا دلوقتى لكن يخلف فى موقف بعدها والله اعلم ساعتها يبقى الدنيا فيها ايه ... بمعنى انه يخلف مثلا وانت بتجرى بالعربيه يلخبط حاجه فى الحساسات يخليك تفقد السيطره على العربيه مثلا ع اساس انه مش نفس الكود .. بس دى كلها تكهنات مش اكتر

بتوع الاستيراد كان ليهم راى تانى لما سالت وقالولى لو الكنترول ظبت معاك ال ار بى ام وصوت العربيه يبقى خلاص مفيش خوف ... لكن حضرتك طبعا عارف انهم مش مصدر ثقه رغم خبرتهم المفروض يعنى

انا حبيت انقلك تجربتى فى السؤال عن الكنترولات لانى عندى زى ما وضحت مشكله متعلقه بالكنترول ولسه متردد اجيب نفس الكنترول اللى بتسال عليه ده BD ولا ادور ع اللى راكب فيها ... وانا اسه اصلا مفكتش ولا عرفت اللى راكب فيها ايه .. ع فكره عربيتى دايو مش شيفورليه 2008

**Tamer.Salah** · 13-01-2015 11:42 PM

تسلم يا باشا

بس انا سئلت بتاع الاستيراد و ده شخص انا با اثق فيه قالي التالي :

كنترول BB ده الماستر بتاع كل العربيات اللي مافيهاش RPM

كنترول BD بيشغل عربيات و عربيات اللي فيها RPM

و فيه كنترولات تانية كتير شوفتها عنده BC , BE , BJ و حروف تاني كتير مش فاكرها كلها

بس الاهم اللي وضحهولي ان فيه فرق كبير في الاستعمال بين كنترولات الاوروبي و الكوري و مش شرط الحروف اللي تشغل ده هيا اللي تشغل ده

و قالي معلومة ان اللي بنزل في عربيات مصر اغلبه صيني مش كوري

نيجي بقى لاهم حاجة توافق الكنترول مع العربية

قالي طالما طفى كل نور التابلوه و لمبه check ما نورتش و صوت المكنه مرتاح و مافيش برجله في العربية يبقى ده الكنترول المناسب

**a7med.7assan** · 14-01-2015 10:39 AM

تمام يا استاذ تامر

ياريت لو حضترك متبخلش علينا بالمعلومه لو غيرت الكنترول فعلا وحل المشكله اللى فى العربيه

وياريت تقولى يا باشا مكان الراجل اللى بتتعامل معاه فى الاستيراد وبتثق فيه عشان انا كمان زى ما وضحت لحضرتك عايز اغير الكنترول

وسؤال اخير يا باشا هو بيبيع الكنترول بسعر كام

شاكر لزوق حضرتك وللمعلومات اللى مدتنى بيها ... ويجعلها فى ميزان حسناتك

تحياتى

**Haitham Gamal** · 14-01-2015 06:43 PM

متابع

**Tamer.Salah** · 15-01-2015 12:28 AM

استاذ احمد
انا غيرت الكنترول الحمد لله ب bd و بصراحه الحمد لله ظبط العربية و هدى ال rpm لانه كان عالي عندي و روحت انهارده قست العربية على الكمبيوتر الحمد لله لقيتها كويسة و الحساسات شغاله

بس خلي بالك لان كل عربية لها ظروفها

بالنسبه للراجل اللي بتعامل معاه انا من المحلة مش من القاهرة و الراجل له فرع في الحرفيين اسمها المصرية الكورية

انا اخدت منه الكنترول على 250 بس طبعا اسعار القاهرة بتبقى اغلى من الاقاليم على ما اعتقد

و انا تحت امرك في اي استفسار شكلنا كده هانبقى مشرفين قسم الدايو و الله المستعان

**a7med.7assan** · 15-01-2015 11:45 AM

المشاركة الأصلية كتبت بواسطة tamer.salah

استاذ احمد
انا غيرت الكنترول الحمد لله ب bd و بصراحه الحمد لله ظبط العربية و هدى ال rpm لانه كان عالي عندي و روحت انهارده قست العربية على الكمبيوتر الحمد لله لقيتها كويسة و الحساسات شغاله

بس خلي بالك لان كل عربية لها ظروفها

بالنسبه للراجل اللي بتعامل معاه انا من المحلة مش من القاهرة و الراجل له فرع في الحرفيين اسمها المصرية الكورية

انا اخدت منه الكنترول على 250 بس طبعا اسعار القاهرة بتبقى اغلى من الاقاليم على ما اعتقد

و انا تحت امرك في اي استفسار شكلنا كده هانبقى مشرفين قسم الدايو و الله المستعان

مبروك ياباشا ع حل المشكله طبعا
وطبعا معاك حق فى موضوع الاسعار دى ... انا عايز اقولك ان سعر الكنترول عندنا بس مش فى الحرفين انا سالت جنبى فى كام محل لقيته من 400 ل 450 طبعا سعر خيال

وبمناسبة الحرفين الحقيقه ده مكان بعيد جدا عنى ... يعنى انا لو قررت اروح الحرفين يبقى اجى المحله اسهل اجيب الكنترول هههههههههههههههه

على كل حال متشكر جدا لنقل تجربتك ... وحضرتك تانى زميل هنا يغير الكنترول ل bd ويحل معاه المشكله ... شكلى هعملها انا كمان

شكرا يا ريس :)

**نوبيرا2** · 16-01-2015 02:09 AM

السلام عليكم ورحمة الله وبركاتة
انا معايا نوبيرا2 مجننانى مش عارف اعملها اية
ادورها الصبح بتدور زى السفخة فى كلمة ونص ابص الاقيها تترج وتتهز والاربى ام يوطى اكنها هتطفى وبعدين تعلى مرة واحدة وتجيب 2000 لفة وبعلى كدة لحد اما تسخن وبعدين امشى بيها مافيش استجابة لدواسة البنزين ومرة واحدة بعد ما افضل ادووس تقوم طالعة مرة واحدة اكنها اتسرعت اة والله زى ما بقول كدة وتفضل تتخنق منى طول السكة لحد اما اجى ابطلها واطلع أى نام روحت ل100 ميكانيكى وزيهم كهربائية غيرت بوجيهات وفلتر بنزين وفلتر هوا ونظفت الرشاشات وغيرت حساس الماب وحساس الكرنك وغيرت 3 بوابات ولسا العيب زى ما هوة مش عارف اعمل اية انا شاكلى هاجى فى مرة وهقوم داخل بيها فى عمود نور واﻻتاح منها وابيعها خردة عشان محدش يركبها تانى وحطتها على الكمبيوتر ماجابتليش اى اخطاء وقاسلى الحساسات وزى الفل اعمل اية اعمل اية قولولى اربوكم مع العلم ان الار بى ام مش بيعلى ويوطى بعد ما بتسخن فقط فى السلانسية