سؤال بخصوص عمل الإيه بى إس و الفرامل فى الـ 301
معايا عربية 301 هاى لاين و عندى ملاحظة عليها و أرجو من السادة ملاكها إنهم يأكدوا إذا كان نفس الملاحظة عندهم أو لأ, و عموماً هل ده موجود فى باقى العربيات البيجو و لا لأ, وهل ده شئ طبيعى فى باقى العربيات اللى فيها نظام الإيه بى إس و لا لأ
لما بكبس فرامل (لسبب أو لأخر, وده حصل معايا مصادفة حوالى 5 مرات فى خلال 14000 كيلو سواقه بيها, أخرها النهاردة) و يكون مؤشر السرعة على 20 كيلو بالظبط, الإيه بى إس بيشتغل بقوة و العربية بتترجرج و تمشى (مش تزحف) مسافة متر و نص أو مترين لغاية ما تقف بالكامل.
لو حد ممكن يجرب و يأكد أكون شاكر ليه, انا طبعاً روحت التوكيل و أكدوا إن ده نظام الإيه بى إس (بعد ماخليتهم يجربوها بنفسهم), و أنا عارف إن ده نظام الإيه بى إس, بس ليه بيشتغل على أرض متسفلتة مافيش عليها رمل أو مايه أو زيت على سرعة 20 لما أكبس فرامل, ليه مش على سرعة 25 كيلو أو 30 كيلو أو 40 كيلو (زى ماخليتهم يجربوا بنفسهم, العربية بتقف و تقلبش على السرعات دى من غير الإيه بى إس ما يشتغل).
* السيناريو للى عايز يجرب و يأكد, إطلع بالعربية لغاية 30 كيلو مثلاً و هدى السرعة لغاية ماتلاقى المؤشر وصل على العشرين بالظبط إكبس فرامل, و جرب نفس الحكاية على سرعات أقل أو أكتر.
** مش محتاج أأكد إن اللى عايز يجرب يبقى فى مكان فاضى و ياريت يشغل الإنتظار من باب الإحتياط :)
شكراً جزيلاً مقدماً لمساعدتكم و فى إنتظار ردكم قبل ما أروح التوكيل و أخد من وقتهم, يمكن السوفت عندى محتاج تظبيط (مافيش داعى الناس تقلق و تتوغوش من العربية بصورة عامة).
و لو ده عند الكل, فيبقى لازم هابعت لبيجو فرنسا أشوف إيه الحكاية, لإن للإسف النهاردة كنت هاخبط واحد ماشى و انا طالع من إشارة و هوا بيعدى فجأة, فكبست فرامل و بدل ما تكلبش لقيتها مشيت لغاية ماكنت هاخبط فيه (الحمد لله ربنا ستر عليا و عليه) و عشان كدا قلت لازم اطرح الموضوع للسؤال هنا و أخد رأى الأعضاء (اللى أنا بثق فى حياديتهم).