الموضوع: عايز اوضب الشركة و السكان منعني!!

المشاركة الأصلية كتبت بواسطة devil_storm

دلوقتي احنا عايزين نوضب الشركه و طبعا في خبط و دق المشكله السكان منعني
احنا شركتنا شقه في عماره و السكان و اتحاد ملاك العماره بيقولو الشغل ممنوع يوم الجمعه و باقي الايام ممنوع العمل بعد الساعه ٦ مساء، طيب انا اوضب اذاي قبل الساعه ٦ و الموظفين موجودين؟
انا محتاج اسبوع فقط تخبيط فهل ممكن اشتغل من ٦ مساء الي ٩ مساء لمده اسبوع ولا في قانون بيمنع كده و ممكن يعملولي محضر ازعاج
ارجوا الافاده علشان انا مش عارف اعمل ايه

الاخ الكريم الفاضل

حضرتك بتسأل عن جزئية مدي قانونية العمل بعد الساعة السادسة الي الساعة ال 9 مساء

و هذا يعني ان حضرتك ناوي تشتغل بغض النظر عن قرار اتحاد الملاك

و انا طبعا لا استطيع ان افيدك في قانونية العمل بعد الساعة السادسة من عدمه بس اللي اعرفه ان اي ساكن هيتصل بالقسم و هيجي امين شرطة و ياخد الصنايعي علي القسم و هياخد كمان المسئول عن الاعمال و هياخد تعهد كتابي بعدم ازعاج السكان حتي لو كانت الساعة 10 صباحا

و ندخل بقي في محاضر و اشكالات قانونية

طيب ليه حضرتك متقعدش مع الاخوة الافاضل بتوع اتحاد الملاك و تقسم البلد نصفين

يعني تخبرهم بأنك هتيي علي نفسك و مقدر تعبهم و وقفتهم معك و تفعل الاتي:-

اولا تتعهد امامهم انك لن تعمل اثناء الدراسة يعني هتستغل اجازة نصف العام الدراسي و ها هي علي الابواب و يكون الاعمال كلها في الاسبوعين بتوع الاجازة

ثانيا هم كأتحاد ملاك عاوزين الاعمال حتي السادسة و حضرتك تحتاج العمل بعد السادسة لوجود موظفين بالشركة طيب نخليها عليك ساعتين و عليهم ساعتين يعني حضرتك في الاسبوع اللي هتحتاج انك تعمل بعد انتهاء و انصراف الموظفين خليهم يمشو الساعة الرابعة بدلا من الخامسة او السادسة و بكده تقدر تستغل ساعتين في الوقت المسموح لك به العمل و في المقابل تطلب من اتحاد الملاك انهم يفتحو لك الوقت الي الثامنة مساء يبقي انت كده خدت 4 ساعات كاملين

ثالثا يمتد العمل لمدة 10 ايام او 12 يوم بدلا من اسبوع واحد

اري انك بالتراضي ممكن تكسبههم في صفك و تثبت لهم انك لا تريد ان تحدث فوضي او ازعاج بل انك حريص مثلهم علي الصالح العام

اخيرا سجل ما فعلوه معك لانك ستحتاجه يوما حين تجد احدهم بيخبط ويرزع في شقته بعد الساعة العاشرة مساء و حين تسأل سيقول لك دا انا بس بوضب شقتي كل سنة وانت طيب يا راجل يا طيب

تحياتي لك

وضب على مراحل ....... اوضة اوضة يعني ..... بحيث العمل ما يقفش