العربية الرمسيس.........

**oshy** · 27-07-2007 03:50 PM

أنا معرفش تاريخ العربيه دى بس أنا ليا ذكرى أليمه مع العربيه دى

كنت مأجر عربيه ألنترا موديل 2005 من حوالى 3 أشهر و كنت مأجرها من غير سواق و ماضى و باصم على وصلين أمانه على بياض المهم كان فى عربيه رمسيس قدامى مره واحده و بدون مقدمات لقيته قام جايب ورا و طبقلى الاكصدام و نزل اعتذرلى و مشى و اما رجعت للمعرض الراجل خد منى 300 جنيه عشان يدينى الوصلين بتوعى و الا كان هيعملى مشاكل أنتوا طبعا عارفين ان الوصل الواحد فيه 3 سنين سجن يعنى الوصلين 6 سنين سجن و من ساعتها و انا عمرى ما بقف ورا عربيه رمسيس و بكرهها جدا جدا

**جندى مجند** · 28-07-2007 02:21 AM

و اما رجعت للمعرض الراجل خد منى 300 جنيه عشان يدينى الوصلين بتوعى و الا كان هيعملى مشاكل أنتوا طبعا عارفين ان الوصل الواحد فيه 3 سنين سجن يعنى الوصلين 6 سنين سجن

طبقاً لكلام سمعته من محامى صديق من فترة ... وصل الأمانة الممضى على بياض لا قيمة له و لا يعتد به فى المحكمة و الله أعلم

**oshy** · 28-07-2007 04:21 AM

طبقاً لكلام سمعته من محامى صديق من فترة ... وصل الأمانة الممضى على بياض لا قيمة له و لا يعتد به فى المحكمة و الله أعلم

على فكره أنا سألت الدكتوره بتاعت مادة ال law اللى بتدرسلى فى الأكاديميه و قالتلى معملش كده تانى عشان لو كان حصل خلاف على موضوع الفلوس كان ممكن يكتب المبلغ اللى يحبه و يحبسنى بيهم و معلومه لسيادتك الدكتوره دى محاميه فى مجلس الدوله و مشهوره جدا فى مجال المحاماه فى مصر

**Everlasting** · 28-07-2007 04:26 AM

طبقاً لكلام سمعته من محامى صديق من فترة ... وصل الأمانة الممضى على بياض لا قيمة له و لا يعتد به فى المحكمة و الله أعلم

الوصل مش بيروح المحكمة علي بياض بل بيتم وضع مَبلغ معين وطبعا بيكون مُبالغ فيه جدااا. و مش بيقولوا انه تمن العربية .. لكن بيقولوا "على سيبيل" إن (س) كان مكلف بتوصيل مَبلغ إلي (ص) لكنه خان الأمانه واستولي على هذا المبلغ.

**جندى مجند** · 28-07-2007 11:53 AM

الوصل مش بيروح المحكمة علي بياض بل بيتم وضع مَبلغ معين وطبعا بيكون مُبالغ فيه جدااا. و مش بيقولوا انه تمن العربية .. لكن بيقولوا "على سيبيل" إن (س) كان مكلف بتوصيل مَبلغ إلي (ص) لكنه خان الأمانه واستولي على هذا المبلغ.

ما أنا فاهم طبعاً انه بيتعمل كدة بس أنا أقصد ان لو التوقيع مكتوب بخط و باقى الوصل بخط تانى أعتقد ممكن تطعن فى الوصل بالتزوير ... دة اللى المحامى قالهولى وقتها (و هو محامى من نوعية المحامين العقر بتوع الثغرات!) و أنا مجرد نقلت المعلومة عنه و قلت "و الله أعلم" لأنى مش متأكد اذا كانت معلومة صحيحة 100% أم لا ... لو فى محامى أحوال مدنية هنا يا جماعة يا ريت يفيدنا فى الموضوع دة

**Hossam_Hassan** · 28-07-2007 12:05 PM

المشاركة الأصلية كتبت بواسطة جندى مجند

الوصل مش بيروح المحكمة علي بياض بل بيتم وضع مَبلغ معين وطبعا بيكون مُبالغ فيه جدااا. و مش بيقولوا انه تمن العربية .. لكن بيقولوا "على سيبيل" إن (س) كان مكلف بتوصيل مَبلغ إلي (ص) لكنه خان الأمانه واستولي على هذا المبلغ.

ما أنا فاهم طبعاً انه بيتعمل كدة بس أنا أقصد ان لو التوقيع مكتوب بخط و باقى الوصل بخط تانى أعتقد ممكن تطعن فى الوصل بالتزوير ... دة اللى المحامى قالهولى وقتها (و هو محامى من نوعية المحامين العقر بتوع الثغرات!) و أنا مجرد نقلت المعلومة عنه و قلت "و الله أعلم" لأنى مش متأكد اذا كانت معلومة صحيحة 100% أم لا ... لو فى محامى أحوال مدنية هنا يا جماعة يا ريت يفيدنا فى الموضوع دة

الطب الشرعى بيثبت ان تاريخ التوقيع سابق لتاريخ كتابة المبلغ.

**جندى مجند** · 28-07-2007 12:17 PM

أنا آسف ... معلومتى طلعت خاطئة بعد قليل من البحث: http://www.arlawfirm.com/ADVdetails.asp?id=984

**محمد ابراهيم 1** · 28-07-2007 01:00 PM

إنتوا جيتوا عندى أهلا وسهلا بالمناسبه أى أسأله قانونيه فى حدود معرفتى انا مستعد للإجابه عنها
شوفوا بقى وصل الامانه لو اتكتب على بياض وفضل فتره وبعدين البيانات اتملت الطب الشرعى بيقدر يثبت ان البيانات اتملت بعد التوقيع وده بيشكك المحكمه فى واقعه التسليم موضوع التجريم فالمحكمه بتدى براءه
لكن عشان الطب الشرعى يباشر مهمه الفحص لازم الطاعن اللى هو المتهم يدفع امانه لا تقل عن 300 جنيه ولا تسترد
ولاحظوا ان التوقيع سليم لكن البراءه مبنيه على اساس ان واقعه التسليم فيها شك
وفى محاكم تانيه ممكن تدى براءه اذا اثبت المتهم وجود علاقه تجاريه بينه وبين المدعى بالحق المدنى اللى هو الشاكى زى الحاله دى فيه عقد ايجار للعربيه يبقى النزاع مدنى وليس جنائى وفى الحاله دى المحكمه بتدى براءه واحاله القضيه للمحكمه المدنيه المختصه وبكده بتكون نجيت من الحبس ووقعت تحت رحمه الحكم بالتعويض
مشكله تانيه بتحصل من الناس اللى بتاخد ايصالات امانه على المتعاملين معهم ايه هى المشكله وركزوا معايا عشان اى حد مننا ممكن يقع فى الموضوع ده انت بتكتب وصل امانه وبعدين تنتهى العلاقه بينك وبين الطرف التانى على خير بتاخد الوصل بتاعك وتروح مقطعه وتروح مبسوط
بعض الناس معدومى الضمير بيعمل ايه ؟
بيقلد امضتك على وصل امانه تانى شبه اللى انت مضيت عليه ويرجعلك الوصل المقلد وانت نتاخدش بالك بحكم ان انت مش خبير ويشتكيك بالوصل الاصلى ويبتزك من اجل التنازل
تيجى انت تعمل ناصح وتطعن بالتزوير على الوصل ييجى التقرير انها امضتك وانت مندهش وجواك شكوك بالنسبه للخبير اللى فحص لكن الحقيقه انها بتكون امضتك فعلا
فيا ريت نحترس
ويا ريت اننا منمضيش على اى ورقه الا فى حدود الضروره القصوى وآسف للإطاله
محمد ابراهيم