القول الفصل في ترك او ازاله بعض حساسات السيارة

**hemaa_82** · 12-01-2015 01:46 PM

بصوا يا اخوانا ... انا من الناس اللي مبتحبش تعدل علي الخواجة "المصنع"

لان ببساطة الحداية مش بتحدف كتاكيت ...ز يعني هوا من مصلحته انه يقلل اللي هيديهولك .... فالالغاء بدافع الرغبة يبقي بنهزر ....

انما انا ملغي عندي الكانستن و من اكتر من 40الف كيلو بدون اي مشاكل او اعراض .... لانه اصلا لو بايظ مش هتلاقي بديله بسهولة ... و برضه كنت هشغله الا لما لقيت ان ال2 اللي بيفهموا في العربية قالوا ان بيس مفيش قلق...

فكرة بقي انك تلعب في الاي سي يو علشان اداء فاكيد علي حساب المصاريف .... مهو اي تحسن في الاداء بدون تغيير ميكانيكي يبقي علي حساب المواد المشغلة بدون نقاش .... يعني هتغير في السوفت وير علشان تجري في مقابل انك تحرق اكتر ....

من الاخر مانا بجيب ال 200 كيلو في الساعة ...بس لما بجيبها جيبي بيوجعني و التانك بيخلص في الرايح بس الساحل بدل ما يفضل و يرجعني ... لان الاستهلاك بيطلع من اقل من 7 لتر لكل 100 كيلو و يكبر لحد ما بيوصل 22 لتر لكل 100 كيلو .....
طب انا هجيب ال 200 فين جوة البلد .... هيه مرة كل كاااااااام شهر علي طريق السفر....يبقي علي ايه التعديل ....

انا عن نفسي عجزت "كبرت" علي اني ادور عن اداء في مقابل فلوس ..... لو في من غير ما مصاريف التشغيل تفتح بقها"البنزين يعني" اهلا ...بس ببساطة علميا مفيش

**ARKOON** · 12-01-2015 07:36 PM

كلام مضبوط أ/ هيما .
في مصر مش محتاجين اكتر من سرعة 120 كم .
بتوفر بنزين - بتوصل للبيت سليم - بتتحكم في العربية .

**towfeq** · 13-01-2015 10:52 AM

سلام عليكم
طبعا انا مش هقدر اكلم بعد كلام هيما لانه من الناس اللي فاهمه العربيه قوي و غير كده المثل بيقول اسال مجرب.
انا تقريبا صرفت نظر عن موضوع الغاء او فصل الحساسات او الصمامات دي. بس على فكرة الفكرة مش فكرة اداء. طبعا اي تعديل او upgrade في العربيه ك software من غير ميكون فيه نفس التعديل الميكانيكي المكافئ ليه يبقى العربيه هتدمر على المدي القريب او المتوسط.
الفكرة ان تعديل ال ECU اللي انا بتكلم عنه مش هدفه اداء على قد ما هو تعويض مشكله العربيه ملهاش ذنب فيها. العربيه المفروض تاخد بنزين 93. احنا هنا في مصر بناكلها بنزين 92 (ده باعتبار انه 92 بس هو اصلا بالكتير 87) و دي مشكله على المدي البعيد. نفس المشكله دي حصلت في موديل بي واي دي الجديد L3 . و الموضوع بيتحل دلوقتي بتعديل الsoftware of ECU . ده طبعا هيكون على حساب الاداء لان العربيه هتتخنق شويه. و لو كان الوكيل او اي وكيل في مصر بيهتم اصلا. كان زمان العربيات في مصر حماده تاني خالص. مثلا العربيه ال M11 الاستوك في اي بلد بتنزل فيها. فيها اوبشن غير اللي عندنا., مش هكلم على التقفيل. لا . انا هكلم على عرض درجات الحرارة داخل و خارج العربيه و مفتاح التحكم في ارتفاع و درجه النور الامامي و مقياش الكتروني لضغط الكاوتش و برنامج التجكم في الثبات ESP Electronic stability program . كل ده اتشال من العربيه. مع انه لو كان جه و العربيه زاد تمنها 5 الالف مثلا مش هتبقى مشكله. وكلاء العربيات في مصر عاملين زي الست اللي شكلها وحش و اتقدم لها عريس و اتجوزها. خلاص. البس بقى و انسي ان بقى فيه اي تحسن. مش دفعت و استلمت و ركبت (العربيه) يبقى خلاص بقى. احمد ربنا و قضي يومك و بلاش تعمل مشاكل.

ربنا يصلح الحال لنا جميعا

**MACATHIUS** · 19-01-2015 01:41 PM

المشاركة الأصلية كتبت بواسطة towfeq

سلام عليكم
طبعا انا مش هقدر اكلم بعد كلام هيما لانه من الناس اللي فاهمه العربيه قوي و غير كده المثل بيقول اسال مجرب.
انا تقريبا صرفت نظر عن موضوع الغاء او فصل الحساسات او الصمامات دي. بس على فكرة الفكرة مش فكرة اداء. طبعا اي تعديل او upgrade في العربيه ك software من غير ميكون فيه نفس التعديل الميكانيكي المكافئ ليه يبقى العربيه هتدمر على المدي القريب او المتوسط.
الفكرة ان تعديل ال ecu اللي انا بتكلم عنه مش هدفه اداء على قد ما هو تعويض مشكله العربيه ملهاش ذنب فيها. العربيه المفروض تاخد بنزين 93. احنا هنا في مصر بناكلها بنزين 92 (ده باعتبار انه 92 بس هو اصلا بالكتير 87) و دي مشكله على المدي البعيد. نفس المشكله دي حصلت في موديل بي واي دي الجديد l3 . و الموضوع بيتحل دلوقتي بتعديل الsoftware of ecu . ده طبعا هيكون على حساب الاداء لان العربيه هتتخنق شويه. و لو كان الوكيل او اي وكيل في مصر بيهتم اصلا. كان زمان العربيات في مصر حماده تاني خالص. مثلا العربيه ال m11 الاستوك في اي بلد بتنزل فيها. فيها اوبشن غير اللي عندنا., مش هكلم على التقفيل. لا . انا هكلم على عرض درجات الحرارة داخل و خارج العربيه و مفتاح التحكم في ارتفاع و درجه النور الامامي و مقياش الكتروني لضغط الكاوتش و برنامج التجكم في الثبات esp electronic stability program . كل ده اتشال من العربيه. مع انه لو كان جه و العربيه زاد تمنها 5 الالف مثلا مش هتبقى مشكله. وكلاء العربيات في مصر عاملين زي الست اللي شكلها وحش و اتقدم لها عريس و اتجوزها. خلاص. البس بقى و انسي ان بقى فيه اي تحسن. مش دفعت و استلمت و ركبت (العربيه) يبقى خلاص بقى. احمد ربنا و قضي يومك و بلاش تعمل مشاكل.

ربنا يصلح الحال لنا جميعا

ههههههه
مبدأ احيينى النهاردة.... يا عم مالى انا و مال بكرة
اصلا العاملين فى المراكز معندهومش انتماء للصنعة تحس انه وضعهم مؤقت و مافيش احساس بالمسئولية
كل واحد بيعتقد ان دا مش مكانه و المفروض يكون وضعه افضل من كدة
خبرتى المرة الوحيدة مع تكنو سيرفيس جسر السويس الناس هناك غرباء عن المكان و لو لقوا فرصة يولعوا فيه و يسيبوه و يشوفوا حتة احسن

**wild_saher010** · 20-06-2015 01:24 PM

للاسف مضطر افاجئكم و اقولكم ان موضوع byd l3 او حتى f3 1 1500cc ما اتحلش حتى هذة اللحظة . لانى كنت من ملاك اف ثرى 2015 و ال ثرى 2015 و الاتنين اوتو و الاتنين بالموتور الجديد 1500 . و طلع عينا فى موضوع التسقيف دة ( طب نغير بوجيهات - نحط اوكتان بوستر - ) مافيش فايدة ( طب ناخر الكاتينة سنة - طب نحط جوان وش سلندر دوبل علشان نكبر الغرفة ) بردة مافيش فايدةةةةةة و طبعا التوكيل بلح و اساسا مش معترفين بالمشكلة و اما بتزنقهم اوى يعنى يقولولك دة عيب بنزين يا فندم . روح مون من بنزينة نضيفة ..
و للاسف انا بعت احدى العربيات و التانية فى الطريق كالعديد من الملاك مثلى بس مش علشان موضوع التسقيف و بس . و انما كان فى بلاوى تانية غيرة . و احب ااديلكم التقيلة بقى
بعد ما بعت الاف ثرى 2015 اوتو . بما انى اساسا اسبرنزاوى قديم شوية قمت راجع تانى و ربنا كرمنى ب M11 2010 و الحمد لله حاسس انها افضل و اتقل و انضف وعزل لا يقارن و ثبات لا يقارن بالمرحومة BYD F3 2015 الفاشلة.

**islam_abouzaid** · 22-06-2015 01:13 PM

فعلا موضوع مهم جدا وانا استفد منهىكتير باراك الله فيكم بصراحه بمناسبه موضوع الحساسات انا لسه اسبرانزاوى جديد معايا تيجو 2000cc مانيوال ولسه مغير حساس شكمان ولمبه ال ebc فصلت من التابلوه لما اتغير بس العربيه لسه استهلاكها زى ماهو ف البنزين عالى جدا انا محتار مش عارف ده من ايه وهل ممكن الحساس شغال بس بيطلع قرأت غلط تخليه يسحب بنزين اكتر لان رجعت للميكانيكى قالى الحساس طالما مش منور فى التابلوه يبقى شغال