لسة في ناس محترمة:)

1 نوفمبر يوم عيد ميلادي نازل باليل و رايق و فرحان ...ركبت العربية و طلعت و بعد ما طلعت لقيت ورقة محطوطة تحت المساحات ,ركنت علي جنب و نزلت و انا رايح اجيب الورقة لقيت النمر اللي قدام مفرومة و مربوطة بمسمار واحد :(المهم رحت جبت الورقة و دة كان نصها...آسفة جدا علي ما حدث لرقم السيارة,حدث علي الرغم عني لكسر ميكروباص علي سيارتي بعنف .اسفة جدا ثانيا و برجاء مسامحتي و اذا كان هناك تكلفة و لو بسيطة برجاء اعلامي 01222xxxxxالصراحة انا مصدقتش ان لسا في ناس ممكن تعمل كدة و خاصا انها حاجة بسيطة اي حد تاني كان خلع و كان الله بالسر عليم و اللي عرفتة بعد كدة ان الاستاذة سالت علي صاحب العربية و معرفتش توصلي راحت كاتبة ورقة...الصراحة انا كنت راكن عمودي علي الرصيف و انا ملاحظ حاجة مضيقاني الصراحة لما بركن عمودي جنب عربيات كتيير تانية زي الميجان مثلا ضهر عربيتي عادي راجع علي الاخر و محاذ لضهر العربية اللي جانبي بالضبط الميجان مثلا تلاقي وشها عادي جوة و شكلة طبيعي و مش مضايق حد ,انا بقي بقي وش العربية طالع لبرة كدة و ملطش :( انا مش عارف في حد تاني من ملاك جين 2 حس انها طويلة كدة غيري ولا لا ؟اتعكننت شوية الصراحة و بعديين قولت ابقي اشوف حتصرف في النمر دية ازاي بكرة بعد الشغل ,تاني يوم بقي و انا رايح الشغل الصبح اي حد جاي في وشي يشاوري تحت علي النمر اقولة انا واخد بالي شكرا لحد ما زهقت رحت راكن علي جنب و فكيت النمرة و جبت مفتلح الصليبة و قعدت ادق عليها لحد متعدلت تاني:) و ربطها و خلص الموضوع.الاغرب ان الحمد الله ...الحمد الله العربية عندي مفيهاش خدش واحد ,مش عارف عماتها ازاي الصراحة بالدقة دية(الحمد الله ربنا قدر و لطف)انا حبيت اشاركو بالواقعة دية عشان بس انا عارف ان كلنا بنشتكي من سلوكيات الناس اللي سايقة في الشارع المصري و انا شخصيا كنت ابتديت افقد الامل بس اللي حصل دة اكدلي ان لسة في ناس محترمة بتحترم نفسها و اللي قدمها و ان لسة في بصيص من الامل, يا جماعة لو كل واحد يبتدي بنفسة واحدة واحدة الامور ممكن تتحسن...

ربنا يكتر من امثالها واحمد ربنا

الدنيا لسه بخير طول مافيها ناس كويسين بس احنا غضبنا و سخطنا علي الاوضاع الغلط بيخلينا دائما نشوف نص الكوباية الفاضي

جزاها الله خيرا
أكيد الدنيا لسه فيها خير

الحمد لله والف سلامه عالجين2 الجميله...

وهو اكيد فى ناس محترمه بس وسط الوهجه الناس دى بتختفى

اقتباس:

---

المشاركة الأصلية كتبت بواسطة Ahmed REDA

1 , يا جماعة لو كل واحد يبتدي بنفسة واحدة واحدة الامور ممكن تتحسن...

---

والله العظيم هنبقى احسن شعوب العالم بس لو فعلا كل واحد يبدا بنفسة

fe nas taba3an mo7tarama ...... bas mesh bayneen west el 3'aw3'aaaaa

مصر حالها زى الزفت و دى حالة شاذة جداً ..

حصلت مع أبو واحد صديقي

حد كسرله المرايه بالغلط وكتبله ورقه، بس والد صاحبي إتصل بيه فعلاً بس عشان يشكره مش عشان يطلب منه حاجه.

للاسف النوعيه ديه من الناس بقت قليله جدا جدا

بس نقول الحمد لله انهم لسه موجودين و ربنا يزيدهم .

الخير فى وفى امتى إلى يوم القيامه
صدق رسول الله صلى الله عليه وسلم

يا جماعة شكرا فعلا لتفاعلكم و واضح ان الآراء اختلفت بين مؤيدين و معارضين للتمسك بالمل حتي و لو ضغير في ان ينصلح حال الشارع المصري ,يا جماعة الواحد بيسمع كل يوم اخبار تنكد علية و حتي اخبار غريبة و دخيلة علي المجتمع المصري و انا عملت الموضوع دة مخصوص عشان احاول اغير الحالة العامة المسيطرة علي الناس بالموقف الضغير دة و انا عن نفسي وعيت الدرس و إن شاء الله حبدا بنفسي و جبت بلوك نوت صغيرو و قلم معايا في العربية و لو صادفني اي موقف يستدعي اني مكونش سلبي لن اتردد في التفاعل

الحياة ما هي الا خبرات و مواقف الواحد بيتعلم منها و انا شايف ان الانسان لازم يتعلم من حتي اصغر المواقف اللي بتقابلة و ارجو ان اي حد يصادفة اي موقف يقولنا علية عشان كلنا نتعلم منة و ليكن شعارنا دائما
ابدا بنفسك

اقتباس:

---

المشاركة الأصلية كتبت بواسطة marsguy

حصلت مع أبو واحد صديقي

حد كسرله المرايه بالغلط وكتبله ورقه، بس والد صاحبي إتصل بيه فعلاً بس عشان يشكره مش عشان يطلب منه حاجه.

---

نفس تصرفي انا اتصلت بيها شكرتها علي تصرفها الحضاري و اطمنت عليها و علي عربيتها بس هي بتقولي ان العربية عندها كانت الخسائر اكثر شوية و حاواوضح لها ان الموضوع عندي بسيط و لم يكلف اي شيء

الحمد لله ان فى مشاركة فيها الطف والذوق ده

اقتباس:

---

الخير فى وفى امتى إلى يوم القيامه
صدق رسول الله صلى الله عليه وسلم

---

انا اما بقابل الناس دي ببقي هطير من الفرحة و مش مصدق نفسي .. يعني ساعات اما أدي إشارة و الاقي اللي ورايا وسعلي ببقي مش مصدق ! و أبقي نفسه أركن و أقوله بجد و الله إنت قصدك تعديني ؟ يعني فرملت مخصوص عشاني !!؟ طب إحلف .. و بيبقي نفسي كدة أنزل أخده بالحضن و انا عامة ضعيف جداَ قدام الذوق و اللي بيعتذر بسامحه طالما إعترف بخطأه .

ربنا يارب يكتر من امثالها

بجد انسانه محترمة

لو كل حد فينا اتصرف زيها كده نص مشاكل البلد هتتحل

طول ما في ناس لسه بتعرف تعتذر و تحس بغلطها يبقي الدنيا لسه بخير

و حمد الله علي سلامة الجين يا بشمهندس احمد

ربنا يكفينا جميعا شر الطريق

اقتباس:

---

المشاركة الأصلية كتبت بواسطة MoToRiZeR

انا اما بقابل الناس دي ببقي هطير من الفرحة و مش مصدق نفسي .. يعني ساعات اما أدي إشارة و الاقي اللي ورايا وسعلي ببقي مش مصدق ! و أبقي نفسه أركن و أقوله بجد و الله إنت قصدك تعديني ؟ يعني فرملت مخصوص عشاني !!؟ طب إحلف .. و بيبقي نفسي كدة أنزل أخده بالحضن و انا عامة ضعيف جداَ قدام الذوق و اللي بيعتذر بسامحه طالما إعترف بخطأه .

---

ده إنتا جايب أخرك ....

تصدق أنا برضه .. ببقى هطير من الفرحة بشكل غير طبيعى مبالغ فيه جداً ... لما ألاقى حد بيعمل حاجة صح من نفسه و ميكنش مجبر على إنه يعملها.

ربنا يصلح الأحوال.

شكرا جزيلا لنقلك الواقعة دي.. بثثت فينا الأمل من تاني :)

اقتباس:

---

الخير فى وفى امتى إلى يوم القيامه
صدق رسول الله صلى الله عليه وسلم

---

والله احنا لسه فينا الخير

ياريت بس ما نبصش على الحاجات الوحشه عالطول

واللى فى ايده حاجه يصلح بيها الوضع يعملها

حتى لو مش هيرمى زباله من عربيته فى الشارع دى خطوه هتجيب حاجه واره التانيه

وشكرا على اللمحه الايجايبه دى يا استاذ احمد

جذاها الله خير واكثر من امثالها.

المفروض ان ده الطبيعى
لكن احنا مستغربين لاننا بعدنا عن الدين وعن كل حاجه
عامة اكيد لسه فيه ناس محترمين بس اقليه مندسه فى وسط المجتمع

حمد لله على السلامة يا احمد يا ر ب تكون العربية بخير:k10:

بجد ميرسي على موضوعك الحلو دة على الصبح كدة عليت الموود بصراحة:knight:

يا رب دايما اصحي و الاقي مواضيع حلوة كدة و تحسسني ان الدنيا لسه بخير:innocent:

حمد لله على السلامة :)

فعلا لسه في ناس محترمين

f3lan lsa fe nas kwaysa w mohtarama....w kol sana wenta tayb ya ahmed

فعلا الدنيا لسه بخير و في ناس كتير كويسة
لسه حالا و أنا جاي المكتب بعد التقاطعات اللي في الكيلو 4.5 في مهبط علي الحارة الشمال أمام مستشفي الكهرباء و كنت بتخطي أتوبيس و أمامي علي اليمين عربية لادا لاقيت الراجل وسع لي و أخد اقصي اليمين و شاور لي بايديه ناحية اليمين مش بس كده العربية اللي كانت علي يميني من ورا هدت سرعتها لحد ماأدخل انا يمين

بصراحة مش عارف هو أنا في حلم جميل :sorcerer::sorcerer::sorcerer:

بجد موقف هايل منها بصراحة واثبت اد ايه الإنسانة دي عندها اخلاق واحساس بالأخرين واحساس كمان بالمسئولية.

فعلا المفروض اي واحد فينا يحس انه اخطأ في حق حد أو تسبب في اي ضرر لحد يتأسفله
بجد كلمة أسف دي ليها مفعول السحر والله وانا بجد مجرباها فعلا.

مرة سواق تاكسي كسر عليا كسرة غبية جدا لدرجة خضتني وبعدين جريت حتة صغيرة وراه لحد ماحصلته وجيت جنبه بقوله يعني ينفع كده يعني :036: ؟ في حد يكسر بالشكل ده برده :unibrow:؟ راح قالي مانا قلتلك انا أسف ..... :boat:

طبعا انا كنت في قمة غضبي بس معرفتش انطق بعد الكلمة دي وسكت خالص ومشيت :005:

واكتر من مرة وانا ماشية لو غصب عني كسرت على حد مثلا اول ماييجي جنبي اقوله معلش بجد انا متأسفة جدا والله غصب عني :innocent: بلاقيه بيبتسم ويسكت وكأن شيئا لم يكن مع انه كان ممكن يبقي جاي جنبي عشان يزعقلي ولا يديني كلمتين في جنابي:036:

بس لما الواحد بيحس ان اللي قدامه عنده حتة الاعتراف بالخطأ والإعتذار عنده دي بتهدي جواه كل الانفعالات اللي حصلت نتيجة للموقف.:Angel_anim:
انا كمان بحس اني لو اذيت حد مثلا او تسببتله في اي ضرر ولو غصب عني بحس بتأنيب ضمير اوي واحاول اراضيه بأي شكل وأعوضه عن الأذي اللي تسببتله فيه وبخاف جدا اني لو معملتش كده في الدنيا ييجي في الاخرة يوم القيامة يقتص مني وياخد حقه وقتها هانبقي في عرض ربع حسنة واحدة أو حتى إنه يدعى عليا مثلا بأي حاجة وحشة فعشان كده بقول اعوضه عنها في الدنيا احسن ماتتشالي في الاخرة واتعاقب عليها ويبقي التمن وقتها اغلى بكتييييييييييير.
بس حمد الله على سلامة عربيتك ياأستاذ أحمد وخلاص بلاش تركن عمودي على الرصيف إركن موازي وخلاص :sailor::smartass:

يا جماعة في ناس كتير جدا في مصر عندها ضمير
اسمع اي برنامج فتاوى هتلاقي الناس بتسأل عن حاجات دقيقة جدا
ده معناه ان الناس لسه فيها خير و بيزيد والله مش بيقل

يا سلاااام .. فعلا لسه فيه ناس محترمة.

عكس اللي حصل معايا مرتين تماما :)

أول مرة نازل الشغل الصبح في يوم لقيت الرفرف الوراني اليمين متخرشم كأنه رشق في صاروخ.
و طبعا أبص يمين و شمال و أسأل البواب و لاحياة لمن تنادي, مفيش حد سمع حاجة ولا شاف حاجة كأنها متجرحة بس أو وقع عليها شوية مية مثلا .المهم استعوضت ربنا و قلت خد الشر و راح.

مكملتش شهر عالموضوع دة و نازل الشغل الصبح (أنا حاسس ان هي دي المشكلة :)) ببص في مدخل العمارة لقيت اكصدام خلفي شبه بتاع عربيتي مرمي علي جنب في المدخل!!
رحت علي العربية لقيت الكصدام الوراني مش موجود , وطبعا استخدمت ذكائي الحاد عشان أستنتج أن الاكصدام اللي في المدخل دة هو بتاعي فعلا.
طبعا أنا أسقط في يدي (تجهمت يعني . ييييه قصدي اتمسمرت) شوية و بعدين ندهت علي البواب أسأله علي الحكاية فقاللي أنه صحي الصبح علشان يمسح العربيات لقي الاكصدام بتاعي واقع ورا العربية فشاله عشان ميتسرقش.

بصيت طبعا علي العربية و فهمت اللي حصل. ببساطة واحد سايق لسه مصحيش من النوم ماشي بيحك في العربيات اللي راكنة كلها و أنا كان طرف الاكصدام مفكوك شوية راح حاكك الرفرف الخلفي طبعا (الرفرف التاني مش بتاع الصاروخ) و بعدين خد الاكصدام في سكته خلعه من العربية و كمل عادي خالص .و كالعادة مفيش حد شاف أو سمع حاجة في المقابر اللي أنا عايش فيها.

ناقص بس أقولكم أن أنا مش بركن ركنات وحشة أو متطرفة و ساعة الخبطتين دول بالذات كنت راكن صح الصح في أحسن مكان في الشارع.
انا متخيل أن لما يحصل حاجة بالحجم دة لازم أقف و أحاول أوصل لصاحب العربية أو علي الأقل أسيبله ورقة فيها بياناتي, انما هقول ايه بقي !
ياللا الحمد لله علي كل حال.

ايه الدرس المستفاد من الموضوع دة؟ الاجابة : إياك تركن عربيتك أصلا.
سلام :)

والله نقطة مضيئة

أما موضوع الرفرف بتاع الصاروخ، فربنا يعوض عليك يا أستاذ أحمد

اقتباس:

---

المشاركة الأصلية كتبت بواسطة Ahmad

يا سلاااام .. فعلا لسه فيه ناس محترمة.

عكس اللي حصل معايا مرتين تماما :)

أول مرة نازل الشغل الصبح في يوم لقيت الرفرف الوراني اليمين متخرشم كأنه رشق في صاروخ.
و طبعا أبص يمين و شمال و أسأل البواب و لاحياة لمن تنادي, مفيش حد سمع حاجة ولا شاف حاجة كأنها متجرحة بس أو وقع عليها شوية مية مثلا .المهم استعوضت ربنا و قلت خد الشر و راح.

مكملتش شهر عالموضوع دة و نازل الشغل الصبح (أنا حاسس ان هي دي المشكلة :)) ببص في مدخل العمارة لقيت اكصدام خلفي شبه بتاع عربيتي مرمي علي جنب في المدخل!!
رحت علي العربية لقيت الكصدام الوراني مش موجود , وطبعا استخدمت ذكائي الحاد عشان أستنتج أن الاكصدام اللي في المدخل دة هو بتاعي فعلا.
طبعا أنا أسقط في يدي (تجهمت يعني . ييييه قصدي اتمسمرت) شوية و بعدين ندهت علي البواب أسأله علي الحكاية فقاللي أنه صحي الصبح علشان يمسح العربيات لقي الاكصدام بتاعي واقع ورا العربية فشاله عشان ميتسرقش.

بصيت طبعا علي العربية و فهمت اللي حصل. ببساطة واحد سايق لسه مصحيش من النوم ماشي بيحك في العربيات اللي راكنة كلها و أنا كان طرف الاكصدام مفكوك شوية راح حاكك الرفرف الخلفي طبعا (الرفرف التاني مش بتاع الصاروخ) و بعدين خد الاكصدام في سكته خلعه من العربية و كمل عادي خالص .و كالعادة مفيش حد شاف أو سمع حاجة في المقابر اللي أنا عايش فيها.

ناقص بس أقولكم أن أنا مش بركن ركنات وحشة أو متطرفة و ساعة الخبطتين دول بالذات كنت راكن صح الصح في أحسن مكان في الشارع.
انا متخيل أن لما يحصل حاجة بالحجم دة لازم أقف و أحاول أوصل لصاحب العربية أو علي الأقل أسيبله ورقة فيها بياناتي, انما هقول ايه بقي !
ياللا الحمد لله علي كل حال.

ايه الدرس المستفاد من الموضوع دة؟ الاجابة : إياك تركن عربيتك أصلا.
سلام :)

---

ما تيجي نركز أحسن على المواقف الإيجابية المبشرة بالأمل :)

اقتباس:

---

المشاركة الأصلية كتبت بواسطة OlaOsman

ما تيجي نركز أحسن على المواقف الإيجابية المبشرة بالأمل :)

---

:)
علي فكرة أنا شاركت علشان الموضوع فيه بارقة أمل.
عامة أوعدك أن أول ما يحصل موقف معايا من المواقف الايجابية المبشرة بالأمل هتلاقي موضوع جديد و مليان تفاؤل :)
بس يحصل.

اقتباس:

---

المشاركة الأصلية كتبت بواسطة Goodle

والله نقطة مضيئة

أما موضوع الرفرف بتاع الصاروخ، فربنا يعوض عليك يا أستاذ أحمد

---

شكرا يا Mr. Goodle علي مشاركتك.
و اسف طبعا علي المبالغة "المقصودة" بتاعت الصاروخ , بس كدة أحسن ما أكتم في نفسي و يحصللي حاجة. :)

الدنيا بخير بس احنا اللى بنبص على الحالات الوحشه بس
لسه الدنيا بخير يا حبيبي

مفيش خير فى البلد دى و فى الزمن دا الا قليل جداً... حالات شاذة مشذذة

دا أنا حتى امبارح كنت ماشى فى الطيران و كان فى واحد على يمينى قمت كاسر عليه كسرة كنت هضيعه ..... بس أعمل ايه كنت مستعجل جداً.. محدش بيستنا حد

الدنيا لسه فيها خير

هم لسه مجدين بس اختى الصغير وهى رجعه بظهر العربيه حكت وقطعت باب النوبيرا عملت ايه بقه طلعت ورقه وكتبت عليه انها اسفه على الحادث وكتبت رقم التليفون الخاص به كويس كده
عتقول كويس ربنا يكتر من امثاله
هقول لكم ان اختى اتصلت بى فى العمل تقول تعاله بسرعة واتصلت كذلك بزوجه لياتى هو الاخر
وعند وصولى له وجدت الاتى رجل عمال يزعق وعامل هلاله هو يرد ان نذهب الى التوكيل وهى قلت لا نذهب الى سمكرى امهم من هنا الى هنا وافق على ان ناتى له باب استيراد وبلفرش الداخلى وفعلن ذهبنا واتينا بباب 1200 جنيه له واخذه وخلص الموضوع على كده
ولكن نظرت الى اختى وقلت لها عربيتنا بتخبط وهى وقفه ولا نتكلم:M_yes[1]::M_yes[1]:

لايزال الخير فى وفى امتى الى يوم للقيامه
صدق رسول الله

ممكن عشان هى بنت وكده والبنات عاطفيين شويه لكن دا لو سواق مقرباص هو برده كان هيكتبلك ورقه بس هيقلك
انا الى كسرتهه فــــــــــــــــــــــــ ـــــــــــى حــــــــــــــــــــــاج ه

ورقة ايه و كلا فارغ ايه يا جماعة..
مفيش الكلام دا الناس بقت وحشة قوى قوى.... يعنى شوف الراجل قليل الأدب تسيبلوا ورقة و يزعق فيها و هيا بنت... لو أنا كنت مشيت و سبته....

اقتباس:

---

المشاركة الأصلية كتبت بواسطة yooyaa

ورقة ايه و كلا فارغ ايه يا جماعة..
مفيش الكلام دا الناس بقت وحشة قوى قوى.... يعنى شوف الراجل قليل الأدب تسيبلوا ورقة و يزعق فيها و هيا بنت... لو أنا كنت مشيت و سبته....

---

انت مصّر تبين لنا اد ايه انت محترم يعني ولا ايه :_Alshmokh08[1]:

اقتباس:

---

المشاركة الأصلية كتبت بواسطة yooyaa

مفيش خير فى البلد دى و فى الزمن دا الا قليل جداً... حالات شاذة مشذذة

دا أنا حتى امبارح كنت ماشى فى الطيران و كان فى واحد على يمينى قمت كاسر عليه كسرة كنت هضيعه ..... بس أعمل ايه كنت مستعجل جداً.. محدش بيستنا حد

---

لا والله شاطر !!!!
""إذا بُليتم فأستتروا""