الموضوع: مجانيه التعليم الجامعى "حابب اعرف رأيكم دلوقتى"

المشاركة الأصلية كتبت بواسطة sayedmatrix

انا مؤيد بشدة لالغاء مجانية التعليم الجامعي لان وبمنتهي الصراحة مفيش تعليم حقيقي ومحترم في الجامعات الحكومية لكن بشرط يكون في ضمانات لتطوير مستواه لكن مش نلغي المجانية ونسيبه زي ما هوه والا يبقا كده تهريج

مهو الاقتراح اللى اتناقشنا فيه كان ان اللى حيتم توفيره يتم توجيهه لتطوير منظومه التعليم الاساسي والفنى وزياده اعداد المدارس وتطوير مستوى الجامعات على مراحل محدده وبخطه واضحه ومعلنه.

المشاركة الأصلية كتبت بواسطة الاستاذ

لا طبعا ممتلغيش اومال انا بدفع ضرايب لية
وبعدان الغنى عنده بدائل
انما الموظف ولا الى ساكن فى ايجار جديد يعمل اية
حسوا بالناس قبل ما تقرروا حاجة

حضرتك بتدفع الضرايب مفترض علشان تلاقى عيشه كريمه من تعليم وصحه ومواصلات وخلافه ولكن احنا بنتكلم على تطوير بند موجود بالفعل لان حضرتك التعليم مجانى موجود بالفعل بس بيخرج منتج سئ جدا وغير متوافق مع متطلبات سوق العمل والطالب بيحس ان مفيش مسؤليه عليه لانه مهما سقط بيتعلم ب 80 جنيه الى 160 جنيه سنويا فالموضوع رفاهيه اكتر منه تعليم انما لما التعليم الاساسي والفنى يخرج انسان محترم متعلم صح اكيد حيكون افيد من طالب جامعى متخرج وغير مفيد اطلاقا
وكامل احترامى لرأى حضرتك .

المشاركة الأصلية كتبت بواسطة misry

بالنسبة لي كطبيب اسنان التعليم الجامعي لم يكن مجاني ابدا بالعكس صرفت الاف الجنيهات على الخامات والادوات الغير متوفرة في الكلية أو اللي بيعتبروها عهدة ومش بيطلعوها او على المرضي ...

ومعلش يعني مش علشان يخفضوا المصروفات في الميزانية يقوموا جايين باصين للتعليم والصحة والدعم وفي نفس الوقت يزودوا ميزانية الداخلية والجيش ...!!!

يمكن يكون كلام حضرتك صح بس الفكره حضرتك صرفت مصروفات كتير علشان تقدر تتعلم لان الحكومه متقدرش توفر الحاجات دى ل1000 طالب فى كل دفعه بس لو النظام اتطبق اللى زى حضرتك الحكومه حتوفرله جميع احتياجاتهه لان ساعتها حيكون عدد الطلبه اقل بكتير فاللى داخل بمنحه كامله حيتوفرله الحاجات اللى حضرتك صرفت عليها مجانا بدون حمل زياده سواء على الدوله او الطالب
والاقتراح مش بيشمل ان اللى يتم توفيره يتصرف على حاجات تانيه غير التعليم انما المفروض يتوجه لتطوير التعليم الاساسى والفنى وبناء المدارس وتحسين التعليم الجامعى .

المشاركة الأصلية كتبت بواسطة amr011111

الكلام اللى تحته خط ده يحصل لو احنا فى اليابان ان اللى جايب 50% هيسقط فى الامتحان بالعكس ده هيقبل جداً لو معاه واسطه
ولنا فى امتحانات الطب الشفهيه أسوة سيئه:)

زى كلية الشرطه تلاقى اللواء ولاده كلهم شرطه واللى شغال فى بنك بيورث لابنائه رغم ان فيه اعلى من ابنائه بكتير

وكان فيه من فتره واحد خريج كلية اقتصاد وعلوم سياسيه انتحر لانه غير لائق اجتماعياً رغم ان كل الدكاتره اللى عنده فى الكليه كانوا بيشكروا فى تميزه بطريقه عاليه

انا مش بطالب بحاجه تانيه غير الغاء مجانية التعليم
بطالب بفرض ضرائب زياده على المتسربين من التعليم
لان دلوقتى فيه ناس كتير بتلاقى ان التوك توك احسن من التعليم تلاقيه مسرب عياله من التعليم ويجيب لابنه توكتوك نظير انه بيدخله شهريا 5000 الاف جنيه
ففى الاخر ده بيأثر بالسلب على المجتمع لان نسبة الاميه لما تزيد هتلاقى ان احنا هنفضل من دول العالم التالت لمئات السنين

ايوه حضرتك بس اللى حيجيب 50% مش حياخد منحه تعليميه من الحكومه فحيتعلم على حسابه وبما انه جايب 50% فغالبا حيفضل فى الكليه مش حيتخرج منها ثم ان الامتحانات المفترض تكون بنظام محترم ميسمحش باي تجاوزات ولو حصلت تكون استثناء مش اساس لانها بالفعل موجوده حاليا فى كل المجالات والفساد مش حينتهى فى وقت قصير ولكن احنا بنحاول نلاقى طرق نحسن بيها الوضع الحالى
واقتراحك محترم جدا بخصوص فرض ضرائب على المتسربين ولكن برضه لازم التعليم الاساسي يتطور علشان يطلع الفئه دى فئه محترمه مفيده للمجتمع

المشاركة الأصلية كتبت بواسطة reda elgohary

يجب زيادة ميزانية التعليم والصحة والزراعة ،، مش السلاح والأمن ،، محتاج نتطرو ونواكب العصر مش نزود القمع ،، وأنا مع مجانية التعليم .

الاقتراح مش الغاء مجانيه التعليم ولكن الغاء مجانيه التعليم الجامعى فيكون التعليم الاساسي افضل وكذا التعليم الفنى لتخريج دفعات متوافقه مع متطلبات سوق العمل

المشاركة الأصلية كتبت بواسطة حسام الغرباوي

مؤيد جدا


اعرف ناس فاشلة بقالها في الكليات فوق ال9 سنين ....اهو الناس الفشلة دي الدولة بتصرف عليهم وهما ولا فدماغهم



مجانية التعليم مصيبة كبيرة ,,, بتساعد الفاشل انو يفشل اكتر ...وبتيجي علي المجتهد في تعليم تعبان


انا شايف ان لازم يطبق نظام المنح الكاملة للمتفوقين والمنح الجزأية للفئة الفوق المتوسطة ..دون ادنى ذلك يكون برسوم بسيطة


مع اهمية ووجوب .....ان اي حد يسقط في سنة يدفع رسوم كاملة ..تزيد لو سقط تاني وتزيد لو سقط تالت إلا ان يتم فصلة

هو ده اللى بنتكلم فيه المتفوق اللى يستحق ان الحكومه تساعده علشان يتخرج يفيد البلد من حقه يتعلم تعليم محترم ومجانا انما اللى داخل يتسلى ويصاحب ويتدلع يتدلع بفلوسه .
تحياتى .

ليس الاختيار بين الابيض او الاسود هو القدر دوما .. فلست مع المجانية و لا مع التسعيرة ! .. ارى ان المساهمة المالية قد تكون ضرورية احيانا .. بالقدر الذي يرتقى بالتعليم .. الى تعليم حقيقي فعال .. دون قصد الربح منه .. و لن ينجح ذلك .. الا بضمانة و تحرك الدولة تشريعيا و تنفيذيا .. لتجريم و مطاردة الدرس الخصوصي و فاعليه .. المحسوبية و مدمنيها .. و اثابة كل معلم او استاذ مجتهد داخل سور المدرسة او الجامعة .. فاستقطاب جزء من مصروفات التعليم الموازي و ضخه في دولاب التعليم الرسمي .. سيعود بالفائدة على الجميع .. بتحسين المحتوى التعليمي .. و توفير وقت الطالب للتحصيل الحقيقي .. و رفع العبئ الجزئي عن اسر الطلاب .

المشاركة الأصلية كتبت بواسطة kazamodia

انا في كلية حكومية فيها نظام بمصاريف بياخدوا من الطالب 20 الف في السنة
الغريب ان كل سنة عدد الطلاب في القسم ده بيزيد والمصاريف كمان بتزيد
في الفترة دي الكلية حصل فيها تجديدات وتغييرات جذرية وعاملين لها مخطط ل 2020 هتبقى حاجة تانية خالص
نفسي الناس تروح تجارة واداب ويشوفوا الناس اللي هناك اللي رايحين يعيشوا حياتهم ولا هاممهم تعليم ولا كلام من ده وبيسقطوا كل سنة

credit hours ?

يا ريت تقولى لو فى هندسة جامعة ايه ؟ عشان لو القاهرة انا لى كلام كتير اوى محتاج اقوله