اخيرا استلمت لانوس S 2008
الحمد لله والشكر لله
الحمد لله استملت العربية لانوسs 2008 من المعادي بعد عذاب في خلط الالوان والموديلات هناك عشان دي كانت اخر دفعة للانوس والله اعلم كانوا بيضحكوا عليا ولا ايه لان اللون اللي كنت حاجزه واتغير مكنش موجود
واشكر تعليقات كل الاعضاء في قسم الدايو عشان فادوني كتير عنها
انا حبيت اشارككم تعليقاتي علي العربية بعد اسبوعين من استلامها مع العلم اني مش بخرج بيها كتير عشان برجع متاخر من الشغل
1- العربية عشان مش متعود عليها فبطلت مني كتير في الاول وسقفت كتير
2- العربية بتحدف يمين بسيط وده بيخليني ماسك الدركسيون علي طول
3- مش عارف ليه الدركسيون خفيف اوي مع اني ركبت عربية صاحبي لانوس Sُe 2000 وكنت حاسس مع بداية لف الدركسيون بيبقي تقيل شوية وده بيديها ثبات شوية علي الطريق يعني حركته اتقل مع بداية دورانه يمين او شمال
4- مكونات العربية من الداخل جيدة ومش عارف الاعضاء معترضين علي ايه
5- موضوع السنتر ممل جدا عشان بيشتغل من باب السواق بس وكنت عايز اعرف حد ركب ريموت لكل الابواب في التوكيل ومش بيخرج برا الضمان ولا لا ولو بيركب في التوكيل ينفع اجيب انا الجهازوكمان الانذار
6- الفرامل لما ادوس عليها بثبات رجلي(يعني مش بزود في الضغط) بلاقيها قفشت لوحدها مش عارف ده طبيعي ولا ايه
7- رش الاكصدام وحش جدا عشان وانا بركن العربية كان فيه حجر قدامي ومخدتش بالي وحكيت في الكصدام الامامي من تحت ولاقيت ان الدهان كرمش(مش بس تجريح اكنه لاكيه ولسه منشفش)
8- الفتيس بيعمل صوت مع المارشدير كتير بس مش دايما مع اني بدوس دبرياج للاخر
9- النور الامامي مضايقني اوي عشان ضعيف حتي مع العالي وحاسس ان الكشاف الشمال ضارب يمين شوية (يارب تكون بتتظبط في التوكيل)