الموضوع: ضرورى لو سمحتو ازاى اجيب مكنة مضمونة

المشاركة الأصلية كتبت بواسطة م/أحمد عبد الفتاح

ماتقدرش تحكم عالموتور صح إلا بالحمل يعنى والموتور متركب والعربية ماشية
بس فيه شوية حاجات ممكن تشوفها فى الموتور ممكن تنفعك مبدئياً فى تقرير حالة الموتور نوعاً ما:
- تشوف شكل الموتور بالنظر شكله نضيف ولا فيه أثار زيت مسيلة فى كل حته .
- فيه مثلاً كسور أو شروخ ودان تثبيت ملحقات الموتور أو اماكن تثبيت القواعد ولا كله سليم .
- تشيل مقاس الزيت وتشوف أثار الزيت إللى عليه نضيف ولا فيه شوائب وتشمه محروق ولا ريحته عادية لأن ده مقياس إذا كانت العربية اللى كان فيها الموتور ده بيتعملها صيانة ولا لأ.
- تفك غطا الزيت اللى بتعبى منه الزيت (إللى فوق التاكيهات ) وتشوفه هل أثار الزيت إللى عليه فيها شوائب وكربون أو مطحن ولا الزيت نضيف ومش محروق وتشم الغطا كمان لو فيه ريحة زيت محروق.
-تشوف كيعان تثبيت خراطيم المية سليمة ونضيفة ولا فيها تاكل او كسور او شروخ.
- تلفف الحدافة أو التقسيمة وتسمع هل يوجد صوت إحتكاك أو أى صوت داخلى غريب.
- تشوف مانيفولد العادم بصباعك عليه كربون إسود يبقى عادى ولا عليه اثار زيت .
- تشوف الحركة الميكانيكية للكاربتير أو البوابة كويسه ولا بتزجن فى حته وكمان نضيف من جوه ولا عليه هباب اسود.
- تفك البوجيهات وتشوف هل عليها زيت ولا شكلها بنى يبقى الحرق بتاع الموتور ده كان كويس ولو كانت البوجيهات جديدة وبيضا يبقى حد مغيرهم وابعد عن الموتور.
- لو قدرت تحل طبة زيت الموتور وتاخد شوية زيت عينه تشوفهم فيه شوائب ولا معادن ولا حاجه غريبة ولا ريحة حرق برضه مايضرش.
- وطبعاً يكون معاك ميكانيكى كويس برضه بيبقى ليهم نظرة .
دى كلها فحوصات مبدئية زى ماقلتلك وبرضه الفيصل هو تجربة الموتور على الحمل.
وبالتوفيق إن شاء الله

الف شكر يا هندسة على المعلومات القيمة دى هحاول اعمل الكلام ده ان شاء الله وربنا يوفق ويطلع كويس المرة دى بشكرك أن حضرتك رديت لأن قسم المرسيدس خصوصاً وبذات المواضيع اللى تبع المرسيدس القديم محدش بيعبرها

هو اهم حاجة فعلاً حد يشوف المكنة قبل ما تشترى حاول تجيب صنايعى بتتعامل معاه يشوف بنفسه اياً كان هنجيب منين لأن دى الغلطة اللى انا عملتها وبعد ما جبتها للميكانيكى طلع ما عندوش ضمير ركبها وبعد ما ركب سابنى على عماية لحد ما لقيت فيها مشكلة ورجعتلو قللى مش حلوة والمكنة خفيفة حاول تغيرها بس اتفقت مع التاجر انى هرجعهالو وأخد فلوسى و بدور اهو بأذن الله هاقولك لو رسيت على حد بس لو عندك حد معرفة ما تسيبوش و برضو هات ميكانيكى معاك يكشف لأن معظم اللى بيبعوا تجار ميقدروش يقيموا المكنة وهى على الأرض

المشاركة الأصلية كتبت بواسطة miz0o0o0vic

هو اهم حاجة فعلاً حد يشوف المكنة قبل ما تشترى حاول تجيب صنايعى بتتعامل معاه يشوف بنفسه اياً كان هنجيب منين لأن دى الغلطة اللى انا عملتها وبعد ما جبتها للميكانيكى طلع ما عندوش ضمير ركبها وبعد ما ركب سابنى على عماية لحد ما لقيت فيها مشكلة ورجعتلو قللى مش حلوة والمكنة خفيفة حاول تغيرها بس اتفقت مع التاجر انى هرجعهالو وأخد فلوسى و بدور اهو بأذن الله هاقولك لو رسيت على حد بس لو عندك حد معرفة ما تسيبوش و برضو هات ميكانيكى معاك يكشف لأن معظم اللى بيبعوا تجار ميقدروش يقيموا المكنة وهى على الأرض

المشكلة يا باشا في الميكانيكي اللى بيفهم وعنده ضمير ده اهم من المكنة
لأن مشكلتى ازاى الاقي الميكانيكي ده المكن مرمى عالأرض في بورسعيد وفي الحرفيين مش لاقي اللى يشيله بس للأسف مفيش ميكانيكي عنده ضمير ولو حضرتك شفت موضوعي كنت هاتعرف ليه بقول كده