كيف تخفض استهلاك البنزين لل m11

**MACATHIUS** · 19-01-2015 01:12 PM

انا عاوز احكيلكم تجربة خاصة لحاجة كانت مضايقانى جدا فى عربيتى
الحقيقة ان انا لما اشتريتها كنت سعيد و مكتفى بكل ما فيها
الا حاجة واحدة
استهلاك البنزين
جيبتها مستعملة و وديتها التوكيل و صرفت عليها صيانة فى التوكيل ما استرخصتش
المهم
لاحظت ان استهلاك البنزين عالى
انا يوميا بعمل حوالى 70 كم من و الى العمل من العبور للتجمع الخامس
و الحقيقة انها بتعمل تقريبا 12 لتر لكل 100 كم و احيانا اكتر
روحت لابانوب الميكانيكى و قالى هى استهلاكها عالى ... و الحقيقة ان فى المقابل باخد اداء حلو و تسارع مرضى فى المواقف المطلوبة.. بس....
المهم بقيت اركنها يوم و اخدها يوم عشان المصاريف لانى بقيت بامون بنزين فى الشهر حوالى 190 لتر.. بتاع 500 جنيه ... للشغل بس دا غير مشاوير البيت و مشاويرى الشخصية

المهم ابتديت افكر ازاى احل المشكلة
بقيت اخلى العداد يقرالى الاستهلاك وا حطه قدامى بدال الساعة (بالضغط على الزر الايمن فى العداد امام السائق)
القرايات بتبقى سايق و شايف القرايات المتغيرة فى المواقف المختلفة
ظبطت رجلى و قللت التسارع و قللت جدا مرات استخدام الفرامل و الوقوف و الانطلاق بقدر الامكان
و وصلت لدرجة انى كنت بشوف الاستهلاك بيوصل لغاية 2.5 لتر لكل 100 كيلو على الدائرى و لمدة طويلة .. طبعا دا مش المتوسط لكن دا على الدائرى بس
بقيت اظبط رجلى مع الار بى ام و مع عداد السرعة كم/س بحيث ابقى حوالين 2000 ار بى ام و حوالين 80 كم/س ... هى دى السرعة اللى بتعمل افضل كفاءة optimum efficiency

و صلت لمتوسط استهلاك 5.8 لكل 100 كم و بحاول اقلل كمان مع الوقت
بامون بنزين حوالى 90 او 95 لتر شهريا (للشغل بس )
و باصرف نص او اقل من نص اللى كنت باصرفه بطريقة سواقتى الاولى

و شكرا لحسن استماعكم

**mohbasyouni** · 19-01-2015 01:22 PM

طريقة السواقة عامل مهم جدا لتقليل استهلاك البنزين شكرا لنقل التجربة

**Haitham Gamal** · 19-01-2015 01:25 PM

شكرا علي المعلومات الجميلة دي انا بردو بشكي من الموضوع دة وبحاول اظبط سواقتي وهشوف الفرق ان شاء الله يكون مرضي

**MACATHIUS** · 19-01-2015 02:23 PM

خد بالك كمان الارض غير الممهدة او المتسفلتة بس خشنة او اى قلة فى كفاءة الرصف و الشوارع الداخلية ... كل دول مهما حاولت استهلاك البنزين مش بيقل عليها
السواقة بسرعة ثابتة هى كلمة السر لاستهلاك امثل