good very good man
عرض للطباعة
good very good man
موضوع اكثر من رائع
و ايه المشكلة الفعلية لو اتوقف عال N في النص بين النقلتين ؟
هل القواعد واحدة لكل الجيبات ؟
و حصل مرة بعد التعشيق من 4 Full time لـ 2WD استمرار تقل في الكبالن الامامية كانه محصلش disengage
فا حولنا من D إلي R و مشينا حتة بسيطة
و بعدها حصل صوت طك كدة بهبدة و فك التعشيق ... فهل دا عادي ؟
ياريت شرح المحاذير و المشاكل المتكررة FAQ بحيث تكون مرجع يا هندسة
جزيل الشكر والتقدير
- لو وقفت على الـ N بتاع فتيس الغرز غالباً العربية مش حاتجيب معاك الـ 4low ولازم تبطل العربية وتدور تانى وترجع فتيس الغرز للوضع الأولانى وبعدين تنقل على الـ 4low مرة واحدة .
- الـ N بتاع فتيس الغرز بنقف عليه فى حالة واحدة بس لو العربية عطلانة لاقدر الله وحاتتقطر وكمان فى الحالة دى بنجيب الفتيس الاوتوماتيك كمان على الـ N
- صوت الهبدة لما تعشيق الـ 4low فك مش عادى وفى الغالب ده ناتج من قلة استخدام الـ 4low وده مش معناه انك تمشى بالعربية على الـ 4low فترة كبيرة - لكن لازم كل فترة حوالى شهر او شهرين مثلاً تجيب الـ 4low وتمشى بيه شوية حوالى ١٠٠ متر مثلاً على ارض رملية وبعدين ترجع تانى علشان بس تضمن إن التروس والميكانيزمات بتتحرك كويس ومابتقفشش ومابتكونش رواسب من برة تعوق حركتها. كمان راجع مستوى الزيت فى الكورونة الأمامية وفتيس الغرز (Transfer Case) ممكن يكون ناقص.
- المحاذير والـ FAQ أنا ذكرتها فوق ولكن حالخصها تانى :
* علشان نحول على الـ 4low لازم تكون العربية واقفة او متحركة بسرعة لاتزيد عن ٤ كم/ساعة .
* علشان نحول على الـ 4low نجيب الفتيس الاوتوماتيك على الـ N وبعدين فتيس الغرز على 4low وبعددين الفتيس الاوتوماتيك على الـ D.
* وانت ماشى على الـ 4low ماتزودش بأى حال من الاحوال عن سرعة ٤٠ كم/ساعة .
* لو عاوز تجرب الـ 4low يستحسن تجربه على ارض رملية أو مزحلقه شوية.
* لما تحول على الـ 4low بتنور قدامك فى التابلوه لمبتين برتقالى (او بتتطلع رسالتين على التابلوة) واحدة 4LOW وواحدة ESP OFF ودول معناهم ان العربية ماشية على وضع الـ 4low والتانية معناها ان نظام منع الانزلاق تم إلغاؤه (ولو عاوز اقولك بيتلغى ليه شخلل جيبك :) )
* لو انت ماشى على ارض مزحلقة من الميه أو مطينة طبقة خفيفة الأفضل هو الـ 4High لأن بيكون الـ ESP شغال ومش ملغى وده بيمنع العربية من التزحلق والعومان .
*وطبعاً إنت مش بتمشى على الـ 4low إلا عند الضرورة وبسرعة لاتزيد عن ٤٠كم/ساعة مش غلاسة ولا حاجه ده لأن ممكن يحصل تاكل للعجل لو انت ماشى على ارض مسفلته وخصوصاً لما تحود بالدركسيون وكمان علشان العزم بتاع العجل بيزيد حوالى ٣ اضعاف فطبعاً ده إجهاد على المنظومة ككل ومش ناقصة سرعه كمان وإلا حتلاقى رسايل عمالة تطلع فى التابلوة وزمامير وفرح كلها بتقول سخونة فى الفتيس أو فى 4WD ولو استمريت على كده حتحصل مشاكل اكبر الله يسترها معاك ومعانا كلنا منها.
* الوضع بتاع الـ 4High مالهوش أى محاذير غير إنك تحول عليه فى اى وضع العربية واقفة او متحركة بسرعة لاتزيد عن ٨٠كم/ساعة ويستحسن برضه ماتزودش عن السرعة دى وانت ماشى عليه.
وتحت أمرك فى أى إستفسار تانى .