الموضوع: أنا محتاج نصيحة في التعامل مع هذه الإستشارية

السلام عليكم ورحمة الله وبركاته
مساء الخير

ربنا رزقني بـ مولودة من 23 يوم والحمدلله عملنالها كل الفحوصات والتحليلات اللازمة للإطمئنان عليها في فترة بقائها في المستشفى وكانت 3 أيام تتلقى الرعاية هي ووالدتها وكل النتائج كانت تدل على أن صحتها بخير ولله الفضل والحمد

كتب لهم الخروج بعد 3 أيام بعدها ب 4 أيام أصيبت بالكحة وكنت متخيل إنها حاجة بتصيب كل الأطفال فكلمت الصيدلي وقالي مفيش دواء للسن دا بس هتروح لوحدها وطمئني طالما مفيش حرارة
بعدها بيومين لاحظنا وجود بلغم فخدناها للطوارئ في نفس المستشفى اللي إتولدت فيها
كان عمرها 9 أيام في يوم ذهابنا للطوارئ

جه دكتور فلسطيني وكشف عليها بالسماعة وقال طبيعية مفيهاش حاجة , زوجتي قالتله عندها بلغم لازم يخرج بصلي وقالي أنا دكتور وبقول إنها طبيعية فقلتله حضرتك دكتور أطفال ؟ قالي لاء بس شايف الحالة ماتستدعيش بس لو تحب هجبلك دكتور أطفال

نادى دكتور الأطفال وكان دكتور مصري طلب جهاز يكشف نسبة الأوكسوجين ولقي نسبة الأوكسوجين 88 قالي لاء أنا لازم أنادي الإستشارية تشوف حالتها بنفسها , قلتله ليه ؟ فيه إيه ؟ قالي الأوكسوجين لازم يبقى 97 يزيد درجة أو يقل درجة لكن مش كدا , وخرج بسرعة ينادي دكتور أعلى منه .

كان عندي الدكتور الفلسطيني وبيحاول يبرر موقفه وعمال يتكلم ومكنتش مهتم اسمع منه أي كلمة كل اللي كان شاغل بالي وضع بنتي لإن الدكتور المصري قلقني , جه الدكتور ومعاه دكتور وإستشارية و 3 ممرضات

أصبح حول سرير طفلتي 7 أشخاص 3 أطباء و استشارية و 3 ممرضات كان المنظر مرعب ! , كشفت عليها الإستشارية وهي لبنانية الجنسية ( وقالت البنت عم تختنق ) وطلبت جهاز أوكسوجين لما حطوا الجهاز إرتفعت نسبة الأوكسوجين إلى 93 فطلبت جهاز شفط للبلغم وشفطت البلغم ورفعت الأوكسوجين و بدون أجهزة إرتفعت نسبة الأوكسوجين إلى 94 بهواء الغرفة بدون أي تنفس صناعي أو بخار

ونادتني بالخارج خرجت وكانوا الـ 3 أطباء يتناقشون في حالة إبنتي فقال لي الدكتور الفلسطيني الحالة لا تستدعي إبقاء في المستشفى و تدخل ال2 أطباء وأخبرني بضرورة بقائها تحت الملاحظة لصغر سنها في التنويم العادي و أنا وافقت فورًا على بقائها , فقلتلهم أنا عايز أطمن فيها إيه البنت ؟ قالي الدكتور إحنا خايفين عشان سنها صغير فجت الإستشارية وقالت البنت محتاجة عناية مركزة وممرضة فوق راسها 24 ساعة قلتلها ليه ؟ قالت ممكن تختنق في أي وقت البلغم كثير جدًا , فقلتلها طيب ليه ماتشفطوش البلغ كله ؟ قالت مينفعش لإن عملية الشفط بتجرحها قلتلها طبعًا موافق , فالطبيب المصري هو الطبيب الاخر قالوا لها ممكن التنويم العادي ونتابعها مفيش داعي للعناية المركزة قالتلهم ( he accepted ) ومشيت

طبعًا أنا من قلقي الشديد وافقت على كلام الإستشارية بدون إهتمام بأي رأي آخر وخصوصًا إن العناية مش هتضر البنت

أدخلت العناية المركزة و كان القرار صادم جدًا لوالدتها وحاولت أخفف عنها قلتلها أنا إخترت تكون في العناية لإن فيها رعاية أفضل حتى تطمئن أنها بخير والإجراء لزيادة الإطمئنان مش لخطورة الحالة

أمضينا ليلة صعبة جدًا بعد أن غادرنا المستشفى بدونها وذهبنا في الصباح الباكر وكنت قد سبقت زوجتي لمعرفة نتائج التحاليل طلبت منها الإنتظار بالخارج ودخلت وكانت المفاجأة الصادمة الإستشارية تنتظرني في غرفة العزل ( نعم أدخلوا إبنتي غرفة العزل بداخل العناية المركزة )




وطلبت مني إرتداء كمام وقفازات و شيء على جسمي وقدمي قبل أن أدخل

فقلت للإستشارية عزلة بنتي ليه ؟ قالت لي إبنتك مصابة بفيروس خطير جدًا ومعدي وقاتل لذلك إضطررنا لعزلها حتى لا تنشر الفيروس في بقية الأطفال هنا , قلتلها خطورته لأي درجة ؟ قالت قاتل ! قلتلها يعني بنتي هتعيش ولا لا ؟ قالتلي ( ماحدا بيعرف ) فيه أطفال بيحتملوا وفيه لا قلتلها مفيش علاج ليه ؟ قالت ابقائها تحت الملاحظة لفائقة فقط

كنت في صدمة شديدة و قلتلها اسم الفيروس إيه ؟ وجالها منين ؟ وفين التحاليل ؟ إنهلت عليها بالأسئلة و كانت إجاباتها كلها بمصطلحات طبية صعبة الفهم , طلبت منها كتابة اسم الفيروس في ورقة حتى أستشير أطباء آخرين فكتبتلي اسم الفيروس ( RSV - Respiratory Syncytial Virus )
فطلبت منها أن لا تخبر زوجتي أبدًا بهذا الأمر , وخرجت وأخبرت زوجتي أنها بخير و بإمكانها أن تدخل ولكن كإجراء روتيني يجب أن ترتدي تلك الأشياء التي سيعطونها لها قبل الدخول

فدخلت زوجتي و بدأت بسؤال الدكتورة عن حالة إبنتنا للإطمئنان عليها وكانت تحضر معها ملابس للخروج ( كانت تعتقد أنها ستخرج معنا ) فتفاجأت بأن الدكتورة وأمام زوجتي أحضرت طاقم الممرضات وبدأت بتأنيب الممرضة التي دخلت بدون أن تحكم إغلاق الباب وقالت لهم أن هذه الغرفة فيها فيروس قاتل وسيقتل الخدج ( أمام زوجتي ) أصيبت بالهلع وبدأت بالبكاء الشديد و سؤال الدكتوره عن حالة البنت و تلك الحيوانة لم تخرج كلمة واحدة لطمئنتها فخرجت منهارة جدًا واغمى عليها

وبعد أن افاقت و أخبرتها أن الفيروس يمكن السيطرة عليه ( رغم أني لحظتها كنت أعتقد أنه سيقضي على إبنتي ) وطلبت أن تذهب للعناية وذهبت على كرسي متحرك لترى إبنتها

خرجت من المستشفى بعد أن مضى اليوم الأول إلى دكتور صديق يعرف أطباء أطفال وأخذت موعد صباح ثاني يوم باكرا و ذهبت ثاني يوم وأخبرت الدكتور اسم الفيروس فقال لي هذا فيروس عادي جدًا ولا يقتل أبدًا ويصيب كل الأطفال وهو منتشر بالجو فقلت له ما أخبرتني به الإستشارية قال دا كلام مخيف لإنه صادر من إستشارية هي أدرى بالحالة ولكن دي هتبقى حالة غريبة , سبته وروحت لدكتور تاني قالي نفس الكلام , رحت لـ 6 أطباء وجميعهم أجمعوا على نفس الأمر ( الفيروس عادي جدًا ) ولكن كلهم متحفظين لإن الكلام صادر من إستشارية , فجالي شعور إن الموضوع فيه مبالغة من الإستشارية المهم دكتور منهم إقترح إني أقول لها إني أنقلها مستشفى تاني يشوفوا حالتها وأنقلها عنده يشوفها بنفسه فطلب تقرير طبي بالحالة

ثالث يوم روحت للإستشارية وأنا نفسي أنتقم منها على اللي عملته في زوجتي ولكن خوفًا على إبنتي لإنها عندها تمالكت نفسي وطلبت تقرير قالت لي هطلعها هتموت فورًا قلتلها هطلعها في سيارة اسعاف عندكم ولا أجيب من المستشفى التانية ؟ قالت موجود سيارة إسعاف بس لازم أتأكد إنهم هيحطوها في عناية مركزة بنفس الدرجة اللي هنا قلتلها إكتبي تقرير بالمطلوب توفره قالت طيب تعالى نروح نشوف البنت وروحت معاها للعناية ولقيتها لمت الممرضات واتخانقت معاهم عشان مفيش ممرضة عند البنت وعملت نفس اللي عملته أمام زوجتي بس والله جالي شعور إنه فيلم

المهم نزلنا العيادة و راحت تكتب التقرير وطلبت في التقرير عناية مركزة وغرفة عزل و ممرضة متواجدة 24 ساعة في غرفة العزل وكتبت نسبة الأوكسوجين و نبض القلب و كل علاماتها الحيوية بدون أجهزة ونوع العلاج المقدم , وسبتها تكتب التقرير وروحت أشوف البنت ورجعت لها لقيتها مش موجودة و مكملتش التقرير وكلمتها قالتلي بكرة هبعته للمستشفى قلتلها أنا عايز التقرير حالًا إنتي فين قالتلي عندي عملية مش فاضية حاليًا بكرة عدي خد التقرير

عديت رابع يوم صباحا و أخدت التقرير وروحت للدكتور قالي البنت مفهاش حاجة ودي مش عناية مركزة دي غرفة عادية العناية بيكون على الطفل أجهزة أخرى الأجهزة دي بتقرى النبض و العلامات الحيوية الأخرى مفيش أي جهاز لمساعدة الطفلة على التنفس أو إبقاءها على قيد الحياة وكل علاماتها طبيعية
قالي هي عليها جهاز أوكسوجين ؟ قلتله لاء بتتنفس عادي قالي روح هاتها قلتله مش هقدر أنا خايف يكون كلامها صحيح ولو بنسبة 1% قالي طيب هاتها بإسعاف وروحت للدكتورة
عشان تجهزلي البنت وأخدها بالإسعاف تفاجأت بإنها بتقولي خدها بسيارتك قلتلها مش بتقولي هتموت فورًا ؟ قالتلي ( فيك تاخدها بدون سيارة إسعاف بس توديها للحكيم فورًا ! ) طبعًا اللحظة دي تأكدت إن كل اللي حصلي فيلم عشان تبقيها في العناية المركزة أكبر قدر ممكن من الأيام ودا لإن الليلة مكلفة جدًا 5 آلاف و البنت مش معمولها تأمين صحي

أخدت البنت ووديتها للدكتور أنا وزوجتي وحكيتله عن وضع زوجتي الصحي إن لو فيها حاجة ميتكلمش إلا لما أبقى معاه لوحدي , لقيته كشف عليها وقال لزوجتي ( لفي بنتك وخديها للبيت ) البنت مفهاش حاجة
لا تتخيلوا وقع العبارة دي كان عامل إزاي علينا كنا في حالة مايعلم بيها إلا ربنا
خدناها وطلعنا على دكتور تاني في مستشفى تانية قال نفس الكلام

البنت عندنا في البيت بدون أجهزة خالص ( لا أوكسوجين ولا بخار من 10 أيام ) بتتنفس الحمدلله طبيعي جدًا والبلغم راح و الكحة خفت وعاشت بدون حتى أدوية ( اللهم لك الحمد والشكر حتى ترضى )

وأنا حاليًا عندي رغبة شديدة في تقديم شكوى في الإستشارية لإدارة المستشفى
مش عشان المبالغ اللي أخدتها بالكذب والنصب , عشان الرعب اللي عملته لزوجتي وليا 4 أيام بنتي في العناية منعانا من لمسها حتى ولا قالت كلمة وحدة لطمئنتنا ووالدتها في حالة مايعلم بيها إلا ربنا

أخد حقي من الإستشارية دي إزاي ؟ علمًا إني كلمت الإدارة وأخدت موعد معا المدير ولكن مش حاسس إني كدا هردلها اللي عملته فينا ولكن اللي مخليني أتردد إن الحمدلله بنتي عندي بألف خير وزوجتي تماثلت للشفاء من أثار الصدمة علمًا إنها تعرضت للإغماء و حصلها تشنجات أول مرة تصيبها غير الحالة النفسية اللي كانت فيها في الأربع أيام دي

المشاركة الأصلية كتبت بواسطة eslam atia

حسبنا الله ونعم الوكيل
ربنا ينتقم منها اللهم امين
والحمد لله ان بنتك في حضنك بالف سلامة
وربنا يباركلك فيها ويبعد عنها كل مكروه وسوء هي وزوجتك اللهم امين
اقل واجب في حقها انك تشهر بيها

اللهم آمين
جزاك الله خيرًا
نفسي أسلك الإتجاه القانوني وآخد حقي و أبعد أي حد عن شرها