صوت تصفير ورجرجه و خشانه فى الفرامل .. واتحل الحمد لله .. فيكترا بى
السلام عليكم يا شباب .. عذرا الواحد كالعاده مقصر .. بس لسه حالا عملت حوار ظريف كيفنى قولت اعرضه يمكن حد يستفيد من اى ناحيه..
الفرامل كانت غريبه شويتين من ساعه ماغيرت التيل قريب جدا "ريمسا .. و عرفت بعدها انه اتضرب و دا واضح وكان ب 130 " فى رجرجه ... و رصصت و الدنيا ظبطت شويه بس لسه فى بردو..
النهرده راجع من الشغل عديت على ميكانيكى كدا شكله رايق قلتله يشوفلى الكلام و نغير زيت الفرامل كمان عشان كنت شاكك فيه و للحفاظ على ال abs زى مافادى بك كان بينصح دايما ..
الراجل فك الجنط ولاحظ ان المسمار اللى بيبات فى الدوشمه بيحك فى الجنط من جوه ومصنفره كدا ..اول حاجه ظبطه بالبنسه و بعده عنه شويه .. بعدها بدا ينزل الزيت من الخراطيم و فك القربه و غسلها غسله متينه اوي بضغط الهوا .. بعدها جبت علبه زيت فرامل اللى فى صفيحه زرقا دا " النص كيلو ب 40 بلبل " و بدأ يملا لحد مابدا الزيت الجديد ينزل يبقى الدوره كلها نضفت .. قام مقفل و مظبط و خد هوا و كان حط زى شحم كدا على الطنابير " مش عارف دا صح ولا لأ " قالى عشان التصفير و كدا و هو للامانه قالى دا حل مؤقت ممكن شويه و الصوت يرجع .. وقالى لو لسه فى رجرجه يبقى طنابير عاوزه تتمسح ع المخرطه وكدا ..
طلعت اجرب لقيت الدنيا تمام الحمد لله مفيش رجرجه ومفيش تصفير و مفيش صوت الخشانه بتاع الاحتكاك مع الجنط دا ..الحمد لله ربنا يديمها .. و خد 40 جنيه .. اى جديد هتابعكم ان شاء الله
وتوته توته ..