يوم الرعب العالمى كيا شوما

**tahakong** · 28-01-2015 02:40 PM

السلام عليكم أيها الأخوه الكرام
دعونى أشارككم ذكرى هذا اليوم مع سيارتى العزيزه كيا شوما 98
....................

فى يوم أغبر ملوش ملامح قررت أن أقوم بتنظيف الريداتير للسياره حيث أنه كانت أسترخص وبحط مياه الحنفيه مما قدى الى أشكال والوان من الصداء ..... المهم قررت أن أتحول الى المياه الخضراء أو الحمراء أو ...

فيها حاجه ده والنبى مفيهاش حاجه ... عمال حسابى على 25 تنظيف فى البنزينه و25 ميه يعنى 50 بس فل أوى

........ رحت البنزينه الراجل كان كبير فى السن وشكله مخضرم والخبره بتبظ من شعر راسه
ركب الخرطيم والوصالات وشغل المكانه وهبا الميا بتخرج من الرديتير بشكل أنفجارى وقف المكنيه فى أيه ياعم أيه الا حصل ... معلش يا باشا قايم الريدتير العلوى بايظ وبيسرب مياه ... مكان بروح أمه شغال ...
طب أعمل أيه دلوقتى ...... كانت فى بنزينه جنب شيرتون ... أطلع على الحرفيين وغيرها هناك ...
طب ده تمشينى قد أيه .. يومين تلاته بس غيرها أحسن ده كلام الخبره ... شكله صابخ شعره أبيض

المهم قلت أطلع على الحرفيين وصلحها أحسن ما تقف منى
وأنا فى نص طريق السندباد كده ألقى مأشر الحراره طلع على ال H وفوقه كمان ولو فى مكان تانى كان طلع منه رحت كاسر يمين وراكن جمب سور المطار وقافل الماتور بسرعه ..... وقلبى بيعمل حرب أهليه ....
............
أستنيت شويه ورحت نازل فاتح الكابوت يدخل هوا و بتاع 15 دقيقه كده وفتحت الغطاء براحه بعد ما بردة الجو كان مساعد الصراحه الحمد لله أبص ولا نقطة مياه فى الرديتير راحت فين المياه بخ ناو
... مليتها ميه تانى ودوارت العربيه دارت وتاته تاته لحد الحرفيين وماشى على الخامس و عداد الأر بى أم ميعلاش عن 1000 ...وماشلى ضارب أنتظار وسلحفه ماشيه
........
دخلت المدينه رحت عن بتاع الرديتر فكه وكان الرديتر مسدود سده هباب على عين أمه مفيش غير فتحتين بس هما الى سالكين والباقى كله مسدود يعنى مش شغال أساسا
الراجل أرميه وجيب واحد تانى ... لا يعم صلح أمه ونظفه معييش فلوس ياجدع براحه المهم أخد فى العمليه ده تنظيف وقايم علوى 150 جنيه ...
........ مره أخرى الرعب يتدخل
روح يا باشا شوفها عند المكانيكى لحسن شكلها جابت شوان ...جوان مين يعم أنت تف من بقك أعوذ بالله لالا )) بس روح أطمن عليها .... رحت عند المكانيكى ياسطى ألحق ايه اليوم ده ده بيقول أنها جابت جوان بص كده .... لالا مجابتش جوان الحمد لله والشكر له ... مش ناقصاه أدخول فى عامره المهم ...
مجابتش جوان أمال جابت أيه ....... مع أبتسامه جميله جابت طرمبه مياه .....
والى تكمله أن شاء الله

**samihanwar** · 28-01-2015 04:08 PM

بص بقى يا معلمى اللى تتعلمو من الحكايه دى ايه بقى:
1-ان الحاجه بدل ما هى شغاله وفى امانه الله ماتجيش جنبها وبزات فى حكايه الميه والصدا والحوارات اللى مالهاش لزمه.
2-كنت تغير بس الميه المصديه على قد ماتقدر من غير ضغط ميه وحوارات الصناعيه اللى مابتنتهيش دى.
3-ماتروحش تقول للميكانيكى دى شكلها جابت جيوان عشان لو كنت وقعت فى صنايعى من اللى ضميرهم حلو كان دخلك غصب عنك
4-لما روحت كشفت على الريداتير وقالك ده مسدود وحالتو مقندله كنت تسلم امرك لله وسلامتك يا دماغى وكنت جبت واحد جديد ولا استيراد حالتو نضيفه عشان متبقاش مصاريف فى الارض
وتقبل مرورى

**mr.moustafa** · 28-01-2015 04:25 PM

العربيات اللي قبل 2002 ديه بركة ، تسيبها زي ما هيه و مش هاتزعلك
ما تحاولش تعدل فيها

**aymanshebl** · 28-01-2015 07:06 PM

كنت جبت واحد جديد انضف بدل التكلفة اللى مع مرور الوقت هتترمى فى الارض على الفاضى

**tahakong** · 28-01-2015 08:50 PM

samihanwar
عندك حق فى كل الى قولته بس الواحد حب يعمل فيها فتك جات عليه الحمد لله ........ ومحدش بيتعلم ببلاش
mr.moustafa
أه والله كانت لسه عامل بيها قبل الموضوع ده مشوار للهرم ولا أى سخونه بالمنظر ده

.. بس بصراحه سبب أنى أعمل الموضوع التنظيف ده أن حسيت أن مأشر الحراره كان قبل النص بى شرطه وده كان الطبيعى من زمان بس لاحظة أنه على عن الشرطه ده حبه بسيطه ... غير أن أر بى أم بيعلى معيا بسرعه على التانى والتالت من غير أى عزم .... فقولت يمكن الميه السبب ..
aymanshebl
ضورت على واحد جديد طلع بى 350 ج .... وبصراحه مكانتش عامل حسابى فى الخبطه ده

..... أنا حاليا راكن العربيه لحد ما أشوف ميكنيكى قريب لحسن بالمنظر ده معنديش أستعداد أروح الحرفيين تانى .. نزلت أمبارح أدورها الطرمبه بتعمل نافوره تحت السيور ..........