الموضوع: يا اصحاب الياباني والكوري

المشاركة الأصلية كتبت بواسطة citadeldeath

الصديق العزيز،

أولاً، في رأيي، خليك في الجديد، وده عن تجربة، لأن أي عربية مستعملة لازم هتحتاج حاجات تشتريهالها، وطبعاً إنت زي ما بتقول، مش هيبقى معاك فلوس كافية بعد الأقساط علشان تدفع لده وده، كمان إنت مش عارف عربيتك المستعملة ده كويسة ولا لأ، حتى لو جبت خبير، هيكون فيه برده نسبة ولو صغيرة لإنك تتخم، والشعب المصري زي ما إنت عارف زي ما فيه الكويس فيه المش كويس وإللي بيحب ينصب..

ثانياً: لو عايز تجيب حاجة موفّرة في البنزين خليك في الـ 1000 سي سي و 1300 سي سي، يعني أنا معايا فيرنا وهي عربية كويسة وكل حاجة بس 1600 سي سي وبتستهلك بنزين كتير.. لذا حاول على قد متقدر تشتري عربية سعتها اللترية صغيرة..

ثالثا: لو قررت شراء عربية ما، حاول تنزل في الأسواق حتى تسأل عن سعر قطع غيارها، ولو هي متوفرة أم لا، وروح التوكيل مع أي واحد صاحبك معاه العربية ده، علشان تشوف المعاملة هناك والأسعار إزاي..

رابعاً، لا تلقي بالاً لكل الناس إللي بيفتوا في مصر، لإن إحنا شعب بيموت في الفتي، فتارة يقولك حد خليك مع العربية الفلاني (لاحظ هتلاقيها بتاعتوا)، وبلاش العربية العلاني ويطلعلك القطط الفطسانة فيها، لمجرد إنه يمتلك العربية الفلاني ده.. وواحد تاني يثنيك عن عزمك في شراء طراز ما لمجرد إنه يمتلك سيارة أقل منها في المستوى وهكذا..

أخيراً، أعرف أولوياتك، وإنت عايز إيه من العربية إللي هتشتريها، وتكاليف تشغيلها وقطع غيارها والوكيل بتاعها، وأركبها بنفسك قبل الشراء وهكذا..

انا بجد مش عارف اشكرك ازاي يا باشا على النصايح دي وفعلا انت عندك حق
بس في ناس بينصحوني ماشتريش عربيات وبلاقيهم عندهم العربيات دي يعني واحد صاحبي معاه فيرنا قاللي ماتجبهاش وهات لانوس
وواحد تاني معاه لانوس قالي هات الفيرنا احسن

المشاركة الأصلية كتبت بواسطة iunknown

انا كنت زيك من 5 شهور
معلوماتي عن السواقة زي معلوماتي عن فيزياء الجوامد بالظبط

واشتريت بفضل الله عربية جديدة والحمد لله دلوقتي تمام جدا وكل يوم باروح من البيت للشغل (170 كم) وعامل 16000 كم بدون مشاكل (الحمد لله)

بص على الموضوع ده قبل ما تشتري http://www.nilemotors.net/Nile/showthread.php?p=487813

متتخضش

طب انت اشتريت ايه ا باشا والف مبروك على اللي اشتريته انا قريت موضوعك وبجد كل اللي انت قولته حصل معايا فعلا

المندى هنا فيه ناس احسبهم حميعا على خير وبيساعدوا لوجه الله ونصايحهم عن خبرة ودراية مش افتاء بدون علم

فعلا انت عندك حق الناس هنا شكلهم فاهمين (شاكلك فاهم يا نصة) وبيحبوا يخدموا جدا بدون مقابل لوجه الله كده

المشاركة الأصلية كتبت بواسطة hazem66

الف مبروك مقدما على العربية
انا من رأى انك طالما عايز حاجة ماتصرفش عليها يبقى اكيد تكون عربية زيرو
ونصيحة الزيرو دايما ارخص واوفر من المستعمل نظرا لمصاريف العربيات المستعملة من صيانة وقطع غيار متهالكة ... الخ
علشان كده انا شايف انك تشترى زيرو فى حدود نفس المبلغ اللى معاك وطبعا ياريت تكون عربية شائعة علشان بالتأكيد هاتكون قطع غيارها متوفرة وفى الغالب رخيصة
يعنى فكر فى اللانوس زيرو او فيرنا زيرو وبص برضه على البيكانتو
اعتقد ان كل دول فى حدود نفس المبلغ
وقبل كل شىء اعمل استخارة وربنا يوفقك

والله يا حازم انا تقريبا واخد قرار اني اجيب زيرو إن شاء الله بس المحير دلوقتي بين 3 حاجات لانوس ولا فيرنا ولا بريلينس الجديدة

المشاركة الأصلية كتبت بواسطة SE_coralsea

لا طبعا في حاجات تانية كتير غير الكاوتشات :)

عموما هات جديد زيرو احسن لانك مش هاتصرف عليها حاجة غير البنزين و الصيانات الدورية العادية علي الاقل لمدة 5 سنين طول ما أنت محافظ عليها

اما تجيب ايه , فعندك الاختيارات كالتالي :
- دايو لانوس ( عربية كويسة و اقتصادية و قطع غيار متوفرة في اي سوبرماركت و رخيصة)
- فيرنا ( و لو أني مابحبهاش )
- البريليانس FRV الجديدة
و برضه ده يرجع ليك و انت عايز مانيوال و لا أوتوماتيك و ممكن تنتظر شوية علي اول السنة و تشوف العربيات هاترخص و لا ايه الحكاية


و ربنا يوفقك لما فيه الخير

انامن رايك برضه يا باشا و جاري الان تفلية كل عربية فيهم عشان اشوف انهي المناسبة اكتر يعني بشوف قطع الغيار اسعارها ايه ومتاحة ولا لا بس هي ارخص قطع غيار فيهم بتاعت الانوس بس انا هشوف انهاردة إن شاء الله البريلينس والف شكر عالنصيحة

المشاركة الأصلية كتبت بواسطة human12

لو ممكن تستنى كام شهر كده و احسبها تانى عشان انت لسه متجوز جديد و مش هتبان العمليه دلوقتى

مممممممم شكلك متجوز ومجرب انت عندك حق بس انا مش عارف السوق بكرة فيه ايه ممكن تغلى ولا هي كده رخيصة ولا ايه بالظبط

و العربيتين اللى قلت عليهم زى الفل بس دور على حاله كويسه جدا حتى لو اغلى من السوق عشان ماتتعبكش

انت قصدك المستعمل مش كده تقصد الفيكترا واللانسر