حضرتك بالنسبة لمكان شراء المكن الكهرباء مش هيفرق كتيير فى السعر سواء من القاهرة او من بورسعيد خصوصا لو حضرتك او مرة تشتريهم لان المكن ده عايز تجربه فعلية و هو راكب علشان تقدر تحدد هيبقى تقيل فى الحركة او له صوت ولا لأ .
لان ده الى حصل معايا اول مرة لما اشتريت من بورسعيد المكن على الارض سريع و كله تمام بس عند التركيب طلع ضعيف و الازاز بيطلع ببطىء و طبعا مش هينفع ارجع مشوار بورسعيد تانى علشان ارجعهم ..
فنصيحة من مجرب :-
1 )
دور على كهربائى شاطر علشان فعلا لو الكهربائى اى كلام هتلاقى نفسك كل يوم ازاز عطلان او بيتقل او زرار بيفصل او اى مشكلة اخرى هتكرهك فى العربية ..
2)
اشترى زراير للابواب الى هى نازلة علشان تركب فى اى باب , يعنى مش خلع من عربية معينة علشان الخلع بيبقوا غالبا حجمهم كبير و مش هتقدر تثبتهم فى الابواب بسهولة ...
الى بيبقوا نازلين علشان تعديل الابواب بيبقوا صغيرين كده و ينفع يركبوا بسهولة جدااا .
3)
ركب وحدات رفع بالمرة بس بلاش تركب الى بترفع الاربع ابواب مع بعض , اشترى الى بترفع باب باب او بابين بابين و هات حاجة نضيفة .
لان مشكلة الوحدات الى بترفع الاربعة فى نفس الوقت ان لو الازاز تقيل سنة هتلاقيها بتفصل كل شوية و بتتحرق و هتتعبك معاها .
4)
خلى الكهربائى الى انت هتروحله هو الى يشترى المكن و كل حاجة حتى لو هيزود عليك شوية بس يكون هو المسؤول عنهم بعد التركيب يعنى بعد ما ركب لقيت المكنة لها صوت او الازاز تقيل او بيقف فى الوسط او حسيت بأى مشكلة خليه يغيرهم فورااا لغاية ما تلاقى طلبك و تحس ان الدنيا تمام .
5)
انا عدلت باب السواق عند واحد بتاع فيبر علشان اقدر اركب وحدة الزراير جنب السواق ( الموضوع ما كنش اى حد موافقنى عليه حتى بتاع الفيبر نفسه بس انا كنت واخد الريسك و الشغل اتعمل على مسئوليتى لان فى تقطيع فى الباب و صب فيبر و كلام كتييير , بس فى الاخر طلعت كويسة الى حد مرضى )
6)
التويتا الياريس الازاز المانول بتنزل مجهزة غالبا لتركيب الازاز الكهربا يعنى الضفيرة بتاعة الابواب موجودة على التركيب فقط فخلى الكهربائى يتأكد كويس قبل اى شغل , علشان لو لقيت الضفيرة بتاعة بلادها هتغنيك عن عك كتييير اوى و هتوفر عليك فلوس كتير ثمن الاسلاك و الفيوزات و مشاكل الضفيرة البلدى الى ممكن كل شوية تفصل او سلك يسيح او مشاكل كتير غير متوقعه
علشان كده بأكد للمرة ال1000 انك تروح لكهرباءى شاااااااطر جدااااااا لان الصنايعى لو اى كلام هيكرهك فى حياتك من المشاكل اليومية الى هتقابلها ..
تقريبا كده ده كل حاجة فى دماغى حاليا , ولو فى اى استفيسار انا تجت امرك ...