الموضوع: ارجو الافاده من ملاك جيب kk و رانجلر و ارجو الا يبخلو بالنصيحه

الكابتيفا فعلآ بره المقارنه
١-هل الرانجلر عفشتها نشفه زى الشيفورليه دبابه النقل موديل التسعينات مثلا ؟
ناشفه وانشف من الدبابه ربع نقل
٢- هل الرانجلر ثباتها مش حلو على سرعة ١٣٠ كم ؟
اخرها 120 لو عايز تفضل مسيطر وده كل الجيب كده بس بنسب يعنى الkk افضل والجراند افضل
٣- هل الرانجلر تستاهل انك تدفعلها ضريبه و بنزين ؟
اللي محتاجها المصاريف دي والا حاجه ﻷن استخدامها مفيش له بديل
٤- هل يوجد فرق بين الرانجلر 2010و2011 ؟
نفس المحرك والتعليق بس غيرو الطابلوه والفرش كلو وده الطابلو والفرش اللي كمل ل2015 بس المتور اتغير فى 2012
٥- بحس ان الشيروكى صغيره شويه فهل هى فعلا ضيقه ؟
اوسع من الرانجلر شويه بس يالفعل كل الجيب مش واسع للدرجه ده لو قارنتو بالجيب اليابانى مثلآ زي الاند كروز او البرادو او التيوتا فورتشنر مثلآ..


اهم عنصر ايه احتياجك الاول ونقيم عليه انسب عربيه لك

المشاركة الأصلية كتبت بواسطة elenawy

هى الkkشكلها من جوه احلى من الرانجلر لكن شكلها من بره بحس ان الرانجلر شكلها ضخم و بحس انها اوسع .
فعلاً شكل الرانجلر يخوف أكتر من الـ kk وتحس إنها أعلى وفعلاً شكل الـ kk من جوة أحلى
انا عندى شيفورليه دبابه علشان كده سالت هى عفشتها انشف منها ولا لا علشان اعرف اقيس درجة نشوفية العفشه
الرانجلر علشان تقدر تحكم على عفشتها أعتقد حتكون أقوى من الشيفروليه الدبابة وأعتقد برضه حتكون من ورا أحن شوية من الدبابة بس برضه إللى حيركب ورا مرة حيحرم يركب معاك تانى :)
بس لو عفشتها زى الدبابه و خصوصا العفشه اللى ورا يبقى حرام طيب هل الكلام ده منطبق على الkk برضه ؟
الـ kk طبعاً عفشتها أحن من الرانجلر كتير من قدام ومن ورا ومحدش حايتعب ورا زى الرانجلر
انا اللى مخلينى حابب الرانجلر هو انى هشترى مستعمل فلو اشتريت الkk هشترى موديل 2008 لكن لو رانجلر هشترى ٢٠١١ فهتبقى حالة الرانجلر احسن
حب الرانجلر ياباشا بيبقى كده على طول خبط لزق :) بتقدم شوية تنازلات مقابل المتعة بتاعة إستخدامها ولو دخلتها فى مقارنة مع حاجه تانية يبقى متشتريهاش ـ لأزم تكون مقتنع بيها ١٠٠٪
لكن انت ايه اللى مخليك مش حابب الكابتيفا ؟
انا قولت فى الموضوع ان ناس كتير قالت طلع الكابتيفا و طبعا انت اللى قولت الكلام ده فى موضوع تانى لكن انا بثق فى خبرتك انت و الاستاذ احمد عبدالفتاح و مش بجاملك لكن عايز اعرف منك ثبات الجيب علشان الصراحه انا مش مصدق ان الجيب مش ثابته وهل ثبات الرانجلر و الkk مثل ثبات الدبابه ؟
فعلاً طلع الكابتيفا من المقارنة ولو عاوز تشتريها يبقى زيرو ـ لو عاوز تشترى دفع رباعى مستعمل فى مصر يبقى الجيب بأنواعه والتويوتا بأنواعها غير كده حتدوخ فى كل حاجه سواء صيانة أو قطع غيار- شوف كام جيب ماشى فى شوارع مصر وشوف كام كابتيفا ؟ كمان الجيب بيحافظ على سعره ولو حبيت تبيع حتبقى خسارتك قليلة جداً عن الكابتيفا ـ كمان لو ركبت جيب أو تويوتا بتحس بمتعة وسعادة مش موجودين فى الكابتيفا صدقنى وعلشان كده حتلاقى اللى بيبيع جيب بيبيعها علشان يشترى جيب أحدث فى الغالب - لكن اللى بيبيع الكابتيفا عاوز يبيع علشان زهق منها أو علشان يشترى جيب أو تويوتا :)
مع العلم ان انا احتياجاتى كالاتى :
١- عربيه عاليه و عائليه
يبقى الرانجلر متنفعكش أو كل العيلة تركب جنبك قدام :) - الـ kk تحقق معاك الشرط ده
٢- شياكه و تستاهل الفلوس اللى بتندفع فيها
الرانجلر والـ kk متوفر فيهم الشرط ده
٣- يكون ثباتها كويس لحد سرعة 130 كم
الرانجلر مشكلة عدم ثباتها إنها مش زى باقى العربيات فى مناورتها لازم إللى يسوقها يتعامل معاها كأنها عربية نقل لأنها شاسية وتعليق وإرتفاع ووزن مختلف عن العربيات السيدان بتبقى محتاجة سواقة مختلفة شوية وأكيد إنت أكتر واحد تحس بالموضوع ده لأنك راكب دبابة بس حتبقى مشكلتك الوحيدة الإرتفاع بتعها بس حتهرشها فى ثانية لأن عندك الأساس ـ الـ kk برضه بس مش بنفس درجة الرانجلر وثباتها أحسن من الرانجلر
٤-اوبشنز معقول
الإتنين يتحقق فيهم الشرط ده بس kk تتفوق شوية بس أوبشن الرانجلر إنك ممكن تفك الهارد توب ده مالهوش حل لو غاويها.بس بصراحة الـ kk فيها ميزة من وجهة نظرى مش موجودة فى أى عربية تانية وهى التحكم والمناورة بتوعها وزوايا الرؤيا واسعة بصراحة مبتحسش بأى زنقة فى الأماكن الضيقة والركن وده عن تجربتى الشخصية فى ركوب الـ kk وعربيات تانية كتير

و لو ينفع تبين سبب رفضك للكابتيفا ياريت توضح
تمت الإجابة فوق

ولو تعرف اسعار قطع الغيار ياريت تقولى

الجيب بأنواعها مش حاتغلبك فى قطع الغيار التوكيل عنده كل حاجه أصلى بس أسعاره أغلى من السوق - والسوق أرخص بس مش أصلى فى الغالب - بس فى حاجات بتلاقيها فى السوق رخيصة وكويسة وشغالة زى الفل - أنا عن نفسى بأشترى تيل الفرامل والبوجيهات من التوكيل لأن اللى فى السوق جربتهم وتعبونى جامد وإضطريت أشترى الحاجه تانى من التوكيل بس حبيت أغير طلمبة المية مرة لقيتها فى التوكيل بـ ٢٠٠٠ جنيه تقريباً وبعدين لقيت نوع برة فى السوق شغال مع ناس كتير إشتريتها بـ ٣٧٥ جنية وشغالة زى الفل - أنا عندى تيل الفرامل فى التوكيل جبته تقريبا بـ ١٠٠٠ جنيه من التوكيل للأمامى والخلفى مش فاكر بكام بس ارخص من الامامى - طقم البوجيهات بـ ٣٠٠ جنيه بس فرق جامد بينه وبين اللى فى السوق خصوصاً فى إستهلاك البنزين وراحة النقلات للفتيس الاوتوماتيك .

**** عندى شوية حاجات إضافية عاوزك تعرفها :
١- لازم تجرب كل عربية فى العربيات إللى إنت ذكرتها : رانجلر و kk وكابتيفا مرة وانت سايق ومرة وانت راكب ورا السواق بالذات (علشان تشوف الوسع بتاعها) .
٢- إكشف كويس قبل ماتشترى لأنك دافع مبلغ كبير مش قليل .
٣- إستهلاك البنزين عالى فى العربيات دى أنا عندى بتعمل من ١٤ : ١٦ لتر لكل ١٠٠ كم داخل المدينة وبتزيد شوية فى الزحمة وعلى الطوالى فى السفر بيكون حوالى ١٢ لتر لكل ١٠٠ كم وممكن يقل حسب السرعة واحسن استهلاك حصل معايا على سرعة ٩٠ كم/ساعة بيوصل لـ ١٠ لتر وأقل فى الـ ١٠٠ كم بس الصراحة مبقدرش استمر كتير كده :) بس فى المتوسط ١٢ لتر فى الطوالى على سرعات مختلفة وعلى سرعة ١٢٠ كم/ساعة باحس إن العربية مستريحة وأنا مستريح أكتر :) - بس لما بتعوز تقرص علشان تعدى عربية تانية بتبقى فى ثانية عربية سباق :) ولو طريق حلو معاك زى مانت عاوز.
الرانجلر استهلاكها فى البنزين اعلى شوية بسيط .
٤- الرانجلر فى الأفرود أحسن من الـ kk لكن برضه الـ kk حتوديك أى حته إنت عاوز تروحها فى أى مكان وتحت أى ظروف للطريق ومش حتخذلك .
٥- لو إشتريت أى نوع من الجيب خليك مستعد لأنك لازم تراعيها بالصيانات بتاعتها علشان متتعبكش يعنى عينك عليها وإيدك فيها تبقى هارش نظام الكشف بالإسكانر واللمبات بتاعة الاعطال - هى مش بتحصل كتير ومتتخضش لأن كل العربيات كلها كده دلوقتى ويمكن الجيب بأنواعه والتويوتا من اكتر العربيات اللى مافيهاش مشاكل كتير زى باقى الماركات بلا استثناء.

متأسف على الإطالة بس أنا حبيت أوضحلك بأمانة كل حاجه وبالتوفيق إن شاء الله وتحت أمرك فى أى استفسار

المشاركة الأصلية كتبت بواسطة elenawy

اول حاجه احب اشكركم يعنى الاستاذ احمد عبد الفتاح كاتب ياما قوى
انا ميهمنيش الاوفرود انا اصلا مبدخلش فى مناطق وعره ولا كمان يهمنى الفورباى فور لكن انا اللى شدنى ليهم التلاته هو الحجم و قوة الموتور و علوهم عن الارض و انهم بتمن السبورتاج هههههه.
و كمان انا مبروحش صيانات خالص ولا اعرف التوكيل اصلا لان انا فى فوه كفر الشيخ .
و عايز اعرف اسعار الkk المستعمله
و ياريت تكون المقارنه كعربيه فقط
و عايز اعرف ثبات الكابتيفا عامل ايه بالمقارنه مع الجيب
ارجو الرد

كده تمام لو ملكش فى ال4x4 ولا بتدخل فمناطق وعره ولا بتروح تعمل صيانات يبقى ابعد عن الجيب انت كده يناسبك كروس اوفر يعنى قشقاي او سبورتج او توسطن العمل وتشوف نيسان اكس تريل وكده دي اختيارات مناسبه لطلبك

المشاركة الأصلية كتبت بواسطة elenawy

يعنى حتى الكابتيفا مش حلوه

لا مش حلوه لا جيب ولا سيدان ولا كروس اوفر حاجه كده ميكس وكفايا ان وكيلها منصور تغور