طبعا يا جماعة بعد كام شهر جاى ان شاء الله الصيف وسخونة الجو
يا ترى كيف يمكن تغيير ماء الراداتير وايه نوع الماء الاخضر الجيد الى ممكن نحطه فى الانوس
عرض للطباعة
طبعا يا جماعة بعد كام شهر جاى ان شاء الله الصيف وسخونة الجو
يا ترى كيف يمكن تغيير ماء الراداتير وايه نوع الماء الاخضر الجيد الى ممكن نحطه فى الانوس
مش تغيير مـيـه وبس يا صديقى ده لازم يتعمل حاجات بسيطة معاه :
1- تشيـك على دورة التبريد كلهـا
2- تسليك الرادياتير
بالنسبة لتغيير الميه سهلة ، ممكن تفك الكاوتش التحتانى الواصل للرادياتير هتلاقى الميـه كلها نزلت ، سيبها شوية لمـّا تصفى خالص وبعدين ركّب الكاوتشة تانى وحـط الميـه الخضراء أو الحمراء مش فارقـة
فيه أنواع كتير من الميـه الخضراء ، أنا نفسى مش بثق فى الجراكن الرخيصة أم 20 جنى وبجيب جركن ميه حمراء من بنزينات توتال بـ 70 جنى
وممكن تحـط لها ميـه تكييف لأنها بتبقى مقطرة ومفيهاش أملاح ، وأنا معايا جركن ميه تكييف بزود منه الميـه لو نقصت
وتعمل الكـلام ده على شهر إبريل اللى جاى إن شاء الله عشان تاخد الصيف من أولـه :)
بالتوفيـق يا صديقى
تحيـــاتى لك
ارجو مراجعة الرابط
http://www.nilemotors.net/Nile/328901-1400.html
بالطريقة دى هيكون فى هواء فى دورة التبريد
المياه الخضراء حط الايديا الاسباني ب 45 جم الجركن 5 لتر
الطريقة:
1- تشغل العربية لحد ما تسخن او تكون راجع من مشوار وهي سخنة
2- تبطل العربية وتستنى 5 دقايق لحد ما الضغط في دورة المياه يهدى
3- تفك غطاء قربة المياه بس ببطء جدا عشان ضغط الدورة ينفس براحته وتكون لابس جوانتي أفضل
4- تفك عصفورة الردياتير ومكانها تحت المراوح وتقدر توصلها من قدام الموتور من فوق بسهولة جدا بس تاخد بالك وإنت بتفك إن المياه هتبدا تنزل فتكون واخد حذرك أو لابس جوانتي في إيدك وتسيبها تنزل كل المياه اللي في الردياتير وطبعا هتلاقى مياه القربة كمان نزلت
5- لو القربة مش نضيفة ممكن تفكها (مربوطة بصامولتين فقط) وتغسلها على قد ما تقدر لو مش هتفكها إعمل الخطوة القادمة
6- هتفك خراطيم المياه الواصلة للقربة وتنفخ فيهم بقوة على التوالي كذا مرة...يعني تلف عليهم لفتين تلاتة بالتوالي هتلاقى جزء كبير جدا من المياه المحجوزة في الموتور نزلت
7- كدا إنت فضيت المياه القديمة فهتبدأ تركب عصفورة الردياتير وتركب الخراطيم مكانها
8- هات مياه موبيل خضراء من بنزينة موبيل ودي سعرها كان 80 جنيه 4 لتر وال 1 لتر ب 22 جنيه...إنت هتحتاج 5 لتر بس ولو جبت 6 لتر كويس عشان تزود من اللتر الزيادة بعد كدا..بالتالي إما هتشتري 4 لتر على بعض ولتر لوحده أو لترين لوحدهم يبقى المجموع 124 جنيه
9- دور العربية وإملأ مياه الردياتير من القربة ببطء عشان تسمح بخروج الهواء من الدورة بس مش مهم أوي هو بيخرج كدا كدا
10- طول ما العربية دايرة والقربة مفتوحة دورة المياه هتخرج الهواء من الدورة من القربة وهتحتاج كل 5 ثواني تزود مكان الهواء مياه لحد ما ال 5 لتر يخلصوا أو يتبقى منهم حوالي 200-300 ملل ودايما تزود لحد علامة ال max بس وخلال ما العربية دايرة إبقى زود بنزين عشان دورة المياه تلف حوالين الموتور كويس
11- بطل العربية وإقفل غطاء القربة
12- سيب بقى العربية تبرد خالص لأنها لما تبرد المياه هتقل في القربة شوية فلما تفتح بعد ما تبرد وقبل ما تدور زود مياه لحد علامة ال max وبالتالي هتضطر تزود باقي ال 5 لتر
العملية دي تعملها كل سنة ونص وهتفضل الدورة عندك نضيفة إن شاء الله ولو عملتها كل سنة أفضل
لو عايز بقى تغسل الدورة وده فقط في حالة إن الدورة لونها بني أو أخضر على بني من الصدأ
ففي الخطوة 8 هتحط مياه عادية بدل الخضرا وتكرر الخطوات تاني من 1-7 مرة أو مرتين على حسب الحالة عندك لحد ما المياه تنزل من عند العصفورة شفافة وبكدا تبقى غيرت المياه القديمة كلها
وطبعا هيبقى خلطت بعض المياه العادية في الأخر بالمياه الخضرا بس أنا رأيي إن ده أفضل من إنه يكون فيه مياه قديمة حوالين الموتور منزلتش وفيها صدأ كمان ده غير الصدأ اللي في الردياتير اللي هينزل لما تكرر العملية والمياه الجديدة هتحمي الردياتير بعد كدا
أو لو تقدر والميزانية تسمح بدل ال 5 لتر تجيب 10 لتر...يعني 2 جركن من أبو 4 لتر و2 جركن من ابو لتر يبقى المجموع 204 جنيه
وتغير مرة وتقعد عليها إسبوعين وبعدين تغير تاني
وعلى حسب نوع المياه الخضرا لو نضيفة وإنت إلتزمت بمواعيد التغيير يبقى المرة القادمة هتحتاج 5 لتر بس لأنه إحتمال كبير ميكنش فيه صدأ بعد كدا
عاجز عن الشكر والمفرض الموضوع يتثبت قبل شهر الصيف
شرح بجد ولا اروع ..الله ينور عليكم
السلام عليكم
ياريت يا جماعه لو حد يرفع صور علب المياه الخضرا اللى بتستعملوها و بتثقو فيها علشان كلنا عارفين دلوقتى الغش مالى السوق كله و تكون فرصه الناس كلها تستفيد و شكرا