الحمدلله مشكلة تنتيش الغيارات اتحلت معادا الـr

سلام عليكم

طرحت من فترة موضوع بحثاً عن حل مشكلة ان عندي عربية نوبيرا 1 خليجي اتوماتيك كاملة

ان العربية لما تبدأ تمشي بعد مثلا حوالي 10 او 15 كيلو يبدأ الفتيس ينتش الغيارت تتخزن وتنتش

وبدأت بحثاً عن المشكلة مع الصنايعية والفتايين والمخترعين بسم الله ماشاء الله كلهم معفنين

رجعت للميكانيكي الي كنت بتعامل معاه قولت اشوفه مع واحد شغال في توكيل كشف بجهازه قالي الجهاز مطلعش اخطاء ع الفتيس يبقي قدامك اخر حل تغير الزيت بزيت نضيف

غيرت الزيت فعلاً بالزيت الإماراتي ده مش فاكر اسمه وحطيت 6 كيلو والميكانيكي قالي كلمة طلعت مظبوطة قالي امشي بعد تغيير الزيت كده يومين تلاتة عشان الزيت يخزن في خلايا الفتيس

ونسيت الجملة دي لما لقيت الفتيس لسه نفس المشكلة فضلت ع الحال ده يوم والتاني لقيت الفتيس بدأت المشكلة تروح وارجع اقول في بالي هينتش دلوقتي مبينتش مشيت اكتر من 50 كيلو في خلال يومين تانيين والفتيس معملش اي حاجة وزي الفل ونقلاته مظبوطة

اذن الزيت عامل مهم لكن تبقي مشكلة الـr المارشدير الوحيد الي بينتش سواء العربية باردة او سخنة

حبيت انقل لكم حل المشكلة لعل أي حد يستفاد