الموضوع: طلب مشورة ونصيحة بخصوص فتح مشروع شركة برمجيات

المشاركة الأصلية كتبت بواسطة Mohamed_Hamid

ربنا ييسر لك ما فيه الخير يا أبا آسر. انت راجل محترم وتستاهل كل خير

@ misry: حاجة غريبة فعلا شركات ال it اللى الأقاليم بيبقى ليها تواجد قوى. فيه فى المنصورة شركة اسمها egypt network ليها فروع فى كذا مكان جوه وبره مصر وبيعملوا شغل لشركات عملاقة زى مايكروسوفت مثلا. شئ يفرح ماشاء الله.

أشكرك أخي الحبيب محمد

المشاركة الأصلية كتبت بواسطة mr_green

أخى الفاضل وفقك الله

أولا إحسب
إيجار + مرتب 2 موظفين + مصاريف تشغيل ( كهربا - تليفون - إنترنت - ورق طباعة ......) + أثاث + أجهزة ( كومبيوترات - برنتر - سكانر )

دى مصاريف سنة مش أقل ولا أكثر

هاتعين موظفين على حجم العمل

هات 2 فريش مخهم نضيف و عايزين يتعلموا هايسعدوك و لازم تعمل سيستم مراجعه ورا بعض qc و تعمل نظام و تديهم معلومات تساعدهم على قدر ما هايسعدوك مش كل حاجة عشان أول ما هايحسوا إنهم فهموا حلو هايمشوا إديهم على قدر ما هم يكونوا كويسين و محترمين مش بياعين

بيانات العملاء بتوعك معاك إنت مش حد تانى

عامل الموظفين بما يرضى الله

إعمل شغلك صح ما تخليش حد يطمعك و يبيعك

إعمل شراكات من الباطن مع فرى لانسرز و جربهم فى وقت مايكونش فى ضغط شغل عشان لو قصروا تقدر تعوض إنت

بالتوفيق إن شاء الله

شكرا أخي الحبيب على المعلومات المفيدة
معلش عايز أفهم أكتر بخصوص نقطة "سيستم مراجعة ورا بعض qc"
يعني ايه
أما مسألة موظفين عايزين يتعلموا فمش هينفع طبعا مفيش وقت للكلام ده أنا عايز حد ينجزني مش حد أقعد أعدل وراه وممكن يتعبني ويطلع الشغل غلط الكلام ده ممكن قدام لما يكون عندي موظفين كفاية يغطوا الحاجة ساعتها ممكن أجيب ناس فريش زي ما بتقول يتعلموا منهم ويغلطوا براحتهم لكن مينفعش أعتمد عليهم في تأسيس شركة جديدة

المشاركة الأصلية كتبت بواسطة 4fun14

للأسف مليش خبره كفايه
بس الواضح ليا ان هتحتاج حد متكافىء معاك يشاركك
انت لو جبت 3 موظفين عندهم خبره معقوله "الواحد مرتبه ف حدود 4 الاف"+ايجار شقة "حوالى 3 الاف"+مصاريف صيانه وكهربا وخلافه "500ج" انت كده بتتكلم ف حوالى 15الف جنيه هتصرفهم شهريا
يعنى لو جبت أجهزة كمبيوتر ومكاتب وفرش للشقة بحوالي 20 الف فانت مش هتقدر تستمر ف السوق اكتر من 5 شهور وتعلن افلاسك بالكامل..ده انت كمان هتكون خسرت دخلك الشهرى المعتاد لانك هتركز ف مشروعك
---
اعتقد محتاج واحد يكون ثقه وفاهم شوية ف المجال ومعاه فلوس مكافئه ليك يشاركك والا الموضوع هيكون مخاطرة كبيرة

أنا حسبتها كده برده تقريبا وحيث أني اتعلمت إني مشاركش حد في تجارة ولو كان أخويا نفسه فبالتالي صرفت نظر عن الموضوع كلية خاصة إن البلد حالها ميشجعش وأنا نفسي أسافر وفي أي لحظة هقدر أسافر مش هتردد إن شاء الله