طلب مشورة ونصيحة بخصوص فتح مشروع شركة برمجيات
السلام عليكم ورحمة الله
إخواني الكرام أعضاء بيتنا التاني نايل موتورز
لأني بعتبركم إخوة لي وبستفيد جدا من نصايحكم وتعليقاتكم حبيت أشارككم موضوع شاغل بالي بقاله فترة واليومين دول بالذات سيطر عليا تماما بس متردد جدا في اتخاذ أي خطوة بشأنه
أنا -زي ما بعضكم يعرف- بشتغل في تصميم مواقع الإنترنت والتسويق الإلكتروني بس بشتغل freelancer يعني حر نفسي مش بشتغل في شركة
طبعا مهما كان الواحد بيشتغل لوحده مش هيقدر ينجز حاجات كتير وفعلا الفترة اللي فاتت بقى يجيلي شغل تصميم مواقع كتير وأرفضه لعدم التفرغ لأني بحاول أركز شوية في حوار التسويق الإلكتروني لأني ماسك شغل لعدة شركات عقارات والحمد لله الدخل معقول بيغطي تكاليف المعيشة ومصاريف المدارس وما شابه وقرفه أهون من قرف تصميم المواقع بشوية لأنك بتصمم الموقع وتاخد فلوسه وتصرفها ويتبقالك قرف الموقع اللي لسة شغال وصاحبه عايز كل شوية يعدل حاجة أو يضيف صفحة أو الموقع مش شغال وهكذا وطبعا الدخل الإضافي من ورا الكلام ده ملاليم بمعنى الكلمة يعني مش جايبة همها فقلت أتفرغ للتسويق الإلكتروني ورفضت شغل تصميم كتير ودي طبعا خسارة ومحدش بيجيله فرصة شغل ويضيعها بس فعلا مش هقدر أجمع بين أكتر من مجال خاصة موضوع التصميم بياخد وقت طويل ومتعاملتش مع حد أقدر أثق فيه بحيث يقوم بالشغل نيابة عني وأبقى مطمئن إنه مش هيصغرني قدام الشخص اللي طلب مني الموقع
الحاجة التانية ان الدخل على الأد يعني يادوب مصاريف الشهر وطبعا مفيش أي توفير والواحد عايز يعمل حاجة لقدام خاصة إني بفكر في حوار السفر وطبعا السفر علشان تبقى مستريح محتاج مبلغ مش قليل على الأقل يعيشك سنة كاملة بمصاريفها مش حامل هم حاجة لحد ما ربنا يكرم وتلاقي شغلانة كويسة ، ده غير الأولاد بيكبروا ومصاريفهم بتزيد والدنيا بتغلى كل يوم عن الأول وأنا بحاول أوفرلهم جو نضيف ومحترم يعيشوا فيه بعيد عن القرف اللي في البلد ، أخيرا حتى لو ربنا كرمني وسافرت برة أكيد هكون استفدت من خبرة فتح الشركة وممكن ربنا يوفقني وأفتح فرع تاني ليها في البلد اللي هسافرها ومش هحمل هم الشركة اللي في مصر لأني هكون بباشرها باستمرار وممكن أخلي أخويا يمسك إدارتها نيابة عني يعني مش هقفلها حتى لو سافرت
من هنا جاتلي فكرة أفتح شركة برمجيات في نفس مجالي بس هتوسع فيها وأحاول أشتغل في كل ما يتعلق بالمجال حتى لو مكنتش بفهم فيه شخصيا بس هستعين بحد بيفهم طبعا ، منها أزود الدخل ومنها هتنفعني في حاجات كتير زي مثلا إني بحاول أوصل إني أبقى شريك لجوجل Google Partner في برنامج التسويق Google Adwords وده أعتقد لازم أكون شركة مش فرد عادي ، وغير جوجل فأنا عايز أتوسع في مجالي في التسويق وأوصل للشركات الكبيرة اللي بتصرف مبالغ ضخمة للدعاية بس دي طبعا لازم يكون تعاملي معاهم بناء على شركة لها مقر وسجل تجاري وبينا أوراق وعقود وكتير جالي شغل وكانت الناس تسألني فين المكان ونضمن منين إنك واحد ثقة نقدر نتعامل معاه في فلوس وكده وطبعا ده حقهم
بس المشكلة إني مش بحب أعمل حاجة ناقصة أو نص نص وبعدين تبقى تكبر أو بمعنى آخر مش مقتنع بمبدأ ابدأ من الصفر وابدأ صغير وبكرة تكبر لأن حتى لو عملت كده فالموضوع هياخد وقت طويل ومحدش عارف الظروف وكمان أنا مش من النوع الصبور شوية فعلشان آخد خطوة زي دي هحتاج إني أفتح شركة مش صغيرة ومش كبيرة برده يعني على الأقل يكون شغال فيها 6 موظفين وأأجر شقة في مكان معقول مش شعبي وهجهزها تجهيزات محترمة يعني هصرف كتير ومحتاج رأس مال كبير وأنا حاليا لا أملك إلا حوالي 70 ألف جنيه شغالين في العقارات وممكن أحاول أوصلهم ل100 مثلا بالعافية
فهل المبلغ ده هيكفي إني أفتح مشروع زي ده وأبدأه صح ؟ هل هيغطيني مصاريف لمدة 6 شهور على الأقل اللي هي الفترة اللي هحتاج أقعد أصرف من غير ما أنتظر مقابل لحد ما أحط رجلي في السوق وأعرف الخبايا وأعرف أجيب زبون وأشتغل كويس وفي مرتبات موظفين مش قليلة وإيجار مكان ومصاريف تجهيزات وأجهزة كمبيوتر وخلافه ؟
هل أقوم بالخطوة دي وأخاطر بالمبلغ اللي معايا وشغال بيجيب فلوس ممكن مش كتير بس اسمه شغال مش واقف ؟
هل حال البلد حاليا يسمح بإني أعمل المشروع ده وممكن أكسب منه في ظروف البلد دي ؟
ولأهل الخبرة في المجال ده واللي مروا بتجربة فتح شركة برمجيات أو حاجة قريبة من المجال ده: أبدأ منين وأعمل إيه بالضبط ؟ أجيب كام موظف ويكون تخصصاتهم إيه وهياخدوا كام ؟ أأجر مكان فين ويكون سعره معقول ومنطقة كويسة ؟
يا ريت تفيدوني وتطلعوني من الحيرة دي وآسف على الإطالة في السرد
جزاكم الله خيرا
