Mahindra

**anroo** · 06-02-2015 10:35 PM

ياجماعه انا بفكر جديا في ماهيندرا سكوربيو انا شايف انها عربيه عمليه و قويه. ايه رايكم.

**anroo** · 07-02-2015 10:55 AM

يعني 70 مشاهده و مفيش راي واحد لله.

**Mecha** · 07-02-2015 12:09 PM

اعتقد فيه موضوع سابق لل ا.احمد فهمي هتلاقي القصة كلها

**anroo** · 07-02-2015 10:56 PM

الف شكر علي.المعلومات بس ممكن معلومه لحد مجرب الماهيندرا

**bnoqo** · 14-02-2015 12:27 PM

استاذى الفاضل
انا مالك لسيارة ماهيندرا اسكوربيو موديل 2011 الشكل التانى الى يعتبر فى تغييرات مش كبيرة قوي
بس اهمها بالسنبة ليا شحصيا هوة الماتور المحترم mhwak 2200 وفتيس اتوماتيك ومرايات كهربا وabs
العربية بالنسبة لقوة الاحتمال هيا ممتازة جدا
صاجها تقيل ومخترم والعزل فيها بالنسبة لصوت الماتور برضة كويس جدا
الكراسى جلد محترم نوعا ما بس مش زى الالمانى
التابلوه من خامات بلاستيك وهوة برضة تابلوه بالنسبة لعربية 2011 فقير نسبيا
الفرامل كويسة بس مش على السرعات العالية واصلا العربية بعد 120 بتقلب فيرنا خالص عالية عن الارض جدا
تقدر تحمل فيها لحد 2 طن وزن ولا يهمها وانا شخصيا ناقل فيها ماتور اوبل بالفتيس بتاعه فى الشنطة ورا
التكييف وده ممتاز جدا و2 زرار للعالى والواطي

يعنى اقدر اقول عربية كويسة بالنسبة لسعرها بس خلى بالك سعر اعادة البيع واقع جدا
يعنى لو بتشتري ليك وللسوق ابعد عنها انا عن نفسي بشترى العربية الى شايفها تناسبنى لان البايع كده كده خسران

الضريبة وديه اسوء حاجة فى بلدنا ضريبة العربية فى السنة الواحد 2160 جنية بس يعنى فى الثلاث سنين 6500 جينه وش وديه حاجة بالنسبة ليا زفت وخصوصا لاني كنت راكب رينو 1400 سي سي

شكل العربية نقدر نقول مش مقبول قوى عن بعض الناس مع ان ديه مسالة اذواق

العربية لو هاتشريها مستعملة بص فيها كويس جدا واكشف عليها فى التوكيل لان قطع الغيار هناك تعتبر مش غاليه وفى نفس الوقت مش رخصية

العربية الاتوماتيك فى ناس قالت بلاش منها بس انا معايا الاتوماتيك ومشكلة الرشاشات الكهرباء كانت موجودة عندى وحلها سهل وبسعر قليل وانا مش قلقان منها خالص

نسيت اقولك ان الماتور ده على ترووس يعنى لا بتغير كاتينة ولا بتغير حاجة غير سير المجموعة وخلاص

اتمنى انى اكون افدتك
اخوك احمد عبد الرحمن