الموضوع: وصول جميلة الجميلات لمركز سبيد سيرفس وقفلة !!!

السلام عليكم ورحمة الله وبركاتة

عودة من جديد والواحد بيتحسر ع حال القسم (أكنك داخل مقابر) ولا حس ولا خبر ! -محدش عارف ظروف حد بس ربنا يعينكوا جميعا-




أنا من فترة كنت بتابع معاكوا بخصوص *صووت الطقطقة-الصادر من الجزء الأمامى * اللى جننى وكان رد هبور :

(هنغير الكبالن الرابر بميتل) ونيم الزبون شوية!
(لسة مجتش ولما تيجى هنبلغك) ..
(غير الكبالن) ومبرووك يافندم والصوت لسة موجود !!
ااتقرص عليهم وبتوصية من أحمد بك أبوزيد (قاموا قايلين علبة دريكسيون) وهنطلبة ومتقلقش حقك محفوظ واتغيرت مرتين (والصوت موجود) وبمساعدة 4 فنيين و2 مهندسين كلة وقف وتنح وقالوا سيبها يوم فى المركز عشان نشوف المشكلة !
امال أنتوا غيرتوا ع أى اساس ؟!
(صوت صرصــــــــــــــــــــــ ور الحقل)
فكرونى ببوحة ×× قالك سلخت قبل مادبح ××

المهم , الموضوع سخن وصووت بقى مزعج لدرجة أنى كنت فى كايرو فيستيفال واللى عارفة , يعرف أن فية هناك أرضيات صخرية فكنت لما بمشى عليها (كنت بسمع أحلى سيمفونية طقطقة ممكن تسمعها فى حياتك) وماشاء الله تلاقى كلة مركز معايا وبيبوصلى




كلمت م-هانى وتوكلت ع الله وروحتلة , أول مرة شافها وقالى :

مش هينفع بالنظر بس لازم افك واشوف الدنيا وغالبــا هيكون يــا المقصات أو البيض .. اتفقت معاة ع يوم الاربعـــاء 4-2-2015 ونشوف الدنيــا أى .


يوم الأربعاء 4 - 2 - 2015 الساعة 2:45 بتوقيت أم الدنيــا كنت فى مركز سبيد سيرفس (جسر السويس خلف حديقة بدر) ..

كان قدامى عربيتين ودخلت ورائهم وبدء الشغل ع قدم وساق وفى دقائق معدودة جاء الرد الوافى اللى انتظرتة من بهايم هبور !!

المقصات (كانت ضايعة وبالذات الشمال) ومسامير الميزان (كانت مريحة) وقالى نغيروهم أفضل طبعا .

أحلى وأرخم (فى نفس الوقت) حاجة هناك (هلب يورسلف) أنك تروح تجيب قطع غيار عربيتك بنفسك وطبعا فى هبور تحط رجل ع رجل وكلة تحت سيطرة وواثق أنهم بيجيبوا قطع غيار اصلية (سعرها حارق بس اصلية) .

طبعا عرفت أنى هشترى مقصين وجوز مسامير ميزان وسئلتة ع أفضل محل قطع غيار كاسعر وأنهم اصلى ومفيش لعب فيهم قالى :



الشرقــــــــــــــــــاو ى (قصاد فندق السلام)

أميين !

روحت ولقيت أمم واقفة ولا اكنهم واقفين ع فورنة بلدى - وأن دل فبيدل ع أنة ثقة -

طبعا خليت م-هانى يكلمة (عشان يعرف أننا مسنودين وناس تقيلة فى منطقة)

قالى مفيش غير مقص يمين أصلى والشمال كورى (بس محترم وميفرقش حاجة عن الاصلى) والمسامير موجودة ,, فقولتلة مش هينفع الصراحة ولازم يكونوا زى بعض .

كلمت م-هانى وقالى عليك وع شارع دمشق واضمنهم :


نـــــــافع .
عصار أو عساف (مش فاكر الأسم) قصاد مركز قطع غيار هبور .
مركز قطع غيار هبور .

وركزوا فى اللى جاى ....

نافع : قالى كلة موجود اصلى وكورى فقولتلة أنا عايز الاصلى مش التقليد ولا الكورى !قالى كلة اصلى اصلى ياباشا (مقصين اوريجنال بــ 900 وجوز المسامير بــ 250) قولتلة تمام وهرجعلك تانى .

عصار أو عساف : كلة موجود والمقصين بــ 1000 وجوز المسامير بــ 260 .

مركز قطع غيار هبور : قالى المقص الواحد بــ 1150 وطبعا عشان معرفة من م-هانى قالى بــ 950 !

رجعت لنافع لأنة سعرة زى الشرقاوى وان م-هانى رشحهولى ولو فية حاجة هنرجعلة علطوول .

فقولتلة عايز اشوف الحاجة قبل ماشترى قالى مفيش مشكلة ياباشا , تحت امرك.


جالى المقصين فى كيس بلاستيك بتاع الزبالة والمسامير فى علبتين منفصلين واكياسهم مفتوحة !!!

أى ياعم دة , يقولى من غير حلفان روح ركبهم فى التوكيل ولو قالك مضروبين يبقى ليك الحق - ماليش خلق وقولت ماهما كدة كدة هيتركبوا مش باكياسهم يعنى عديها الناس لبعضيها -

ماشى وحاسبت عليهم وبعدين قولت بقى (اجس نبضة) , بدردش معاة -مع نافع نفسة- لغاية لم يكيس الحاجة واخد بيـــان بيهم , وصل بينــا الكلام أنى بعمل صيانة فين ؟! فقولتلة عند م-هانى ! واخدها من هنا وكانت قلم ع قفاة ووشة اتغير وندة ع الصبى اللى عندة وغيرووا الحاجات دى بســرعة وانضف حاجة للباشا !! من شووية كان اصلى وعاملى البحر طحينة !

ولما سئلتة , قعد يتمسكن ومش عارف أى (زى الحرامى بالظبط لما تقفشة شوف رد قعلة أى وأنت تعرف) طبعا غيرهم و جابلى المقصات فى كراتين وكراتين متقطعة برضة كالعادة ومعاهم المسامير . اخدت الحاجة وبصراحة علمت علية ,, يدوبك لفيت شووية بتاكسى ورجعتلة تانى وروحت رميت الحاجة فى خلقتة .

ممكن اعرف هترجعهم لية !

قولتلة , أنت مش واخد بالك عملت أى ولا قولت أى ؟

عمل فيها هندى ويقولى اصلك طلبت الكورى مش اصلى !!

فقولتلة راعى سنك ومتغيرش الكلام وتقولنى كلام مقولتهوش , أنا قولتك اصلى ومش كورى وبعدين لو أنت صادق منين أنت بعتلى الكورى ع نفس تمن الاصلى ومعقولة الاتنين بنفس السعر ؟!



نهاية الموضوع , اخدت فلوسى ولفيت ادور ع الحاجات ومعظم المحلات فى شارع دمشق بيبعوا المقصات بدون علب كرتون أو اكياس وبسئل عند "المصرية" ع مسامير ميزان موبيس يقولى مين اللى قالك أن موبيس بتنزل مسامير ميزان اصلا ومفيش منها اصلا واللى موجود بس ctr ,, اخدت بعضى وطلعت ع توفيفية وجبتهم من جورج حلمى (اضمن وانضف واحسن) فية فرق فى السعر بس اريح دماغى و الحاجة كلها متقفلة وتمام التمام .


وعملت حركــــــة عجيبة وبدون قصد طبعا , مفاتيح العربية طلعت معايا ونسيت اديها لمهندس هانى وطبعا كنت قافل ع عربيتن قدامى واستنونى من 4 لغــاية 8:30 عقبال ماجبت الحاجة ورجعت وزحمة الطريق لاتوصف !!

رجعت وركبت والمفأجاة الحلوة , أنى قبلت نجوم من النجوم التقـــال ومن الزمن الجميل هوة تيـــــــــــــــت أأة ومش بيسئل واختفى مرة واحدة بدون مقدمات بس عرفت أنة غصب عنة بسبب الجيش وأنة قرب يسلم أهوة *كريم فوزى* الله يعينك ياكيمو وتسلم ع خير وكفارة اجدع واخدت العربية وطلعنا جربنها سوووا وكانت النتيجة مرضية والصوت راح الحمدلله ووصلنى للغاية كلتكس وظبط الزوايا وكلة تمام .

وجـــــــــة وقت الحســـاب (طبعا) أنا طيرتلة اليوم بالوقفة اللى أنا عملتها دى وقولت أكيد حسابى هيكوون تقيل ! وكانت المصنعية 100 (مائة جنيها مصريا فقط لاغير) وطلع فى الاخر أنى دفت مواصلات تاكسيــــــات بس 180 جنية

أحب اشكر المهندس هانى ومهم كتبت مش هوفيك حقك , من الناس المحترمة والنادرة اللى عرفتها من المنتدى (بغض النظر أنى فى الأول كنت مقلق منك بسبب المواضيع الفكســأنة المنتشرة وحملات التشووية) أحب اقولك ربنا يهديهم ويعينك ويوفقك للاصلح دائما ..

طوولت عليكما بس بحب اكتب باستفاضة !!

وخلوا بالكواا من محلات قطع الغيار وبالذات نافع دة ..
السرقة بقيت عينى عينك وفهلوة وشطارة وميعرفوش أنهم ليهم اخرة .
للأسف الموضوع مش مدعوم بصور وللذى منة لدربكة اللى حصلت فى اليوم دة ومكنتش مجمع .
وربنا يستر طريقكم جميـــــــعا .

المشاركة الأصلية كتبت بواسطة beeronasr

مبروك انها خلصت .. و الناس فى مصر بقت عاوزة حبوب الاخلاق

الله يبارك فيك ,, حبوب واقراص وحقـــــــــــن !!
ربنــا يهديهم ويهدينــا يأما ياخدهم .