الموضوع: ميراث البنت وتدخل زوجها

بسم الله الرحمن الرحيم
الحمد لله والصلاة والسلام على رسول الله نبينا محمد خير خلق الله

أخونا الكريم إن شاء الله أكون مُقدر تماما للموضوع والصعوبة التى فيه بالنسبة لك ولزوجتك وبالأساس أنتم شىء واحد يعنى موقفك معها يجب أن يكون موقفك مع نفسك إذا كان الأمر يخصك.

ومن خلال تجارب واقعية وإدراك تفكير بعض أهلنا فى الصعيد أو غيره وده أظن متواجد فى محافظات كثيرة وكمان فى دول كثيرة على ما أظن والله أعلم وكمان لأن الموضوع ده دائما علماء المسلمين الأجلاء المخلصين من خلال الاستماع لهم بيكون حاضر فى كلامهم لأنه ظلم كبير وعظيم وهناك أيات كثيرة فى القران الكريم ولكن لا أحفظها توضح هذا الظلم وعواقبه على الفرد والأسرة والمجتمع.

وبالتأكيد من يمنع ميراث عن أحد سواء أنثى أو ذكر ده بيكون حب للفلوس والرغبة فى إمتلاك كل شىء يستطيع أن يأخذه علشان شهوات الدنيا وبيكون المبرر هو الكلام الى حضرتك ذكرت جزء منه فى الموضوع وطبعا من يفكر ويفعل هذا ليس له أى ضمير والضمير يعنى رقابة على نفسه بنفسه وده بيزيد أو بيقل أو مش بيكون موجود حسب التربية والنشأه وفى النهاية هو مستوى الايمان بالله وتصديقه عز وجل وتنفيذ ما أمرنا به سبحانه وتعالى لأنه هو من خلقنا ووضع لنا القواعد التى تسير بها حياتنا الدنيا حتى الانتقال منها وطبعا مش معقول حيكون تفكيرنا أحسن وأشمل من الضوابط التى أبلغنا بها خالقنا عز وجل.

على كل حال أخى الحبيب الموضوع مش حكاية كوز دره زى ما قلت وإلا حتبقي أنت كمان بتفكر نفس التفكير بتاعهم ومش يبقى لك حق تزعل منهم أو تنتقضهم يعنى المسائلة عافية وهما أقوى منكم وسكة العدل مش موجوده وحدور على طريقة تكون بيها قوى وتبقى بدلت أماكن صحيح هو حقكم بس الواقع واضح.

شوف أخى يمكن إذا كنت مكانك كنت حأفضل أفكر كتير جدا تحت ضغط وأعصاب مشدودة ودم محروق من الظلم ده والقهر بس ححاول أقول لك إحتمال كنت حتصرف إزاى بس الفرق أن حضرتك جوه المشكلة والضغط بياخد وقت طويل ومجهود كبير ... الحمد لله.

إن شاء الله وبناء على الاستماع للعلماء وخصوصا فضيلة الشيخ الدكتور عمر عبد الكافى فالشيخ يصب الاهتمام على الاسرة والعلاقات بها ولأنه دائما ما يذكر هذا الأمر تحديدا هو أكل ميراث البنات (تذكر أنك وزجتك شىء واحد ده فضل ربنا عليها وعليك يعنى الموضوع من وجهة نظرى الشخصية كانه معاك يعنى مش مع واحده ست ضعيفة عايشة فى الدنيا لوحدها )

وعظيم الظلم فالموضوع والله اعلم أن النساء من الضعفاء والرسول الكريم خير خلق الله نبينا محمد عليه الصلاة والسلام أوصى بتقوى الله فى الضعفيين اليتمي والنساء كما سمعت.

بمنتهى الوضوح ولا تستغرب أشور عليك بالحل فى الأسطر القادمة إن شاء الله بس لازم حاجة مهمة جدا جدا جدا إذا كنت ستنفذ هذا الحل .... الإخلاص الصادق مع الله ..... يعنى الحل ده حيكون منكم بصدق تام مع الله عز وجل وهذه نوايا تتحول لتصرفات وأفعال .

حضرتك وزوجتك بعد المناقشة وصلاة الإستخارة وصلاة طلب الحاجة

مش حتعمل اى حاجة خالص وحتبلغهم أنكم مش عايزين غير ما أمر الله به وإذا كنت عايزين أختكم تحصل على الميراث يكون الحمد لله وجزاكم الله خير وإذا كنتم مش عايزين إحنا مش حنعمل أى حاجة ولا حنطلب أى حاجة غير مره واحده وبس ونفوض أمرنا إلى الله.

اطيب إيه الفايده ليكم من كده

1- إذا كان التصرف ده لوجه الله بإخلاص إن شاء الله ربنا يرضي عنكم وده أعظم حاجة ممكن تحصل لأى حد على الاطلاق إذا رضي الله عنه

2- إن شاء الله رزقكم ستحصلون عليه فى كل الاحوال (يقين)

3- التصرف ده حيكون مانع لخلافات ومشاكل واضح مداها ممكن يكون ايه ، صحيح أنه لن يصيبنا الا ما كتب الله لنا ولكن النيه منع الخلافات داخل البيوت والعائلات بسبب المال وده مجرد حاجة مهمة علشان الحياه وهو رزق من الله وليس مطلوب مننا التصارع عليه لدرجة ما نحن فيه

4- القوة مش بالعضلات القوة أنك تتحكم فى نفسك فى وقت يستدعى الغضب وده بيكون لله وإلا إذا غضب الجميع ماذا سيحدث

5- زوجتك لما تقتنع بهذا التصرف والهدف منه فى سبيل الله واليقين بما عند الله سواء فى الدنيا أو الأخرة ، أكيد ده سيزيد الترابط بينكم وده الاهم للأسرة بالتأكيد


جمل سمعتها سأنقلها لك إن شاء الله

إذا كان هناك من ظلمك وتريد أن تقطع له ذراع دع الله يقطع لك رقبته

قد يجب على المظلوم أن يشكر الظالم لأنه يكون سبب فى أن يكون فى رعايه الله عز وجل

إذا كان أخوك يريد أن يأكل مالك فدعه له ( كما قصة ابنى أدم عليه السلام وكان قتل مش فلوس بس كانوا اخوات شقيقين مش غرب عن بعد)

من ترك شىء لله عوضه الله خير منه (يقين)

وطبعا موضوع الظلم ده كبير جدا والكلام فيه كثير ولكن الفرق بين أنواع الظلم يختلف إذا كان بين عائلات أو غيره.

ده يا أستاذنا تقريبا الشكل النموذجى للإجابة وشخصيا قد لا أستطيع تحقيق 75 % منه إذا كنت أتعرض لمشكلة لأنى مثلا عصبي وبتأثر بسرعة بس الاختبارات والمشاكل بتكون فرصة علشان التدريب وهنا الفرق بين شخص وأخر فى درجة الايمان بالله واليقين به عز وجل وتطويع النفس للتصرف بشكل سليم وطبعا على حسب نسبة تحقيق النتيجة يكون الفوز إن شاء الله.

صدقا من خلال التجربة الله عز وجل عدل وحق وكل واحد بياخد حقه بالتمام بس حط كل أحداث حياتك أمامك وركز كده أقسم بالله سترى أن الله حق فى الدنيا والأخرة يقيناً بقدر العمل والاخلاص من العباد له سبحانه وتعالى.

أخيرا الموضوع مهم جدا وإن شاء الله صلاة الاستخارة ركعتين تطلب من الله يا رب أفعل هذا أم هذا وكمان ركعتين طلب الحاجة يا رب وفقنى أعمل ما يرضيك أنت وزجتك ركعتين كل واحد خمس دقائق مع يقين وثقة بالله وإن شاء الله سيكون قلبكم وعقلكم مستقر ومطمئن فى التعامل مع المشكلة.

سبحان الله العظيم وبحمده
سبحان الله وبحمده سبحان الله العظيم