عيوب ومميزات ساجا 2010

**essamz** · 09-02-2015 02:50 PM

أنا مقدم على شراء عربية ساجا (مستعملة- موديل 2010) ... عاوز اعرف عيوب ومميزات العربية من وجهة نظر ملاكها الأفاضل ... ويا ريت تعرفونا اخد بالى من ايه فى العربية وأنا بشترى

**amrseif** · 10-02-2015 10:15 AM

ربنا يوفقك للخير ان شاء الله .. بس اولا هى مانيوال وللا اوتوماتيك ؟ عشان اقوللك كلام من تجربتى للعربية لان عربيتى اوتو .. وعايزين نعرف هتجيبها على كام ؟

**essamz** · 10-02-2015 11:01 AM

العربية مانيوال .... موديل 2010 ... وصاحيها طالب فيها 57 ألف وعاملة 120 ألف كم

**amrseif** · 11-02-2015 02:35 PM

مبدأيا المانيوال والاوتوماتيك مايفرقوش عن بعض الا فى الفتيس فقط

بالنسبة لعربية بروتون ساجا نبدأ بالمميزات الاول :

1- العربية سحبها كويس جدا على موتور 1300 سي سي
2- العربية تقيلة وثابتة على السرعات العالية و فى الملفات ( تاخد الملف بكل ثقة بدون خوف )
3- عفشتها ناعمة ( يعنى ماتتعبش الظهر )
4- قعدتها واسعة سواء قدام او ورا
العيوب :
1- الباور تقيل نوعا ما ( يبان على السرعات المنخفضة ) وبرده قطر الدوران بتاعها ضيق شوية .. واعتقد ان ده مقصود عشان تبقى ثابتة فى السرعات العالية وماتعومش
2- استهلاك البنزين عالى جدا فى ( الاوتوماتيك ) لكن بسمع انه كويس فى المانيوال ( والله أعلم )
3- قطع غيارها مش منتشرة بالشكل الكبير ( مش زى ميتسوبيشى مثلا او هيونداى ) ... ليها اماكن معينة زى ش دمشق مصر الجديدة وش المحطة الجيزة على سبيل المثال
4- قطع الغيار غالية شوية بالمقارنة بفيرنا مثلا او لانوس ... على سبيل المثال وللامانة انا سئلت على المساعد الامامى الواحد الاصلى فى التوكيل من فترة قريبة طلع ب 1400 ج !!!

فى الاخر لو لقيت نفسك مرتاحلها يبقى اتكل على الله وطبع القرار يرجعلك ..
ولو عايز تسأل على حاجة معينة عايز تعرفها فى العربية انا تحت أمرك ..