هذا الموضوع مفتوح للحوار لأنى بفكر من مدة فى قيمة الجنيه المصرى اللى بتنهار كل يوم أمام العملات الاجنبية الاخرى وأصبح لا حول ولا قوة له .. الكثير منا أصبح لا يشغل باله بهذا الجنيه لانه لم يعد له قيمة شرائية كما كان بالماضى وأصبح كلا منا يعتبره فكة بجيبه لاقيم ة لها فيرميه على الترابيزة أو بجيوبه كفكة ، يوجد الكثير منا يعطيه لاولاده صبح وليل كى يقوموا بشراء الحلوى من المحلات .. ومنا من يبحث عنه فى جيبه كى يشترى به حجر بطارية أو مقشرة بطاطس أو يشحن رصيد فكة من البائعين المتجولين بالمترو أو بجوار مواقف ومحطات المواصلات ..!!
بأختصار أحنا شعب كبير جدا بتعداده السكانى يفوق التسعين مليون ، ولو حد فكر أو طرح فكرة كويسة وطورها أو بمعنى أصح اعجب بها مليون أو أتنين مليون فقط من التسعين مليون وأشتروها وتكون تكليفتها جنيه واحد بكده يكون أصبح مليونير بمنتهى البساطة وعدى خط الفقر ،
أنا عن نفسي عجبنى جدا فكرة مصنع لولوا بتاع الريحة أبو ربع جنيه والكيس أبو نص جنيه ، فكرة حلوة منهم كسبت ولمت ملايين .. بس طبعا أنا مش هقدر أعمل زى مصنع لولوا لأنى أولا معنديش خبرة ولا عندى مكن ولا مكان ولا عمال .. حاولت أفكر بحاجات كتير جدا تتناسب مع أمكنياتى وتحسن من مستوايا المادى اللى بقى فى الحضيض بعد توقف الدخل وخاصتا أنى كنت بشتغل مرشد سياحى بالسياحة وكنت بكسب كويس جدا قبل الثورة وانتوا فاهمين بقى الباقى ..
المهم أنا أتعلمت أنفذ وأعمل تطبيقات الاندرويد للهواتف الذكية على جوجل أستور، تعبت لحد ما أتعلمت أزاى أعملها وبالفعل نفذت منها أكتر من تطبيق معظمها مجانى وواحد فقط بفلوس ، ربحت بعدها مبلغ مش كبير قوى ولكن هو كبداية كويس ( خمسون دولارا أمريكيا فقط ) ومازلت بطور من نفسي ، فى شركات على جوجل أستور منفذة للالعاب كسبت ملايين الدولارت من وراء تلك التطبيقات . بس بصراحة موضوع تنفيذ وأخراج الالعاب ده موال وحوار لوحده وله برامج بتتباع على النت عشان تنفذ عليها التطبيق الاول ، عشان كده أنا لسة مجربتوش وقلت أخد هدنة شوية مع نفسي لانى تعبت كتير على ما اتعلمت لوحدى أزاى أعمل التطبيقات ديه وأرفعها على جوجل ..
المهم أنا عاوزكم تفكروا معايا ونساعد بعض كلنا يمكن حد ربنا يكرمه من بينا وينعم عليه بفكرة كويسة نخرج بيها منه تكون بدايتها بجنيه واحد ويصبح مليون بعد كده ..
يله عاوزين أفكار .. كله يشغل دماغه معايا وننسي بقى شوية السياسة ونشوف حالنا
المفضلات