ممكن اعرف مميزات وعيوب النترا 2015 واسعار قطع الغيار؟

ممكن اعرف مميزات وعيوب النترا 2015 واسعار قطع الغيار؟
وتكونو مشكورين جدا

مميزات :
1.السحب جيد جدا
2.اعادة البيع سهلة
3.قطع غيارها ليست غالية و لكنها ليست رخيصة يعني متوسطة
عيوب :
1.الثبات الضعيف فوق 120 كم/س
2.فراملها بتسحف
3.صاجها ضعيف
4.عفشتها ناشفة شوية و لكنها انعم من السيراتو
5.واطية علي الارض و ممكن تحك في المطبات لو محملة

الف شكر ليك
بس انهى الافضل من دوول:
الالنترا _السيراتو_اللانس الشارك 2015

بص مميزات و عيوب الانترا انا قولتها فوق
اما مميزات السيراتو
1.السحب
2.اعادة البيع
3.الشكل الممتاز جدا جدا جدا حدا جدا جدا جدا من وجه نظري
4 صاجها اقوي من الانترا
العيوب
1.الثبات فوق 130 كم/س
2. الفرامل في عدم وجود abs الي هي الفئة الاولي خالص
3 العفشة ناشفة شوية
4.قطع الغيار غالية شوية لكنها قوية و بتستحمل
5. تيل الفرامل مابيستحملش اوي
6.بيقولو ان تحت الدريكسيون بيسخن بس مش جامد
اما اللانسر الشارك
المميزات
1.الثبات
2.الفرامل القوية
3.الموتور القوي
4.العفشة الناعم
5.انها ياباني 100 %
6.اعادة البيع
العيوب:
1. غلو قطع الغيار ( نار )
2.صوت الموتور عالي و لكنة رياضي
3. العزل سيئ
4.عدم حمي الاكسدام للسيارة
انت لو عايز تشتري حاجة من الثلاثة خليك فيي الشارك
اما لو عايز وجهة نظري اشتري بوما مفيهاش اي عيب
او شوف الفلوانس او كورولا بيز لاين
بس ياريت تقولي الفئة السعرية عشان اقدر افيدك اكثر

المميزات:
.شكل متميز
.موتور و سحب قوي جدا حتي لو أتوماتيك
.صندوق التروس 6 سرعات و بالتالي النقلات في الأتوماتيك ناعمة جدا
.المساحة الداخلية جيد جدا و مريحة
.البلوتوث و المرايات الضم و الإمبوليزر
. التكييف ممتاز
.سعر إعادة البيع جيد جدا

العيوب:
. االعفشة مش مريحة نسبيا
.صوت الكاوتش الأصلي الهانكوك عالي
.الإحساس بالنقر و الطوب و فواصل الكباري
.الرؤية الخلفية صعبه خاصة في الركن (محتاجة تعود)
.قطع الغيار غالية نسبيا

المميزات (2015 تانى فئة)
- تسارع قوى جدا
- باور كهرباء بيدى متعة فى القيادة وبيفصل على السرعات
- العربية ثابتة على السرعات ولكنها خفيفة على مطبات الهوا ولكن ممتازة لغاية 140 وجيده لغاية ال160 بعد كدا بيكون للتجربة فقط وغير آمن ( انا جبت بها 200 مرتين وكانت جميلة الصراحة )
- شكل ملفت جدا وشيك خارجيا وداخيا
- العفشة ناعمة جدا مع المطبات الجامدة ( ولكن النقر بتكون محسوسة)
- تكييف قوى وكماليات ممتازة بالنسبة لأول فئة
- العربية عالية على الارض ومفيش ولا مطب ممكن تحك فيه ابدااااا وعن 300 تجربة ولكنها بتوطة مع التحميل الخلفي بعنى لو 3 ورا اكيد ممكن تحك ولكن انا كان 2 صحابي ورا فى سفرية ( رفيعين ) وماكنش فيه اى حك والمطبات باخدها فى العدل من غير تعريض بالعربية
- هادية واقتصادية فى البنزين
العيوب ( من وجهه نظري )
- الصاج ضعيف بس زي كل الحديث اليابانى والكوري
- الكوتش اللى جاى معاها بيحسسك بالنقر وصوته مسموع على السرعات ومش حلو فى الفرامل الى حد ما
- الفرامل بتزحف لو ما رجلشتش الفرامل الخلفية باستمرار ( كل شهرين مثلا ) عدا ذلك بتكون جيده وليس ممتازة
- الثبات معنديش فيه مشكلة ولكنها على السرعات بعد ال140 مش حلوة فى الغرز عدا ذلك طير بيها ومش هاتحس بحاجه

قبل ما اشتريها جربت الشارك وكنت هاشتريها ولكن مع البحث والتجربة لاقيت فيها كذا مشكلة
- الشنطة اصغر شنطة فى عربية سيدان ممكن تشوفها فى حياتك بسبب الاستبن
- كماليات محدودة قوى
- صوت الماتور مسموع مع المشي اوي هو كشاب مش مزعج لانه حلو بس لو عايز هدوء فى العربية للأسف مش هتلاقيه
- مع التسارع بحس ان ماتورها هايطلع برا العربية من صوته ولكن كأداء متوسط جدا
- الصالون فى ال2008 كان خاماته افضل بكتير ولكن الحالى مايفرقش حاجه عن الكوري
- الاكصدام اللى قدام اى ترييحه علية هتلاقي العربية اتحولت لماركة تانية وشكل تانى خالص
- بالاضافه ان الشكل الحالة بقالة 7 سنين
( على فكرة انا مش بقول انها وحشة ولكن انا مع المقارنة بالانترا بقول اللى شوفته واللى كنت هاشريها كان خليجي بفوجات ومقابض لون العربية وجنط 16 وكانت ب146 )
رأيي الاخير لو رجع بيا الزمن ومعايا نفس الفلوس كنت هاشتري الالنترا برضه انما لو رجع بيا الزمن ومعايا 10000 زيادة كنت هاجيب السيراتو خليجى بجنط وفتحه وabs

السيراتو غاليه مش عارف ليه؟
بدل كده يبقى اجيب الالنترا احسن؟؟؟؟
بس المشكله ان الالنترا هتغير الشيب 2016.............؟

الفيس ليفت الحالى هيقعد سنتين
والشيب الجديد هاينزل آخر 2016 كموديل ل2017

تيل فرامل ٧٧٠
جنوط ١٦ سعر الجنط ٢٥٠٠
شبكه اماميه نيكل بتاعه gls ٩٠٠