افضل سياره للمواطن المصري والمستقبل

السلام عليكم
من معطيات الماضى وتجارب الكثير فى المنتدى وخارجه بخصوص السيارات فى مصر هناك العديد من علامات التعجب نبداء بكل موضوعيه من الجميع للوصول لنتيجه مفيده..
اولآ
تنقسم السيارات فى مصر والعالم ما بين السيارات الاوروبي والاسيوي وفى الغالب الامريكي بعيد عن مصر بشكل عام فى هذه المقارنه ﻷننا نتحدث عن سيارات الشعب او الغالب شرائها فمصر..

ثانيآ
ما هي السيارات الاكثر اعطالآ والاقل اعتماديه مع الاستخدام ومرور السنين هل الكافه راجحه مع الاسيوي ام الاوروبي وهذا هو المطلوب من الجميع بكل موضوعيه من تجارب شخصيه..

والمطلوب من الجميع وانا منكم ان يوضحو لنا نوع سيارتهم وتجاربهم والاعطال على مر الاستخدام وذلك للوصول ﻷنسب نوع او دوله مصنعه تناسب مصر وطرقها وامكانيات الغالب ..

رجاء الاهتمام والموضوعيه وشكرآ للجميع

الافضل ان الواحد مايركبش عربيه من الاساس لانها حتبقي عبء كبير عليه لما يرفع الدعم نهائي عن البنزبن
او كبيره يركب سوزوكي ماروتي

انا شايف ان العربيات الاسيوي اوقع لمصر من خلال تجربتي صرفت ارقام خياليه على الاوروبي ده غير الخساره فسعرها عن المثيل

رايى المتواضع .... التويوتا ... على اختلاف موديلاتها
مش اى يابانى ... التويوتا اثبتت جدارة فى السوق المصرية .. تتوفر فيها ... الاعتمادية ... قلة الصيانة ... بساطة التصميم

طبعا من المعروف انة التويوتا قليلة الاعطال كان فية احصائية من كام سنة بكدة وطبعا الميتسوبيشى عربية محترمة وياباتى ولكن كل سيارة وفقا لميزانية كل شخص يعنى الكورى زى لانوس وفيرنا فئة ماينفعش تتقارن مثلا بالتويوتا من حيث السعر او الجودة

اليابانى والالمانى ركوبة مريحة

الكورولا راحة البال والاعتمادية والاقتصاديه

اقتباس:

---

المشاركة الأصلية كتبت بواسطة احمد فهمى

انا شايف ان العربيات الاسيوي اوقع لمصر من خلال تجربتي صرفت ارقام خياليه على الاوروبي ده غير الخساره فسعرها عن المثيل

---

الناس في مصر عندها عقدة الاوروبي وخصوصا المرسيدس يا ا.احمد .عقده من الخمسينات .والمنظرة والوجاهة والاسم بتزغلل عنيهم .

اقتباس:

---

المشاركة الأصلية كتبت بواسطة dedi

طبعا من المعروف انة التويوتا قليلة الاعطال كان فية احصائية من كام سنة بكدة وطبعا الميتسوبيشى عربية محترمة وياباتى ولكن كل سيارة وفقا لميزانية كل شخص يعنى الكورى زى لانوس وفيرنا فئة ماينفعش تتقارن مثلا بالتويوتا من حيث السعر او الجودة

---

كلامك فيه ظلم شوية لأنك بتقارن اعلى موديلات الياباني باقل موديلات الكوري
لما تقارن اللانسر مثلا بالسيراتو او الالنترا الجديدة تلاقي المنافسة حامية جدا و عادة ما بتربح فيها الكوري
على الاقل الكوري لسه بتتصنع في بلدها الأم الأصلية ، مش زي الياباني اللي مابقاش ياباني

أنا شايف التويوتا مناسبة جدا للظروف المصرية.
الاوروبي محتاجة ظروف غير ظروفنا. وفعلا بحس انها فلوس بتترمي في العربية وخلاص.

بوجه عام اليابانی خصوصا تويوتا
وعن تجربه الكورولا

تويوتا Hilux
مناسبة للطرق و الصيانة و الأعطال قليلة و كمان نفس المكنة الجاز بتاعت المكروباصات فبالتالى قطع غيرا أصلية فى كل حتة
و الكورولا جميلة جدا فى الإستهلاك و قطع الغيار
الأوروبى القديم زى ال 504 و ال131 و 132 و 128 يتفوق على ده كله فى الصيانات عندك ال504 مثلا الصنايعية بيحبوها عشان الكبوت واسع و بيقف جوة جمب المكنة
من الأخر العربية الأمثل هتختلف بختلاف مكان معيشتك و إن كان من وجهة نظرى التويوتا النص نقل الجاز هتتفوق لأنها تقريبا فى كل مكان

هو عموما الفيصل بيرجع لطريقه الاستخدام
انا مع الالماني والياباني والفرنساوي والامريكي
اما الكوري والصيني عربيات بتعييش وقطع غيارها غاليه لكن مع اللي يحافظ عليها بس سيارات بدون اعتماديه ولا امان
الكوري انا بعتبره تقليد الياباني
الامريكي مواتير وشاسيهات محترمه بس صيانتها وقطع غيارها بتخلي الناس تبعد عنها
من الاخر
اللي حيحافظ علي العربيه وعايزها تقعد معاه يجيب عربيه كوري او صيني توفير وشكل وامكانيات
اللي عايز يجري ويسافر ويهلك العربيه يجيب الماني او ياباني
اللي عايز يلبس بدله ويحافظ علي عربيته نضيفه ويمشي بيها علي قد المشوار يجيب فرنساوي

اجابة على سؤالك بلا شك وبلا منازع تقريبا الاجابة تيوتا كورولا واليبانى عامة ولكن محدش بياخود كل حاجة بتتنازل عن حاجات مقابل حاجات وكل واحد واولوياته

الآلمانى ، والكورى .

بصراحة الكوري شعبى جدا ومش متين زي الآلمانى .
بس ديه حسب الآذواق .

انا حقول تجربتي
أنا كان معايا لانسر 1600 أوتوماتك، قعدت معايا 8 سنين و عملت بيها 203 ألف كيلو
ماعتلطش ولا مرة و الحاجة الوحيدة الي غيرتها (غير السيور و الفلاتر) هي طرومبة الميه و ده علي 170 الف كيلو
و بعتها و كل حاجة فيها شغالة من الفبريكة، يعني تكيف و سنتر و ازاز كهربا كل ده شغال و عمره ما عطل
عمرها ما سخنت حتي لما طرمبة الميه باظت، عمري ما حسيت بنتشة و هي بتنقل
بعتها علشان زهقت و جبت كورولا (ياباني برده)

عديلي معاه بي ام و كورولا (الاتنين شاريهم زيرو) و هو مرتاح في الكورولا أكتر و اعطالها مافيش خالص في حين ال بي ام عملت معاه كام دقة نقص
واحد أعرفه معاه مرسيدس سي و نيسان قشقاي (الاتنين برده شاريهم زيرو)، بيشكر في القشقاي و بيقول برقبة المرسيدس.

الياباني فعلا أكثر إعتمادية و تقريبا معدوم الاعطال
ده عن تجربتي و تجارب اصدقائي

أنا بقى موظف غلبان على قد حالي ..عربيه متستهلكش بنزين ..يعني سي سي قليل ..يعني عدد سلندرات قليل ...هو ده اللي يكسب معايا ..قول بقى ماروتي ..شاريد قديم تلاته سلندر ..قول اللي يعجبك ..لتر البنزين تمانين حر بدون دعم 4 جنيه مصري ..وسعر بنزين 92 حر بدون دعم 7 جنيه مصري ..يعني المستقبل للتوكتوك أبو كابينه..وخلاص البنزين هيغلى في شهر سبعه ..وهيفضل كده لمدة اربع سنين كمان ..أكفي منين عربيه 1500 سي سي بنزين

التقييم من وجهة نظرى المفروض انه يتبنى على اساس اقتصادى
عن نفسى هاقول تقييمى بناءا على العربيات اللى ركبتها
تقريبا 10 سنوات بركب عربية والدى فيات 128 موديل 76 - عربيه عضمها قوى جدا - مش مريحه - أعطالها بسيطه - تكاليف تشغيلها بسيطه جدا - استهلاك البنزين بتاعها بسيط جدا
تقريبا 4 سنوات فيات 128 موديل 82 نفس اللى فات بالظبط
تقريبا 5 سنوات لانوس - عربيه اعتماديه جدا - مش بتبوظ بسهوله - لكن مشاكلها كتييييييييييييييييييره جدا - لكن فى نفس الوقت مش بتوقف ولا بتخذلك - كان معايا عربيتيتن - واحده موديل 2000 وديه كانت بتاعتى والتانيه شيفورليه لانوس 2012 والصراحه موديل 2000 كانت احسن والاتنين سفاحين بنزين خصوصا لما تمشى بسرعه فوق ال 120
من 2012 وحتى الان - صديقتى وحبيبتى النترا 2010 وبجد اخرة صبرى - عربيه رائعه - قليلة المشاكل - يعيبها النقص الشديد فى عوامل الامان (علشان اتنيلنا اشترينا من غبور)

تقييمى لبعض السيارات من الاحتكاك المباشر
النترا 2010 - بحبها فى كل حاجه
تيجو 2012 - منظر على الفاضى وخساره فيها الفلوس
نيسان صنى 2014 - عربيه لا تليق بأسم نيسان
بيجو 508 موديل 2015 - ايه الدلع والجمال ده
كيا سورينتو - عايزه حرامى علشان يقتنيها سواء قطع غيار أو صيانات أو استهلاك بنزين
128 - العربيه المناسبه لأى حد فى بداية حياته وان كانت اصبحت منهاره تماما فى الاونه الاخيره
لانوس - عربيه واخده صيت على الفاضى
فيرنا - صوره طبق الاصل من اللانوس مع فارق انها جرايه عن اللانوس - مش ثابته خالص - فراملها زى الزفت والطين والقطران
نيو اكسنت 2011 - عربيه حلوه وبنت ناس بشرط - انك ما تطلعش فوق ال 100 - ساعتها بتتساوى بالفيرنا

وأخيرا نفسى فى العربيات التالية - بدون ترتيب
سيراتو 2015 - كرولا 2015 - أوكتافيا a7 2015 - بيجو 508 2015 وممكن على استحياء أضيف لهم النترا 2015 و شارك 2015

الفرنساوي الحديث خارج الحسبه طبعاً (عن تجربه).
لا تقولي ظروف تشغيل بلدنا صعبه ولا بطّيخ, اتفرج على الفورمز الأجنبيه كلها نفس المشاكل والشكاوي بالظبط.
الفرنساوي الحالي Cheaply built, مكونات أساسية زي الفتيس والكهربا بتبوظ بإستمرار حتّى مع الإستخدام الحذر والصيانة المستمرة.
انا من كارهي الكوري بس بدأت أغيّر فكرتي عنه مؤخرّاً..
الياباني لا يٌعلى عليه طبعاً خصوصاً الكورولا الشكل اللي قبل الحالي.. الأساطير اللي بتتقال عن مدى اعتمادية الموديل ده حقيقة. واحد معايا في الشغل معاه كورولا بقاله 3 سنين, بيقولي نفسي اشوف مكوّنات العربية تحت الكبوت شكلها عامل ازاي.

العربية اللي تجبرك تتصاحب على ميكانيكي دي مؤذية وحرام فيها الفلوس بجد.

مفيش عربية هتحقق كل حاجة
بس كل واحد بيحسبها من وجهة نظره
في اللي عايز ثبات و امان
في اللي عايز إعتمادية و قلة اعطال
مش الاوروبي هو التوب... في الياباني زي الهوندا و السوبارو-المظلومين في مصر-عدوا حاجات كتير من الاوروبي و خصوصا السوبارو علشان awd و إعتمادية......

الاعتمادية الاكثر لليابانى طبعا بلا منازع
الالمانى عربيات ركوبتها ممتعة بس صيانتها مش سهلة و ساعات بيحصل فيهم اعطال صعب اكتشافها و متعبة
الكورى متوسط فى الاعتمادية و متعة الركوب بس متميز فى الشكل و النعومة

اقتباس:

---

المشاركة الأصلية كتبت بواسطة dodo2000

الاعتمادية الاكثر لليابانى طبعا بلا منازع
الالمانى عربيات ركوبتها ممتعة بس صيانتها مش سهلة و ساعات بيحصل فيهم اعطال صعب اكتشافها و متعبة
الكورى متوسط فى الاعتمادية و متعة الركوب بس متميز فى الشكل و النعومة

---

لا فض فوك
اوجزت فأنجزت
يعني بالبلدي انت جبت من الاخر الكلام المفيد

الناس اللي بتقول البنزين كده كده هيتلغي دعمه وخلاص أقلمت نفسها على كده !
هو خلاص كده بقى عادي ده يتلغي دعمه وده يغلى وده يخرج م السوق وبقى عادي السرقة والنهب وكل اللي بيحصل ده !!
بقى عادي اني أشوف مواطنين عمالين يشتروا ف مولدات ويقولوا النور هيقطع ف الصيف !!
بس مش عادي خالص اننا ننزل نغير ونطلب نبقى أحسن والأسعار والدعم يفضلوا موجودين بأسعار زمان !!
بجد يعني والله ما بقى في حد يعتمد عليه ف البلد دي

فعلا الياباني الافضل اعتمادية والمتوافر من تويوتا كرولا ونيسان صني القديم وميتسوبيشي لانسر احسن عربيات للخدمة في مصر مواتير وصناديق تروس سواء اتو او مانيوال ضد الرصاص وفرامل قوية غير الصيانات السهلة وسهولة الفك والتركيب وقلة التعقيد سواء للميكانيكا او الكهرباء غير العفشات البسيطة وشديدة التحمل ...زالعربيات دي برة بيقال عليها سيارات الطبقة الوسطي اللي بتدور علي الاعتمادية والتوازن في تكاليف التشغيل والصيانة وبالتالي انتشارها في جميع انحاء العالم وتوافر قطع الغيار الغزير مش من فراغ
اما اباقي الياباني زي الهوندا والسوبارو عربيات متقدمة تقنيا ومعقدة وفي حاجة لصيانات ومنفذي صيانات مؤهلين (مهندسين)علما بانها عربيات سريعة واقتصادية وتوفر كل المتعة للسائق المتطلب كما الطرازات الاكثر تعقيدا من تويوتا سيليكا /سوبرا /كامري/والنيسان سكايلاين/ماكسيما/والميسوبيشي جالنتوايفوليوشن من لانسر وكولت
الاوروبي وعلي راسة الالماني ..فيه سيارات للطبقة الوسطى زي استرا والجيتا والاودي 4والبيجو408/308 واختيها الرينو والستروين c4والفيات الستايلو والبرافا والفورد الفوكس ....الخ سيارات ممتازة وتقنيات عالية وكل الحاجات الحلوة لكن بمقايس الياباني ....بلاعات قطع غيار واستهلاك بنزين عالي ومصاريف صيانات باهظة باختصار خرابة حلوة ماشية علي الارض فما بالك بالنفيس والمحتوي علي تعقيدات ومواتير كبيرة حتي قبل ما ندخل علي العائلات الكبيرة من مرسيدس وبي ام ومازيراتي وجاجوار وبيجو يالهوي حتشحت علشان تصرف عليها والعربية هتتركن بالشهر لحين وصول قطع الغيار وبتتصلح اكتر ما بتتركب وتمشي وبلاخص في بلدنا المحبوب
الامريكي الضخامة في كل شيئ محركات واحجام ورفاهية واستهلاك وللاسف لا تصلح نهائيا للعمل علي الطرق المصرية علما بان تصاميم التعليق الامريكي هي القادرة بجدارة علي التعامل مع نوعيات الطرق المصرية وبجدارة مالهاش مثيل
خش علي الكوري وريث الياباني في الاعتمادية والاقتصاد لكن فية حاجة غريبة بيهرم بسرعة وتلاقي علامات التقدم في العمر بادية خلال 5 سنوات لكن يستحق وريث او البديل الاول للسيارة اليابانية
الصيني بيطور بسرعة وبيلافي اخطاء الماضي بسرعة وبينتشر بقوة وقد يكون البديل التالي للياباني والله اعلم هيكون فين كمان 5 سنين بس الصين بتجتهد لتقديم سيارات جيدة بتكنولوجيا معقولة قليلة الاستهلاك والاعطال
وبالرغم من اني بقالي 34 سنة سيارات قطعت خلالهم بلا مبالغة ملايين الكيلومترات وحبي وعشقي للاوروبي وفيات علي الاخص والتي قمت بالعديد من التعديلات والاضافات لمواتيرها بانواعها المختلفةوالفا وركبت واقتنيت العديد من السيارات والتي انتهي بي الحال حاليا لتواجد كوري وياباني وصيني واوروبي في جعبتي الا انني اجد الافضل والاضمن والاسهل في الصيانة بما اني باعمل كل الصيانات بما فيها عمرات المواتير تحت البيت تتجهه لربح الياباني بالمعادلة وفعلا عربيات جيدة واقتصادية لاقصي الحدود بالرغم انها ممكن تكون مش علي اخر صيحات السيارات لكن الافضل بجدارة ....دي تجربتي حاولت اشارك بيها

التويوتا يا جماعة ما شاء الله مشفتش حد اشتكى منها ولا كسفته

تويوتا الافضل لطبيعة مصر سواء اقتصاديا او الطرق و المطبات و الصيانة